كەشە سپورت جانە دەنەشىنىقتىرۋ ىستەرى اگەنتتىگىنىڭ القا ءماجىلىسى ءوتتى. وندا اگەنتتىكتىڭ وتكەن جىلعى جۇمىسى قورىتىندىلانىپ, العا قويعان ماقسات-مىندەتتەرى تالقىلاندى.
وتىرىسقا پرەمەر-مينيستردىڭ ورىنباسارى گۇلشارا ءابدىقالىقوۆا, اگەنتتىككە قاراستى ۆەدومستۆولاردىڭ باسشىلارى مەن سپورت ماماندارى قاتىستى. جيىندا اگەنتتىك ءتوراعاسى تاستانبەك ەسەنتاەۆ بايانداما جاسادى. ول الدىمەن سپورتشىلاردىڭ وتكەن جىلعى جەتىستىكتەرى جايلى ايتىپ, الداعى كەزدەگى اتقارىلاتىن ىستەرگە توقتالدى.
– وتكەن جىلى قازاقستاندىق سپورتشىلار 732 مەدال جەڭىپ الدى. وليمپيادالىق ەمەس سپورت تۇرلەرى بويىنشا 279 مەدالدى يەلەنسە, سونىڭ ىشىندە 112 التىن, 80 كۇمىس, 87 قولا مەدالعا يە بولدى. سپورتشىلارىمىز الەم چەمپيوناتتارىنان 92, ازيا چەمپيوناتتارىنان 43, حالىقارالىق تۋرنيرلەردەن 114 مەدال الىپ قايتتى. ال مۇمكىندىگى شەكتەۋلى سپورتشىلارىمىز 28 مەدالدى جەڭىپ الدى. ونىڭ ىشىندە 9 التىن, 13 كۇمىس جانە 4 قولا مەدال بار, – دەدى ت.ەسەنتاەۆ.
وسىدان كەيىن ول ەلىمىزدە بۇقارالىق سپورتتى دامىتۋدا, سونىڭ ىشىندە جاستار اراسىندا سالاماتتى ءومىر سالتىن ناسيحاتتاۋدا اتقارىلىپ جاتقان جۇمىستار تۋرالى ايتىپ, قازىر ستۋدەنتتەردىڭ 45 پايىزى سپورتپەن اينالىساتىنىن اتاپ ءوتتى. وسى رەتتە ول بۇگىندە اگەنتتىك 2017 جىلى الماتىدا قىسقى ۋنيۆەرسيادانىڭ وتەتىنىن ەسكەرە وتىرىپ, ستۋدەنتتىك سپورتتى دامىتۋعا كوپ كوڭىل ءبولىپ جاتقانىن, وعان دالەل رەتىندە بىلتىرعى جىلدىڭ قورىتىندىسى بويىنشا ەلىمىزدىڭ جوو-لارىندا وقيتىن ستۋدەنتتەردىڭ سپورتتىق ۇيىرمەلەرگە قاتىسۋى 45 پايىزدى قامتيتىنىن نەمەسە 168,5 مىڭ ادامعا جەتكەنىن ايتتى.
ونىڭ ايتۋىنشا, قازىر 139 رەسپۋبليكالىق جوو-نىڭ 64-ءىندە سپورتتىق كلۋبتار, ال 75 ءبىلىم وشاعىندا سپورتتىق سەكتسيالار جۇمىس ىستەپ تۇر. دەگەنمەن, ت.ەسەنتاەۆ پروبلەمالاردىڭ دا بار ەكەنىن, بۇقارالىق سپورتتى دامىتۋدا قاجەتتى ينفراقۇرىلىمىنىڭ جوقتىعىن جاسىرمادى. «بۇقارالىق سپورتتى دامىتۋداعى باستى پروبلەمامىز – بۇل كادىمگى, قاراپايىم حالىق اينالىساتىن سپورت ينفراقۇرىلىمىنىڭ جوقتىعى. قازىر اۋىلدىق جەرلەردە 4483 سپورت زالدارى بار. بىراق سونىڭ 3650-ءى جالپى ءبىلىم بەرەتىن مەكتەپتەردە ورنالاسقان جانە ولار تەك ساباقتاردى وتكىزۋ ءۇشىن عانا پايدالانىلادى. سونىڭ سالدارىنان سپورت زالدارىنىڭ تەك 20 پايىزى عانا حالىققا قولجەتىمدى بولىپ وتىر. سونىمەن بىرگە, سپورتپەن, دەنەشىنىقتىرۋمەن اينالىسقىسى كەلەتىن ادامعا مەكەمەلەر مەن وقۋ ورىندارىندا سپورتتىق قۇرال-جابدىقتار جەتىسپەيدى», – دەدى ول.
وسىلاي دەي كەلىپ, اگەنتتىك توراعاسى جەرگىلىكتى اكىمدەردىڭ سپورت الاڭدارى مەن زالدارىنىڭ قۇرىلىسىنا سالعىرت قاراپ وتىرعانىن ايتىپ, سىنادى. «قازىر وبلىستىق, اۋداندىق, قالالىق سپورت باسقارمالارىنىڭ ءبارى جەرگىلىكتى اكىمدەرگە قارايدى. سپورت كەشەندەرىن سالۋ, قايتا جاڭارتۋ – سولاردىڭ ءىسى. وكىنىشكە قاراي, بۇل ىستە كەمشىلىكتەر از ەمەس. سوندىقتان بىزگە ۇكىمەتتىك دەڭگەيدە سپورت ينفراقۇرىلىمىن دامىتۋ ءۇشىن وبلىستىق ماڭىزى بار ءاربىر قالا مەن اۋدانداردا دەنەشىنىقتىرۋ-ساۋىقتىرۋ كەشەندەرى قۇرىلىسى بويىنشا شارالاردى قابىلداۋ قاجەت», – دەدى ول. توراعانىڭ ايتۋىنشا, بۇگىندە ۇكىمەتتىڭ قولداۋى ارقاسىندا 2014 جىلى مەملەكەتتىك بيۋدجەتتە 14 دەنەشىنىقتىرۋ-ساۋىقتىرۋ كەشەنىنىڭ قۇرىلىسىنا قارجى قاراستىرىلعان. دەگەنمەن, جەرگىلىكتى جەردە ىسكە جاۋاپتى قاراۋ كەرەك. قازىر ەلىمىزدە دەنەشىنىقتىرۋ مەن سپورتپەن اينالىسۋعا ارنالعان سپورت الاڭدارىنا دەگەن تاپشىلىق 50 پايىزدان اسادى. وسى جاعدايدى ەسكەرە وتىرىپ, سپورت كەشەندەرىن ودان ءارى قاراي قارجىلاندىرۋدى قاراستىرۋ قاجەت, دەدى ول.
وتىرىستا سوچي وليمپياداسى تۋرالى ايتىلماي قالعان جوق. وسى ماسەلە تۋرالى اگەنتتىك ءتوراعاسى مىناداي قورىتىندى جاساعانىن ايتتى. ول الدىمەن وليمپيادادا العا قويعان ماقساتتىڭ ورىندالماعانىن ايتىپ, سپورتشىلاردىڭ ءبىر عانا قولا مەدالدى يەلەنۋىنە جاتتىقتىرۋشىلار قۇرامى كىنالى ەكەنىن مالىمدەدى.
– وكىنىشكە قاراي, سوچي وليمپياداسىندا ءبىزدىڭ قۇراما ۆانكۋۆەر ويىندارىنا قاراعاندا, لايىقتى ونەر كورسەتە المادى. ونى ءبىز مويىندايمىز. ءبىز كەمىندە ەكى مەدال الامىز دەپ ەدىك. بىراق ولاي بولمادى. شاڭعى جارىسى, بياتلون, شاڭعىمەن تۇعىردان سەكىرۋ سياقتى سپورت تۇرلەرىندە كورسەتكىشتەرىمىز كوڭىل كونشىتپەدى. اسىرەسە, شاڭعى جارىسىنا قاتىسقان سپورتشىلارىمىز ءۇمىتىمىزدى اقتامادى, – دەدى ول.
سونىمەن بىرگە, ول قازاقستان قۇراماسىنىڭ لايىقتى ناتيجە كورسەتپەۋى تەك سپورتشىلارعا عانا بايلانىستى ەمەستىگىن, ەڭ باستىسى, ول جاتتىقتىرۋشىلاردىڭ تىكەلەي كىناسى ەكەنىن اتاپ ءوتتى. ونىڭ ايتۋىنشا, جاتتىقتىرۋشىلار قۇراما سپورتشىلارىمىزبەن دۇرىس جۇمىس جاسامادى. سونىڭ كەسىرىنەن, سپورتشىلار مەن باپكەرلەر اراسىندا جارىسقا دايىندىق ءتيىستى دەڭگەيدە جۇرگىزىلمەدى. ەندى وسىعان بايلانىستى اگەنتتىك 14 ناۋرىز كۇنى قازاقستان وليمپيادا كوميتەتى وكىلدەرىنىڭ قاتىسۋىمەن جيىن وتكىزۋدى جوسپارلاپ وتىر. «وسى كەزدەسۋدە بارلىق كەمشىلىكتەر ايتىلىپ, سپورتشىلاردىڭ ناتيجەسىز ونەر كورسەتۋ سەبەپتەرى كەڭىنەن تالقىلانادى», دەدى توراعا. دەسەك تە, ت.ەسەنتاەۆ قىسقى سپورت تۇرلەرىندە ەلىمىزدە العا جىلجۋشىلىق بار ەكەنىن, ۆانكۋۆەر وليمپياداسىنا 38 سپورتشىمىز جارىستىڭ 8 تۇرىنەن عانا ليتسەنزيا السا, بيىلعى سوچي وليمپياداسىندا قازاقستاننىڭ 52 سپورتشىسى 60 جولدامانى جەڭىپ العانىن ايتتى.
وسىدان كەيىن اگەنتتىكتىڭ القا ءماجىلىسىن پرەمەر-مينيستردىڭ ورىنباسارى گۇلشارا ابدىقالىقوۆا قورىتىندىلاپ, سپورتتى دامىتۋدا بىرقاتار تاپسىرمالار بەردى. وندا ۆيتسە-پرەمەر الدىمەن ۆەدومستۆوعا ۇزاق مەرزىمدى كەزەڭگە ارنالعان سپورتتى دامىتۋ ماسەلەلەرىن قاراستىرۋدى تاپسىردى. «اگەنتتىك بارلىق مۇددەلى ورگاندارمەن بىرلەسە وتىرىپ, ۇزاق مەرزىمدى كەزەڭگە ارنالعان دەنەشىنىقتىرۋ جانە سپورتتى دامىتۋ ماسەلەلەرىن قاراستىرۋى ءتيىس. اگەنتتىك تاراپىنان ۇزاق مەرزىمگە ارنالعان ناقتى ۇسىنىستار بەرۋ كەرەك», دەدى گ.ابدىقالىقوۆا. سودان كەيىن گۇلشارا ناۋشاقىزى قازىرگى كەزدە مەكتەپ وقۋشىلارىنىڭ 80 پايىزىنىڭ سپورتپەن جۇيەلى اينالىسۋلارىنا مۇمكىنشىلىكتەرى جوق ەكەنىن, وسىعان بايلانىستى اگەنتتىككە ءتيىستى جۇمىستاردى تاپسىراتىنىن ايتتى.
– ءبىز الداعى كەزدە ەلىمىزدە 10 ايماقارالىق سپورتقا ارنالعان كوللەدج اشۋدى جوسپارلاپ وتىرمىز. وسى ۋاقىتقا دەيىن ستۋدەنتتەر سپورتىنا ءتيىستى دەڭگەيدە كوڭىل بولىنبەي كەلدى. شەت مەملەكەتتەردە ۋنيۆەرسيتەت سپورتى ەسەبىنەن كاسىپقوي كلۋبتار مەن ۇلتتىق كوماندالار قۇرىلادى. ۋنيۆەرسيتەت سپورتىنا ءتيىستى دەڭگەيدە كوڭىل بولمەۋ ەلىمىزدىڭ حالىقارالىق كوماندالارىنىڭ سپورتتىق رەزەرۆىن دايىنداۋعا كەرى اسەر ەتەدى. سوندىقتان اتالعان كوللەدجدەردەن باسقا سپورت جانە دەنەشىنىقتىرۋ ىستەرى اگەنتتىگىنە ءبىلىم جانە عىلىم مينيسترلىگىمەن, جەرگىلىكتى اتقارۋشى ورگاندارمەن بىرلەسە وتىرىپ, مەكتەپ سپورتىن دامىتۋ, ستۋدەنتتەردىڭ سپورتتىق كلۋبتار جەلىسىن كەڭەيتۋدى تاپسىرامىن, – دەدى ۆيتسە-پرەمەر. سونداي-اق, ول اگەنتتىككە جەرگىلىكتى اتقارۋشى ورگاندارمەن بىرلەسە وتىرىپ, وڭىرلەردى قاجەتتى كادرلارمەن قامتاماسىز ەتۋ بويىنشا شارالاردى قابىلداۋدى تاپسىردى.
القا ءماجىلىسىنىڭ سوڭىندا ۇكىمەت باسشىسىنىڭ ورىنباسارى گ.ابدىقالىقوۆا 2013 جىلدىڭ قورىتىندىسىندا «جىل سەرپىنى» اتالىمى بويىنشا «جىل سپورتشىسى» رەسپۋبليكالىق كونكۋرسىنىڭ جەڭىمپازى اتانعان سوچي وليمپياداسىنىڭ قولا جۇلدەگەرى دەنيس تەندى ماراپاتتاپ, ديپلومدى تابىس ەتتى.
داستان كەنجالين,
«ەگەمەن قازاقستان».