مەملەكەت باسشىسى نۇرسۇلتان نازارباەۆ قىتاي حالىق رەسپۋبليكاسىنىڭ توراعاسى سي تسزينپينگە كۋنمين قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
ءوز جەدەلحاتىندا نۇرسۇلتان نازارباەۆ كۋنميندە كوپتەگەن جازىقسىز ادامنىڭ قازا بولعانى جانە زارداپ شەككەنى تۋرالى قايعىلى حاباردى كۇيزەلە قابىلداعانىن ايتقان.
«ادامزاتقا قارسى قىلمىستارعا ەشقانداي اقتاۋ بولمايتىنىن جانە مۇنداي جانتۇرشىگەرلىك ارەكەتتەردى قازاقستان قاتاڭ ايىپتايتىنىن اتاپ وتەمىن. حالىقارالىق قوعامداستىق قارا نيەت پەن قازىرگى زامانداعى قاۋىپ-قاتەرلەردىڭ تامىرىنا بالتا شابۋعا كۇش-جىگەرىن جۇمىلدىرۋعا ءتيىس», دەلىنگەن جەدەلحاتتا.
مەملەكەت باسشىسى قىتاي حالىق رەسپۋبليكاسىنىڭ ءتوراعاسى سي تسزينپينگە جانە قازا تاپقانداردىڭ وتباسىلارىنا قايعىرىپ كوڭىل ايتىپ, زارداپ شەككەندەردىڭ بارلىعىنىڭ تەزىرەك ساۋىعىپ كەتۋلەرىنە تىلەكتەستىگىن ءبىلدىردى.