قازاقستان مەن رەسەي شەكاراسىندا ەكونوميكالىق كونتراباندانىڭ ەكى وقيعاسى تىركەلدى, ونىڭ ءبىرى – 40 توننا ديزەلدى جانارماي بولسا, ەكىنشىسى – 10 توننا بولاتىن كوپجىلدىق وسىمدىك تۇقىمىن زاڭسىز الىپ وتۋگە قاتىستى.
ناقتىراق ايتساق, اقپان ايىنىڭ 26-نان 27-نە قاراعان ءتۇنى پاۆلودار شەكارا وتريادىنا قاراستى «ورلىتوبە» وتكىزۋ-باقىلاۋ پۋنكتىنىڭ باقىلاۋشىلارى تىركەمەسى بار «ۆولۆو» جانە «مەرسەدەس» اۆتوكولىكتەرىمەن كەلە جاتقان ەكى وتانداسىمىزدى ۇستادى. ولاردان جالپى سالماعى 40 توننا تارتاتىن, وتىن رەتىندە قولدانىلاتىن جانارمايعا دەگەن رۇقسات قاعازدارى بولماي شىقتى.
وسى كۇنى, ورال شەكارا وتريادىنا قاراستى «اقساي اۆتو» وتكىزۋ-باقىلاۋ پۋنكتىنىڭ باقىلاۋشىلارى «كاماز» اۆتوكولىگىمەن رەسەيگە كەتىپ بارا جاتقان جەرلەسىمىزدى ۇستادى. اۆتوكولىكتى قاراۋ كەزىندە قۇجاتى دۇرىس راسىمدەلمەگەن 76 قاپقا سالىنعان, جالپى سالماعى 10 توننا بولاتىن كوپجىلدىق وسىمدىك تۇقىمى تابىلدى. اتالعان دەرەك بويىنشا قۇقىق قورعاۋ ورگاندارى حابارلاندىرىلدى. ۇستالعان جۇكتى باتىس قازاقستان وبلىستىق سانيتارلىق ينسپەكتسياسىنا بەرۋ جوسپارلانۋدا, دەپ حابارلادى ۇقك شق باسپاسوز قىزمەتى.