ۋكراينانىڭ وپپوزيتسيا جەتەكشىلەرى پرەزيدەنت ۆيكتور يانۋكوۆيچتىڭ ساياسي ارىپتەستىك تۋرالى ۇسىنىسىن قابىلداماعان سوڭ قارسىلىق تولقىنى ودان سايىن كوتەرىلىپ, ەلدىڭ شىعىسى مەن وڭتۇستىگىنە دە جەتتى. بۇل تۋرالى Azattyg.org حابارلادى.
ۆيكتور يانۋكوۆيچ وپپوزيتسيا جەتەكشىلەرىنە ۇكىمەت باسقارۋدى ۇسىنۋ ارقىلى ءوز جاقتاستارىن ازايتا تۇرا, قارسىلاستارىن جاقىنداتا الماعانعا ۇقسايدى.
زاپوروجە مەن دنەپروپەتروۆسكىدە مىڭداعان دەمونسترانت جەرگىلىكتى اكىمدىكتەر ماڭىنا ميتينگ وتكىزۋگە جينالدى. 27 قاڭتاردا ۋكراينانىڭ 10 وبلىسى وپپوزيتسيانىڭ باقىلاۋىنا ءوتتى. باتىس ايماقتاعى نارازىلىق بىلدىرۋشىلەر جەرگىلىكتى اكىمدىك عيماراتتارىن الدەقاشان باسىپ العان. يۆانو-فرانكوۆسك, تەرنوپول مەن حمەلنيتسكي قالالارىندا بيلىك دەمونسترانتتار قولىنا ءوتىپ, جاڭا اكىمشىلىكتەر ۆيكتور يانۋكوۆيچتىڭ ايماقتار پارتياسى مەن كوممۋنيستىك پارتيانىڭ سيمۆولدارىن پايدالانۋعا تىيىم سالاتىن قاۋلى دا قابىلداپ ۇلگەرگەن.ۋكراينا باسشىسى 22 قاڭتار كۇنى بەكىتىلگەن كەيبىر زاڭداردى جۇمسارتاتىنىن مالىمدەگەن ەدى. الايدا, ول ءسوزى دەمونسترانتتار مەن ميليتسيا قاقتىعىستارىنىڭ الدىن الا الماعان سياقتى. ەكى اي بويى تولاستاماي تۇرعان تولقۋ كەزىندە ءۇش ادام ءولدى. بىلتىرعى قاراشا ايىنىڭ سوڭىندا يانۋكوۆيچتىڭ ەۋروپا وداعىمەن سەرىكتەستىك قۇرۋ كەلىسىمىنە قول قويماي, رەسەيمەن تىعىز قارىم-قاتىناس ورناتۋ تۋرالى شەشىمى ۋكراينادا جاپپاي نارازىلىق تۋعىزعان.
دەمونسترانتتار جيىن وتكىزۋ ءتارتىبىن قاتايتۋ تۋرالى زاڭنىڭ يا تۇزەتىلگەنىن, يا كۇشىن جويىلعانىن كۇتۋدە. وپپوزيتسيا ودان بولەك مەرزىمىنەن بۇرىن پرەزيدەنت سايلاۋىن وتكىزۋدى, يۋليا تيموشەنكو باستاعان ساياسي تۇتقىنداردى بوساتۋدى تالاپ ەتەدى.بۇل ارالىقتا ۆيكتور يانۋكوۆيچتىڭ بىرنەشە جوعارى لاۋازىمدى شەنەۋنىكتەردى قىزمەتىنەن بوساتقانى تۋرالى حابار تارادى. 26 قاڭتاردا ۋكراينانىڭ قازىرگى قورعانىس ءمينيسترى پاۆەل لەبەدەۆ اسكەري كۇشتەردىڭ قاقتىعىستارعا ارالاسپايتىنىن مالىمدەدى.«ارميا ۋكراينانىڭ كونستيتۋتسياسى مەن زاڭدارىنا قاتاڭ باعىنادى», – دەدى ول يتار-تاسس اگەنتتىگىنە.
ۋكراينا پراۆوسلاۆيەلىك شىركەۋىنىڭباسشىسى پاتريارح فيلارەت پرەزيدەنت ۆيكتور يانۋكوۆيچتىڭ قولىنان مەملەكەتتىك ناگرادا الۋدان باس تارتىپ, «ادام ءولىپ جاتقان كەزدە ماراپاتتالۋ ەتيكاعا قايشى», – دەپ مالىمدەدى.Human Rights Watch ۇيىمى ميليتسيانىڭ قولىنان زارداپ شەككەندەر تۋرالى مالىمەتتەر تاراتتى. ونىڭ اقپارى بويىنشا, وتكەن اپتادا جۇزدەگەن دەمونسترانت پەن جۋرناليست تاياققا جىعىلعان. اۆتومايدان بەلسەندىلەر جەلىسىنىڭ جەتەكشىسى دميتري بۋلاتوۆ سياقتى ونداعان ادام جوعالعاندار ەسەبىندە تۇر.
ايدار ورىسباەۆ.
دەرەككوز: Azattyg.org
فوتو: Hvylya.org