«وجەتتەۋ جىرعا اجال جوق!»

نەمەسە اقىن فاريزا وڭعارسىنوۆانىڭ ماڭگى ولمەس جىرلارىمەن سىرلاسۋدىڭ ءبىر ءساتى

كوڭىلدە ءبىر وكىنىش بار! ادام بولىپ ءومىر ءسۇرۋدىڭ ءوزى قيىنداپ بارا جاتقان مىنا زاماندا كەي-كەيدە كوپ جاعدايعا وكىنەتىنىڭ دە بولادى ەكەن. سول ءبىر وكىنىشتىڭ وكپەك جەلىنە كەۋدەڭدى توسىپ, كەلەر كۇندەرگە دەگەن سەنىمىڭنىڭ شوعىن قايىرا ءبىر ۇرلەر مىنا ۇرپيگەن ۇركەك دۇنيەدەن تياناق ىزدەگەندەيسىڭ. سەزىمسىز قالىپ, سەمىپ بارا جاتقان دۇنيە شىركىننىڭ كەۋدەسىنە دەم سالىپ, جان بىتىرەر كىم بار, كانە؟! الاۋلاپ جانار جان بار ما؟! ادام بالاسى مىنا كۇيكى تىرشىلىكتىڭ تىرناعىمەن ءبىر-ءبىرىنىڭ جان دۇنيەسىن تىرمالاپ, قانسىراتىپ جاتقان اراندى زاماننىڭ ارىن ساقتاپ قالار كىمىڭ بار, كانە؟! تالاس تا تارتىستى تاعدىرىڭنىڭ قىلعا ىلىنگەن كۇيى بار. سول كۇيدى باسىمىزدان كەشە وتىرىپ, ۇنەمى اسىعامىز. قايدا اسىعامىز, قايدا جۇگىرەمىز, قايدا اپتىعامىز وسى ءبىز؟ ايتىڭىزشى, قايدا بارادى مىنا اجالدى ادام عۇمىر؟! ءبىر ءتىرى جان بۇرىلىپ وسىعان جاۋاپ بەرسەيشى؟! سول ساتتە اقىن جۇرەگىنىڭ مىنا ءبىر ءۇنى قۇلاعىما جەتكەندەي بولعانىن قايتەرسىز؟! نە ىستەسەم ەكەن ولىمگە, قوياتىن ەمەس بۇل زالىم. نۇر شاشار تۋعان كوگىمدە, جالمادى ءبارىن تۇلعانىڭ! وسىلاي دەپ ءوز عۇمىرىندا جۇرەگىنىڭ كوز جاسىن تالاي ءبىر سىعىپ العان اقىن فاريزا وڭعارسىنوۆانىڭ وسى ءبىر وكىنىشىنىڭ وت جالىنى جانىمدى قارىپ وتكەندەي بولدى سول ساتتە. اپىر-اي, «نۇر شاشار تۋعان كوگىمدە, جالمادى ءبارىن تۇلعانىڭ!» دەپ جىر كوگىندە نۇر شاشقان اقىن فاريزانى دا جالماعان زالىم ءولىمنىڭ دە مىنا بىزگە بەيمالىم ماڭگىلىكتەن ءۇن قاتقانى ما؟! جان دۇنيەسى مەن سىرلى سەزىمىنىڭ شىرىلداپ وتقا جانعان اقىن فاريزا وڭعارسىنوۆانىڭ «نە ىستەسەم ەكەن ولىمگە» دەپ كۇڭىرەنىپ, كۇرسىنگەن وسى ءبىر كوڭىلى مەن ءبىر ەزىلىپ, ءبىر ەگىلگەن جۇرەگىنىڭ تىنىسىن قايىرا ءبىر سەزىنگەندەي بولامىن. ءسات سايىن اڭدىپ تۇرعان اجال اۋزىندا شىرىلداپ كەتىپ بارا جاتقان ادام ءومىرى مەن عۇمىرىنىڭ جان دۇنيەسىن ءوز تىرشىلىگىمىزدە سەزىنە الىپ ءجۇر مە ەكەنبىز؟! ءتىپتى, ادام بالاسى وسى ءبىز ءوزىمىزدىڭ اجالدى ەكەندىگىمىزدى بىلەمىز بە ەكەن, ۇمىتىپ كەتكەن جوق پا ەكەنبىز وسىنى؟! بالكىم بىلەتىن دە شىعارمىز! بالكىم...بەيمالىم ءبىر دۇنيەگە اسىعاتىنىمىز دا, اپتىعاتىنىمىز دا سونان شىعار؟!. قۇلازىعان قيا كوڭىلدىڭ كەمەرىنە كەلگەن وسى ءبىر وي تولقىنىمەن توماعا تۇيىق وتىراسىڭ دا, جان سىرلاسىڭدى ىزدەيسىڭ. ال سول جان سىرلاسىڭ كىم تاعى؟ جانىڭا سىرلاس بولار جان يەسى بار ما ءوزى؟ بار بولسا كىم ول؟! وسى ساتتە ويلانىڭقىراپ قالارىڭ دا بار. ءوز ويىڭمەن ءوزىڭ ارپالىسىپ, «ساپ-ساپ, كوڭىلىم» دەپ اباي حاكىمشە ءوزىڭدى ءوزىڭ سابىرعا شاقىرىپ, شىرماۋىق دۇنيەنىڭ شىرعالاڭىنان الىپ شىعار ءبىر قۇدىرەتتى كۇشتى ىزدەيسىڭ. ىزدەپ قانا قويمايسىڭ, ەلەگىزيسىڭ! اينالادا ساۋلە جوق. ساۋلەسى جوق قۋىس كەۋدە ىشتەن تىنىپ, قۇسالانىپ جاتقان مىنا دۇنيە شىركىننىڭ مۇڭى مەن زارىن قايدان سەزىنە السىن؟! تاعدىر جايلى, ەل جايلى, قازا جايلى, ءومىر جايلى, دوس جايلى جاز ارايلى, جاقسى, جامان ويلار كەپ وڭاشادا ماعان تىنىم بەرمەيدى, مازالايدى. ءدال قازىر اقىن فاريزانىڭ دا ءوز تىرشىلىگىندە ويران-اسىرى شىققان وسى ءبىر جان الەمىنە جاناي وتىرىپ, جاقسى دا جامان ويدىڭ تۇتقىنىندا قالار وي مەن ساناڭا ءوزىڭ دە سايا ىزدەيسىڭ. بىراق كىمدى, نەنى سايالاساڭ دا سانالىنىڭ ساناسى تىنشي قويار ما ەكەن؟! مىنا تىرشىلىكتىڭ مازاسىن ابدەن الىپ بىتكەن ادام بالاسىنىڭ قاناعاتسىز ىندىنىنىڭ ارانىندا شىرىلداپ كەتىپ بارا جاتقان سول ادام عۇمىردىڭ جانىنا سايا ىزدەگەندىكتەن دە: تىنىم كورمەي ادامزات تىربانادى, كوز جۇمبايدى كىرگەنشە قۇمعا جانى. الدىرمايدى قانشاما ۇمتىلعانمەن, جايلى ءومىردىڭ ءمىز باقپاس سۇر قامالى. جىڭىشكەرگەن قىل جۇيكە ۇزىلەردەي, باسى قاتىپ, ءبىر مەزگىل جىندانادى, – دەگەن وسى ءبىر وي ءتۇيىندى اقىن فاريزا مىنا ءبىزدىڭ بۇگىنگى تىرشىلىگىمىزدىڭ قازانىندا بىرگە قايناپ ءجۇرىپ ايتقانى دا بولار. وسىنى ايتسا دا قانشالىقتى ازاپتى دا, سانانى جانشىپ ەزەر اۋىر ويلاردىڭ قاماۋىنان دا, قامىقتىرىپ, قاپالاندىرار قالىڭ مۇڭ تۇماننىڭ تۇمشا­لاۋىنان دا ەشقاشان تات باسپاعان اقىن جانىن ءوزىنىڭ تازا دا ءمولدىر قالپىندا, قاق تۇرعىزباي الىپ شىعۋعا دا قانشالىقتى رۋح پەن تالانتتىڭ قۋاتتى قاناتى قاجەت بولدى دەسەڭىزشى! «اقىن جۇرەگىنە قاق تۇرمايدى, قاق تۇرعان جۇرەكتەن تۇك تە شىقپايدى» دەگەندى ايتا بىلگەن عابەڭنىڭ, كادىمگى عابيت مۇسىرەپوۆتىڭ وسى ءبىر ءسوزى دانانىڭ اقىن جۇرەگىن تەرەڭىنەن تاني بىلگەندىگى دەسەك تە, ءوز عۇمىرىندا ءازىز جۇرەگىنە قاق تۇر­عىزباي كەتكەن جانە كەككە دە العىزباي وتكەن فاريزا وڭعارسىنوۆا سىندى جىر پاديشاسىنىڭ عۇمىرلى جىر ديدارى ماڭگىلىك جارقىراپ تا, جادىراپ تا, جاڭعىرىپ تا تۇرارى انىق! بۇل ماڭگىلىكتى ەندىگى ارادا ەڭ اۋەلى اقىن فاريزانىڭ جىر جۇرەگىنەن ىزدەگەنىمىز ابزال. ول ءۇشىن ەندىگى بىزگە وڭعارسىنوۆا مۇرا جىرىنىڭ جۇرەك سىرىنا تەرەڭىرەك ۇڭىلگەنىمىز دە ابزال. ويتكەنى, فاريزا وڭعارسىنوۆانىڭ ءار جىرىنىڭ جولدارىندا اقىننىڭ جۇرەك ءلۇپىلى, تىنىسى مەن وي-ساناسى, اقىل-پاراساتى, ەرىگى مەن جىگەرى, وزىنە عانا ءتان قايسارلىعى مەن قايتپاستىعى, ورەلىگى مەن وجەتتىلىگى, ادالدىعى مەن اسقاقتىعى, تەرەڭدىگى مەن تەكتىلىگى, ومىرگە دەگەن ىڭكارلىگى مەن قىز عۇمىردىڭ ەركەلىگى, سول قىز عۇمىردىڭ سۇيىسپەنشىلىگى, سىلقىمدىعى مەن ءتاتتى قىلىعى قالدى. ماحاببات, ماحاببات قالدى! مەنى ورتەۋدە وتى مول نۇر قاراسىڭ, تايعاناقتاپ كوز سالام ۇرلانا, شىن. قانداي جارعا سوقتىرار بۇل كۇيىمىز, نەمەن, قالاي جالعاسار بۇل جاراسىم. مۇڭ تەڭىزدىڭ مۇزدارىن تالاق ەتتىم, ماڭگى ۇمتىلعان جاعاعا جاڭا جەتتىم. مەنىڭ تاكاپپارلىعىم, ورلىگىمدى قوشتاسقاندا وزىڭمەن الا كەتتىڭ! جىرمەن ورىلگەن اقىننىڭ وسى ءبىر جۇرەك سىرىن ۇعا الدىڭىز با؟! اسىرەسە, سوڭعى ەكى شۋماعىنا ۇڭىلە ءتۇسىڭىزشى! «مەنىڭ تاكاپ­پار­لىعىم, ورلىگىمدى, قوشتاسقاندا وزىڭمەن الا كەتتىڭ!», دەگەنى نەسى ەكەن اقىننىڭ؟! سول اقىن ايتىپ وتىرعان تاكاپپارلىق پەن ورلىك دەگەنىڭىزدىڭ ءوزى ادام بالاسىنىڭ ەكىنىڭ ءبىرىنىڭ مىنەزىنە بىتە بەرمەيتىن جان دۇنيە مەن سەزىم عوي! ولاي بولسا اقىن جانىنىڭ سول تاكاپپارلىعى مەن ورلىگىن وزىمەن بىرگە الا كەتكەن قاي قۇدىرەت؟! كىم ول؟! سەزىمدى سەزىم عانا ۇرلاي الار دا, ۇرلاي بىلەر! ول ماحاببات اتتى جان سەزىم! ول ماحاببات اتتى قۇدىرەتتى جان كۇشى! ماڭگىلىك ەمەس عۇمىر, مەنى دە كۇتكەن اجال بار, جايلىلىق بەرمە, تىنىشتىعىمدى ال, مازامدى ال, الىڭدار جيعان-تەرگەندەرىمنىڭ بارلىعىن, ويلارىما ويران سالماڭدار بىراق, ادامدار! ءوز ويلارى ءۇشىن بار عۇمىرىن دا, بار بايلىعىن دا قۇربان ەتۋگە بار اقىن فاريزانىڭ ويدىڭ ءوزىن ادام بالاسىنىڭ اسىل دا قۇدىرەتتى قازىناسى ەسەبىندە ساناۋى مەن تانۋىنىڭ ارالى­عىندا جاتقان اقىل مەن پاراسات پايىمىنىڭ تۇجىرىمىن ەكىنىڭ ءبىرى تاني الماسى جانە دە بار. ويتكەنى, ويسىزدىق پەن وزبىرلىق جايلاپ بارا جاتقان جانە دە سول كەسەلدىڭ ادام بالاسىنىڭ جان دۇنيەسىن توناپ جاتقان مىنا زاماننىڭ وسى ءبىر اقيقاتى الدىنداعى وسى ءبىر پىكىرىمىزدى جاسقانباي العا تارتىپ وتىرمىز. الايدا, اقىن فاريزا وڭعارسىنوۆا سول اقيقاتتى بىزدەن بۇرىن دا ايتا بىلگەن ەكەن. ويلارىمدى ءولتىرىپ جانىن قۇرتتىم, سودان قانعا تويىمسىز ءمانىمدى ۇقتىم. وعان كۋا جۇرەك پەن ارىم عانا, ولاردىڭ دا قانشاما تاۋىن جىقتىم! – دەي وتىرىپ, فاريزا اقىن ءوز ويلارىن ءولتىر­گەن تالايعى ءبىر ساتتەرىنە ءوز جۇرەگى مەن ءوز ارى عانا كۋا بولا الارلىق كۇي كەشكەنىمەن, قينالعانىمەن دە, اقيقاتتىڭ اق شىمىلدىعىن اشىپ كەتتى. مۇنى اقىننىڭ جانى مەن جۇرەگىنىڭ تاعى دا سول كىر شالماي كەتكەندىگى دەپ تانىرىمىز بار. ارى مەن جان تازالىعى دەپ تانىرىمىز جانە دە بار! وسى ءبىر ار مەن جان تازالىعى جەتپەي جاتقان بۇگىنگى ادامزاتتىڭ دا ءار بالاسى ار تاۋىن جىعار الدىندا اقىن فاريزا وڭعارسىنوۆاداي ويلانسا ەكەن, جان كۇيزەلىسىن كەشسە ەكەن دەيتىن ءبىر ويدىڭ دا سانادا جاڭعىرىپ تۇرىپ العانى دا بولدى. ارلى ادام ويلى ادام ەكەندىگىن ءبىز دە تاپ وسى جولى تانىعاندايمىز! مۇنى تانىتىپ وتىرعان ءومىر سىرىن تەرەڭ تۇيسىگىمەن تاني بىلگەن اقىن فاريزا! سول اقىن فاريزانىڭ ارلى دا جاندى جىرى! ويى بار جىردىڭ جانى دا بولارلىعىن تاعى دا وسى جولى ۇعىنا تۇسكەندىگىمىز جانە دە بار. مىنە, كوردىڭىز بە, اقىن فاريزانىڭ جىرلارى ءومىر ساباعى, ءومىردىڭ ءوز ءدارىسى, ءتىپتى ءومىردىڭ ءوزى! سول ءومىر اقىن فاريزا بولىپ مىنا ءبىزدى, مىنا تىرشىلىكتى, ءوزىنىڭ جەر الەمى مەن جىر الەمىن ارتىنا قارايلاماستان قيىپ كەتە باردى. وزىمەن ەشنارسە دە اكەتكەن جوق. بارىن دا, ارىن دا, جانىن دا, جۇرەگىن دە, ويى مەن مۇڭىن دا, سىرى مەن سازىن دا, پەيىلى مەن نيەتىن دە, قايسارلىعى مەن وجەتتىلىگىن دە, سۇيىسپەنشىلىگى مەن تازا ماحابباتىن دا ءوز جىرىمەن قۇنداقتاي وراپ, دۇنيە الەمنىڭ تال بەسىگىنە بولەپ تاستاپ كەتتى مىنا ءسىز بەن بىزگە. جانە دە: مەندە دە قۋرار نۋ ارمان, بولسا دا بارار جولىم كوپ... ورلىك پەن قايعى سۋارعان وجەتتەۋ جىرعا اجال جوق!, – دەگەن ءوز جۇرەگىنىڭ ۇكىمىن شىعارىپ, سونى ايتىپ تا كەتتى! ەندى اقىننىڭ ءوز جۇرەگىنىڭ وسى ۇكىمىنە جۇگىنە ءبىلىڭىز, بۇگىنگى دە, دۇنيەگە كەلەر دە ۇرپاق! اقىننىڭ اماناتى دا وسى! جابال ەرعاليەۆ, جازۋشى, قازاقستاننىڭ ەڭبەك سىڭىرگەن قايراتكەرى, پارلامەنت سەناتىنىڭ دەپۋتاتى. استانا.