ENRC-ءدىڭ قۇرامىنا كىرەتىن «قازحروم» تۇك» اق-تىڭ فيليالى اقتوبە فەرروقورىتپا زاۋىتىندا جەرگىلىكتى بۇقارالىق اقپارات قۇرالدارى وكىلدەرى ءۇشىن قورشاعان ورتانى قورعاۋ ساياساتى بويىنشا اشىق ەسىك كۇنى وتكىزىلدى. ولار №1, №2 بالقىتۋ تسەحتارىندا جانە گازدان تازارتۋ ۋچاسكەلەرىن ارالاپ قورشاعان ورتانى قورعاۋ تالاپتارىنىڭ ورىندالۋ بارىسىمەن تانىستى.
بۇل ءىس-شارانىڭ نەگىزگى ماقساتى بۇقارالىق اقپارات قۇرالدارى وكىلدەرىن كاسىپورىنداعى ءوندىرىس جۇمىستارىمەن جاقىنىراق تانىستىرۋ جانە ولاردى تولعاندىرىپ جۇرگەن ەكولوگيالىق ماسەلەلەر جونىندە تۋىنداعان ساۋالدارعا تولىق جاۋاپ بەرۋ بولىپ تابىلادى. الدىمەن جۋرناليستەر ادەتتەگىدەي قاۋىپسىزدىك تەحنيكاسىنا بايلانىستى ءوندىرىس ايماعىندا ءجۇرىپ-تۇرۋ جايىندا نۇسقاۋلىقپەن تانىستىرىلدى جانە ارنايى كيىمدەرمەن قامتاماسىز ەتىلدى.
شاراعا قاتىسۋشىلاردى الىپ جۇرگەن زاۋىتتىڭ باس ينجەنەرى لەونيد پروكوپەۆ №1, №2 بالقىتۋ تسەحتارىنىڭ بۇگىنگى تىنىس-تىرشىلىگى, شىعاراتىن ءونىمى, ساپاسىنا توقتالىپ, ءوندىرىس پروتسەسىن كورسەتتى. ال قوناقتاردىڭ كاسىپورىننىڭ ەكولوگيالىق ساياساتىنا قاتىستى سۇراقتارىنا «قازحروم» تۇك» اق-تىڭ ەكولوگيانى جوسپارلاۋ جانە رەتتەۋ دەپارتامەنتىنىڭ باستىعى سۆەتلانا ماششەنكو, تەحنولوگيالىق پروتسەستەرگە بايلانىستى سۇراقتارعا زاۋىتتىڭ باس ينجەنەرى لەونيد پروكوپەۆ جاۋاپ بەردى. سودان كەيىن گازدان تازارتۋ ۋچاسكەسىنىڭ باستىعى ەربول ماحامبەتوۆ ۋچاسكەنىڭ جۇمىس بارىسىمەن تانىستىردى.
«كاسىپورىندا مۇنداي اشىق ەسىك كۇنىن العاش رەت ۇيىمداستىرىپ وتىرمىز. بۇگىن مىنە, وندىرىسكە, ەكولوگياعا قاتىستى كوپتەگەن سۇراقتارعا بىلىكتى ماماندار تولىققاندى جاۋاپ بەردى. زاۋىتتىڭ تىنىس-تىرشىلىگىمەن, شىعاراتىن ءونىمى, ساپاسى, ەكولوگيالىق ساياساتى جايىندا مالىمەتتەرگە قانىق بولدىڭىزدار, ارالاپ كوردىڭىزدەر. الداعى ۋاقىتتا بۇل باستاما ءوز جالعاسىن تابادى دەگەن سەنىمدەمىن», دەدى «قازحروم» تۇك» اق-تىڭ ءباسپاسوز قىزمەتىنىڭ جەتەكشىسى ينەسسا فادەەۆا.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.