بۇگىن اقپارات جانە قوعامدىق دامۋ, ءبىلىم جانە عىلىم, مادەنيەت جانە سپورت مينيسترلىكتەرىنىڭ وكىلدەرى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورلىق-وقىتۋشىلىق قۇرامى مەن ستۋدەنتتەرىمەن كەزدەستى, دەپ حابارلايدى Egemen.kz.
كەزدەسۋگە ۋنيۆەرسيتەتتىڭ رەكتورى, ۇعم اكادەميگى ەرلان سىدىقوۆ قاتىستى. ول ۇلتتىق باعدارلامانىڭ ءبىلىم, مادەنيەت, جاستار ساياساتى سالالارىنداعى ەرەكشە ماڭىزدى ءرولىن اتاپ ءوتتى.
قر اقدم رۋحاني جاڭعىرۋ باعدارلاماسىن ۇيلەستىرۋ دەپارتامەنتىنىڭ ديرەكتورى ۋ.تناليەۆ «ۇلتتىق رۋحاني جاڭعىرۋ» ۇلتتىق جوباسىنىڭ نەگىزگى باعىتتارى جانە مىندەتتەرىمەن تانىستىردى.
ءبىلىم جانە عىلىم ءبىرىنشى ۆيتسە-ءمينيسترى ش.كارينوۆا مەملەكەتتىك ءتىلدى دامىتۋ جانە ءبىلىم بەرۋ سالاسىنداعى وزەكتى ماسەلەلەردى شەشۋ جونىندەگى ءىس-شارالار تۋرالى باياندادى.
قر مسم مادەنيەت كوميتەتىنىڭ توراعاسى ا.ابدۋاليەۆ ۇلتتىق جوبانىڭ «ەل رۋحى» باعىتى بويىنشا قاراستىرىلعان ءىس-شارالارعا ەگجەي-تەگجەيلى توقتالدى.
ءوز كەزەگىندە, قر اقدم جاستار جانە وتباسى ىستەرى كوميتەتىنىڭ توراعاسى ش.بايمانوۆ «تاۋەلسىزدىك ۇرپاقتارى» باعىتىندا قاراستىرىلعان جاستاردىڭ نەگىزگى سۇرانىستارىن, سونىڭ ىشىندە تۇرعىن ءۇي, جۇمىسپەن قامتۋ, ءبىلىم بەرۋ, جاستاردى قوعامدىق پايدالى قىزمەتكە تارتۋ, NEET ساناتىنداعى جاستاردى الەۋمەتتەندىرۋ ماسەلەلەرىن شەشۋگە باعىتتالعان شارالار ءجونىن تارقاتتى.
ايتا كەتسەك, ۇلتتىق جوبا مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ازىرلەندى جانە قازاقستاندىق قوعامنىڭ مادەنيەت, اعارتۋ جانە ۇلتتىق رۋح دەڭگەيىن ارتتىرۋعا باعىتتالعان.
سونداي-اق, ۇلتتىق جوبا تۇڭعىش پرەزيدەنت – ەلباسى نۇرسۇلتان نازارباەۆتىڭ باعدارلامالىق ماقالاسىندا ايتىلعان «رۋحاني جاڭعىرۋ» قۇندىلىقتارىن ىلگەرىلەتۋدىڭ كەلەسى كەزەڭى بولىپ تابىلادى.