قازاقستان ۋكرايناداعى وقيعالارعا بايلانىستى ەرەكشە الاڭداۋشىلىعىن بىلدىرەدى. شيەلەنىستىڭ ودان ءارى ءوربۋى ايماقتىق, سونداي-اق, جاھاندىق اۋقىمداعى كۇتپەگەن ناتيجەلەرگە الىپ كەلۋى مۇمكىن.
قازاقستان بارلىق تاراپتاردى جاعدايدى رەتتەۋ بارىسىندا كۇش قولدانۋ شەشىمدەردەن باس تارتۋعا جانە قالىپتاسقان ماسەلەنى كەلىسسوزدەر ارقىلى شەشۋ ماقساتىندا بارىنشا ساياسي كۇش-جىگەر تانىتۋعا شاقىرادى. بۇل شەشىم حالىقارالىق قۇقىقتىڭ ىرگەلى قاعيداتتارىنا نەگىزدەلۋى ءتيىس.
بارلىق مۇددەلى تاراپتاردى جاعدايدى باعالاۋدا بايسالدى, ادىلەتتى بولۋعا جانە جاۋاپكەرشىلىك تانىتىپ, ۋكراينالىق داعدارىستى ۋشىقتىرۋعا سەبەپ بولاتىن ارەكەتتەردەن باس تارتۋعا شاقىرامىز.
قازاقستان تەز ارادا جاعدايدىڭ تۇراقتانۋىنا, بارلىق ساياسي كۇشتەردىڭ بەيبىت ۇنقاتىسۋىنا جانە قۇقىقتىق ءتارتىپتىڭ قالپىنا كەلۋىنە ءۇمىت ارتادى.