پارلامەنت ءماجىلىسىنىڭ توراعاسى نۇرلان نىعماتۋلين ءماجىلىستىڭ شاقىرۋىمەن قازاقستانعا العاش رەت رەسمي ساپارمەن كەلگەن فينليانديا پارلامەنتىنىڭ توراعاسى ەەرو حەينيالۋومامەن كەزدەستى, دەپ حابارلادى وسى پالاتانىڭ ءباسپاسوز قىزمەتى.
تاراپتاردىڭ اتاپ وتكەنىندەي, ەكى مەملەكەت – سىرتقى ساياسي جانە ەكونوميكالىق ماڭىزدى ارىپتەستەر. ەكى ەل باسشىلارىنىڭ ەتەنە بايلانىستارى دا ەكى جاقتى قارىم-قاتىناستى ودان ءارى قارقىندى دامىتۋعا دەگەن قۇلشىنىستىڭ ايقىن كورسەتكىشى.
ءوزارا ىنتىماقتاستىقتىڭ ماڭىزدى باعىتتارىنىڭ قاتارىندا يننوۆاتسيا, «جاسىل ەكونوميكا», ءبىلىم, سونداي-اق, بۇۇ, ەقىۇ, ەۋروپا كەڭەسى, باسقا دا حالىقارالىق بىرلەستىكتەر مەن ۇيىمدار اياسىنداعى بەلسەندى ءىس-قيمىلدى اتاپ وتۋگە بولادى. ءماجىلىس توراعاسى: «ءبىزدىڭ ەلدەرىمىزدىڭ «جاسىل كوپىر» باعدارلاماسى شەڭبەرىندەگى ىقپالداستىعى «جاسىل» تەحنولوگيالار سالاسىنداعى ءوزارا ءىس-قيمىلدىڭ جارقىن ۇلگىسى بولا الادى. ءبىز فينليانديالىق ارىپتەستەرىمىز قازاقستاندىق باستاماعا قولداۋ كورسەتىپ, «جاسىل كوپىر» ارىپتەستىگى باعدارلاماسى تۋرالى حارتياعا قوسىلادى دەپ ەسەپتەيمىز», دەدى.
قازاقستاننىڭ بولاشاق دامۋى تۋرالى ايتقاندا نۇرلان نىعماتۋلين ەلباسىنىڭ «قازاقستان-2050» ستراتەگياسىن جۇزەگە اسىرۋ اسىل مۇراتتارعا جەتۋ جولىندا بارشا قازاقستاندىقتاردى بىرىكتىرگەنىن اتاپ ءوتتى.
ءوز كەزەگىندە ەەرو حەينيالۋوما, قازاقستاننىڭ ايماقتاعى جانە الەمدىك ارەناداعى ءرولىن جوعارى باعالاي كەلىپ, ءبىزدىڭ ەلىمىز جەتىستىكتەرى, سونداي-اق, قازاقستان دامۋىنداعى تۇراقتىلىق دۇنيەجۇزى ەلدەرى ءۇشىن ۇلگى ەكەندىگىن ايتتى.
بەيبىتشىلىكتى, تۇراقتىلىقتى, قاۋىپسىزدىكتى نىعايتۋ ماسەلەسىن ءسوز ەتكەندە نۇرلان نىعماتۋلين ەلباسى نۇرسۇلتان نازارباەۆتىڭ بارلىق انتيادرولىق باستامالارىنىڭ ماڭىزدىلىعىنا توقتالدى. ول باستامالار حالىقارالىق قوعامداستىقتا ءبىزدىڭ ەلىمىز جاۋاپكەرشىلىگىنىڭ جوعارى دەڭگەيىن كورسەتەدى.
– قازاقستان ەۋرووداقتىڭ قاۋىپسىزدىك ماسەلەسى جونىندە ەۋرووداق – ورتالىق ازيا جوعارى دەڭگەيلى ۇنقاتىسۋ قۇرۋ باستاماسىن قولدادى جانە ونىڭ دامۋىنا بارىنشا ىقپال ەتۋگە دايىن, – دەدى نۇرلان نىعماتۋلين. ءماجىلىس سپيكەرى, سونداي-اق, قازاقستاندىق پارلامەنتشىلەردىڭ تاياۋ شىعىستا يادرولىق قارۋدان جانە جاپپاي قىرىپ-جوياتىن قارۋدان ازات ايماق قۇرۋ تۋرالى حالىقارالىق كونفەرەنتسياعا قاتىسۋعا دايىن ەكەنىن جەتكىزدى. شارا حەلسينكي قالاسىندا وتەدى دەپ جوسپارلانعان. نۇرلان نىعماتۋليننىڭ ايتۋىنشا, قازاقستان ءۇشىن نەگىزگى باسىمدىقتاردىڭ ءبىرى – ەۋروپالىق قۇقىقتىق كەڭىستىككە قوسىلۋ بولىپ تابىلادى. وسىعان وراي ەكى ەل سپيكەرلەرى پارلامەنتارالىق قارىم-قاتىناسقا ايرىقشا نازار اۋداردى. ونى دامىتۋعا قوس مەملەكەتتىڭ زاڭنامالىق ورگاندارىندا قۇرىلعان ىنتىماقتاستىق جونىندەگى توپتار ءوز ىقپالىن تيگىزبەك.
نۇرلان نىعماتۋلين مەن ەەرو حەينيالۋومانىڭ اتاپ وتكەنىندەي, ءوزارا ءىس-قيمىلدى كۇشەيتۋ ءۇشىن فراكتسيالار مەن كوميتەتتەر اراسىندا بەرىك بايلانىس ورناتۋ ايرىقشا ءرول اتقارماق. ءماجىلىس توراعاسى: «فينليانديالىق ارىپتەستەرىمىزدىڭ يننوۆاتسيالىق دامۋدى زاڭنامالىق قامتاماسىز ەتۋ, ءبىلىم جۇيەسىن جەتىلدىرۋ, ەكونوميكاعا «ەكولوگيالىق» كوزقاراس سالاسىنداعى تاجىريبەلەرى ءبىزدىڭ ەرەكشە نازارىمىزدا. ءبىز ەقىۇ پا, پارلامەنتارالىق وداق, باسقا دا حالىقارالىق پارلامەنتتىك ۇيىمدار اياسىندا ءبىر-ءبىرىمىزدىڭ باستامالارىمىزدى ءوزارا قولداۋ مۇمكىندىگىمىز زور», دەپ اتاپ ءوتتى.
كەزدەسۋ سوڭىندا ءماجىلىس سپيكەرى فينليانديا پارلامەنتى توراعاسىنىڭ ساپارى ەكى ەل پارلامەنتتەرى اراسىنداعى ساياسي ۇنقاتىسۋ مەن ءوزارا تۇسىنىستىكتى ورنىقتىرۋعا ىقپال ەتەتىنىنە سەنىم ءبىلدىردى.