بىلتىر الەمدىك جارىستاردا سوزاقتىق ەكى سپورتشىنىڭ مەرەيى ۇستەم بولدى. بوكسشى ءبىرجان جاقىپتان كەيىن جاستايىنان بەلبەۋ كۇرەسىنىڭ قىر-سىرىن مەڭگەرگەن تاعى ءبىر سوزاقتىق سپورتشى داۋرەن دامەن جاستار اراسىندا الەم چەمپيونى اتاندى. كۇرەس الىپپەسىن اۋداندىق بالالار مەن جاسوسپىرىمدەر سپورت مەكتەبىنەن باستاعان ول بۇگىندە ەل نامىسىن قورعايتىن ساقا سپورتشىعا اينالعانى ايدان انىق.
اتى بايگەدەن وزىپ كەلسە, تورگە وزدىرىپ قۇرمەت كورسەتەتىن كورگەندى ەلدىڭ ۇرپاعى ەمەسپىز بە؟! سوزاقتىڭ ابىرويىن اسىرىپ, كۇللى قازاقتىڭ داڭقىن اسپانداتقان وسىناۋ سپورتشىلارعا, اتاپ ايتقاندا, بوكسشى ءبىرجان جاقىپ, بوكستان ۇلتتىق قۇرامانىڭ باس باپكەرى مىرزاعالي ايتجانوۆ, بەلبەۋ كۇرەسىنەن الەم چەمپيونى داۋرەن دامەن, جەرگىلىكتى جاتتىقتىرۋشى سامات سارمانتاەۆقا اۋدان اكىمى امانعالي ايمۇرزاەۆ قۇرمەت كورسەتتى. «وتكەن جىلى ەكى بىردەي جەرلەسىمىز الەم چەمپيونى اتاندى. توعىز سپورتشىمىز كۇرەستەن سپورت شەبەرى اتاعىن قورعادى. ءداستۇرلى تۇردە وتەتىن «دالا مەن قالا» فۋتبول جارىسىندا جۇلدەلى ورىننان كورىندىك. مۇنىڭ ءبارى ارينە, اۋدان سپورتىنىڭ دۇرىس باعىتتا دامىپ كەلە جاتقانىن بايقاتادى» دەگەن اۋدان اكىمى ءبىرجان جاقىپقا سۋ جاڭا كولىكتىڭ كىلتىن تابىس ەتتى. سونداي-اق, سوزاق سپورتىنىڭ دامۋىنا ولشەۋسىز ۇلەس قوسىپ جۇرگەن بوكس باپكەرى سامات سارمانتاەۆقا قىزمەتتىك ءۇيدىڭ كىلتىن ۇستاتسا, داۋرەن دامەن مەن مىرزاعالي ايتجانوۆقا قارجىلاي سياپات كورسەتتى.
سپورتى بيىك ەلدىڭ, رۋحى بەرىك. وسكەلەڭ ۇرپاق تا الدىڭعى تولقىنعا قاراپ بوي تۇزەيدى. ەندەشە, جەڭىستى جولدار جالعاسىن تابا بەرسىن.
ەرلان رايىمقۇلوۆ.
وڭتۇستىك قازاقستان وبلىسى.