پاتريوت جاستاردىڭ رەسپۋبليكالىق فورۋمى

بايىرعى قىزدار ۋنيۆەرسيتەتى ەلدىڭ ەرتەڭىنە بەيجاي قارامايتىن ستۋدەنتتەردىڭ باسىن قوسىپ, «ماڭگىلىك ەل» يدەيا­سى – جاستاردىڭ جارقىن بولاشاعى» اتتى رەسپۋبليكالىق پاتريوت جاستاردىڭ فورۋمىن ۇيىمداستىردى. قازاق مەملەكەتتىك قىزدار پە­دا­گوگيكالىق ۋنيۆەرسيتەتىندە وتكەن اۋقىمدى جيىن اتالعان وقۋ ورنىنىڭ 70 جىلدىق مەرەيتويى اياسىندا وتكەنىن ايتا كەتۋ كەرەك. سونىمەن, الماتى قالالىق «جاس وتان» جاستار قاناتىمەن بىرلەسە ۇيىمداستىرىلعان فورۋم جۇمىسىنا قالالىق جاستار ساياساتى جونىندەگى باسقارمانىڭ وكىلدەرى, رەسپۋبليكالىق جانە ال­ماتى قالاسى جوو-لارىنىڭ جاس­تار ءىسى جونىندەگى كوميتەت ءتورا­عالارى مەن رەسپۋبليكانىڭ ءار ايماعىنداعى جوعارى وقۋ ورىن­دارىنىڭ كوشباسشى جاستارى قاتىستى. ۋنيۆەرسيتەت ومىرىندەگى اي­تار­لىقتاي وقيعاعا بەلسەندى ستۋدەنتتەرمەن قاتار, ءى.جانسۇگىروۆ اتىن­داعى جەتىسۋ مەملەكەتتىك ۋني­ۆەرسيتەتى, ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى, تاراز مەملەكەتتىك پە­داگوگيكالىق ينستيتۋتى, م.وتەمىس­ ۇلى اتىنداعى با­تىس قا­زاقستان مەملەكەتتىك ۋنيۆەر­سيتەتى, س.تورايعىروۆ اتىن­داعى پاۆلودار مەملەكەتتىك ۋني­ۆەر­سيتەتى, م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى جۇمىلا قاتىستى. جاستار ءۇشىن ماڭىزدى جيىندى قىزدار ۋنيۆەرسيتەتىنىڭ ءبىرىنشى پرورەكتورى ب.اليەۆ سالتاناتتى تۇردە اشىپ, ەلباسى جولداۋىنداعى «ءماڭ­گىلىك قازاقستان» جوباسىنا قا­تىستى ۇسىنىقتى پىكىرلەرىن ور­تاعا سالدى. ال «جاس وتان» جق الماتى قالالىق في­ليا­لى­نىڭ اتقارۋشى حاتشىسى ارمان حالبەكوۆ بارشا جاستى ۇلت­جان­دى جانە ءوز ەلىنىڭ ابزال ازاماتى بولۋعا شاقىردى. فورۋمدا ارنايى ۇندەۋ قا­بىلداندى. وندا فورۋم دە­لە­گاتتارىنىڭ «قازاقستان» اتاۋىن «قازاق ەلى» اتاۋىنا الماستىرۋدى ءبىراۋىزدان قولدايتىندىعى ايتىلىپ, «بۇگىنگى ۇرپاق ءۇشىن ۇلتتىق يدەيا ايقىن, ەندىگى مىندەت بولاشاعىمىزعا باعدار بەرەتىن «ماڭگىلىك ەل» يدەياسىن قالىپتاستىرۋ جولىندا قىزمەت ەتۋ – باستى پارىزىمىز. ماڭگىلىك قازاق ەلىنىڭ وركەندەۋى جاستاردىڭ قولىندا!», دەلىنگەن. فورۋمنىڭ رەسمي بولىمىنەن سوڭ رەسپۋبليكامىزدىڭ كوشباسشى جاستارى «ماڭگىلىك ەل» كورمەسى مەن «اقتۇمار» مۇراجايىن, سونداي-اق, «قىز جىبەك» قوعامدىق بىرلەستىگى ارۋلارى دايىنداعان ءسان ۇلگىلەرى كورسەتىلىمىن تاماشالاپ, قىزدار ۋنيۆەرسيتەتىنىڭ «قىز جىبەك» كلۋبىنىڭ جۇمىسىمەن تانىستى. اۋقىمدى شارا تۇستەن كەيىن «بولاشاق پەداگوگ ءيميدجى» دوڭگەلەك ۇستەلىنە ۇلاسىپ, بەل­سەندى جاستار «نۇر وتان» پارتيا­سى الماتى قالالىق فيليالى ءتورا­عاسىنىڭ ءبىرىنشى ورىنباسارى كەنجەحان ماتىجانوۆپەن كەزدەستى. وتانسۇيگىشتىك رۋحتى كوتەرگەن فورۋم ارنايى دايىندالعان كون­تسەرتتىك باعدارلامامەن اياقتالدى. ايناش ەسالي, «ەگەمەن قازاقستان». الماتى.