«وڭتۇستىك» وڭىرلىك قولباسشىلىعىنا قاراستى تاۋ اتقىشتارى بريگاداسىندا ءارتۇرلى قىزمەتتەر اراسىندا ۇزدىك مامانداردى انىقتاۋ بايقاۋى اياقتالدى.
ءبولىمنىڭ تاجىريبەلى وفيتسەرلەرى مەن كاسىپقوي سەرجانتتارىنان تۇراتىن كوميسسيا ءۇش كۇن بويى كەلىسىمشارت بويىنشا اسكەري قىزمەتشىلەردىڭ اراسىنان نەعۇرلىم ساۋاتتى مامانداردى انىقتادى. ۇزدىك مامان اتاعىنا اسكەري ءبولىمنىڭ 55 اسكەري قىزمەتشىسى قاتىستى. بايقاۋ باعدارلاماسىنا ولاردىڭ تەوريالىق جانە تاجىريبەلىك داعدىسىن تەكسەرۋ ەنگىزىلدى.
تاۋ اتقىشتارى بريگاداسىنىڭ سەرجانتى – 58395 اسكەري ءبولىمى سەرجانتتىق قۇراممەن جۇمىس ءجونىندەگى بولىمشە باستىعى ءبىرىنشى سىنىپتى سەرجانت قۋاندىق مادياروۆ:
– بايقاۋدىڭ باستى تاپسىرماسى – قاتىسۋشىلاردىڭ جەكە دايىندىعىن تەكسەرۋ نەگىزىندە ماماندار مەن بولىمشە كومانديرلەرىنىڭ اسكەري-كاسىبي تۇرعىداعى دايىندىعىن انىقتاۋ, – دەپ اتاپ ءوتتى.
سەرجانتتاردىڭ كاسىبي دايارلىق ەرەجەلەرىنە سايكەس بايقاۋ قازاقستان قارۋلى كۇشتەرىنىڭ جارعىلارى, تاكتيكالىق-ارنايى جانە اتىس دايىندىعى, دەنە تاربيەسى, ساپ دايىندىعى, جاپپاي قىرىپ-جويۋ قارۋىنان قورعانۋ ساباقتارى بويىنشا جۇرگىزىلدى.
بارلىق پاندەردەن سىناق تاپسىرۋ ءۇشىن كەلىسىمشارت بويىنشا اسكەري قىزمەتشىلەر پلاتستا, ترەناجەرلىك سىنىپتاردا جۇمىس ىستەپ, پوليگونعا شىقتى. بايقاۋ بارىسىندا ولار سپورت دايىندىعى بويىنشا سىناق تاپسىرىپ, جەكە قارۋدى بۇزىپ جيناۋدى جۇرگىزدى. قىسقا مەرزىم ىشىندە پروتيۆوگازدار مەن جالپى اسكەري قورعانىش كوستيۋمدەرىن كيۋدەن, ساپ دايىندىعىنان تاجىريبەلىك جانە تەوريالىق ءبىلىمدەرىن كورسەتتى.
– ءبىز بولىمدەگى گراناتاتقىش, اتقىش, پۋلەمەتشى, مەرگەن, ساپەر, راديوتەلەفونشى جانە كوپتەگەن ماماندىقتار اراسىنان ۇزدىك مامانداردى انىقتادىق. بيىلعى جاۋىنگەرلىك جارىس «كاسىپقويلىق – ارميا نەگىزى» ۇرانىمەن وتۋدە. سول سەبەپتى, ولاردىڭ بۇگىنگى جەڭىسى ەرتەڭگى جەڭىستەرىنىڭ باستاۋى, – دەپ اتاپ ءوتتى تاۋ اتقىشتارى بريگاداسىنىڭ كومانديرى, پودپولكوۆنيك قۋانىشبەك ۇشتاەۆ.
«ەگەمەن-اقپارات».