وبلىستىق ىشكى ساياسات باسقارماسى جانىنان قۇرىلعان «قازاقتىڭ ۇلتتىق سالت-داستۇرلەرى مەن ادەت-عۇرىپتارى. كەشە. بۇگىن. ەرتەڭ» اتتى عىلىمي-ينتەللەكتۋالدىق اقپاراتتىق توپتىڭ كەزەكتى وتىرىسىنا جوعارى جانە ارناۋلى وقۋ ورىندارىنىڭ وقىتۋشىلارى قاتىستى. وتىرىستا وبلىستىق ىشكى ساياسات باسقارماسىنىڭ باسشىسى زاپەن جۇماباەۆا ۇلتتىق قۇندىلىقتاردى ساقتاۋ, ونى ناسيحاتتاۋ ماقساتىندا قولعا الىنعان شارۋالارعا كەڭىنەن توقتالدى. ول ەلباسىنىڭ بيىلعى جولداۋىندا كوتەرىلگەن ماسەلەلەردى تاراتا اڭگىمەلەدى.
– بيىلعى جولداۋدىڭ بۇرىنعىلاردان ءبىر ەرەكشەلىگى – «ماڭگىلىك ەل» يدەياسىن قالىپتاستىرۋدىڭ العا قويىلۋى بولىپ تابىلادى. ەلباسىنىڭ بۇل باستاماسىن جۇزەگە اسىرۋدا عالىمدار مەن ينتەللەكتۋالدىق توپتىڭ كومەگى قاجەت. وسى ماقساتتا باسقارما جانىنان قۇرىلعان عىلىمي-ينتەللەكتۋالدىق اقپاراتتىق توپ بىرقاتار شارۋالاردى قولعا الدى. قالا مەن اۋىل-ايماقتى ارالاپ, اقپاراتتىق جۇمىستار جۇرگىزۋدە. توپ قۇرامىنا جوعارى وقۋ ورىندارىنىڭ وقىتۋشىلارى مەن ۇستازداردىڭ بىلىكتىلىگىن جەتىلدىرۋ ينستيتۋتىنىڭ قىزمەتكەرلەرى كىردى. اقپاراتتىق توپ ەڭ الدىمەن جاستار اراسىندا بەلسەندى جۇمىس جۇرگىزۋى كەرەك. سەبەبى, جاستاردىڭ قازىرگى اشىق اقپاراتتىڭ اعىنىنا ىلەسىپ, جات اعىمدارعا ەرمەۋى, وزگەلەرگە ەلىكتەمەۋى ءتيىس,– دەدى زاپەن جاقسىبايقىزى.
بۇدان سوڭ اقپاراتتىق توپتىڭ ۇيلەستىرۋشىسى ەركىن قۇرمانبەكوۆ ۇرپاق تاربيەسىنە بايلانىستى بايانداما جاسادى. فيلوسوفيا عىلىمدارىنىڭ دوكتورى التاي تايجانوۆ ۇلتتىق قۇندىلىقتاردى, سالت-ءداستۇردى جاڭعىرتۋ تۋرالى ويلارىن ورتاعا سالدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.