اقمولا وبلىسىندا بەلگىسىز اۋرۋ بەلەڭ الدى

اقمولا وبلىسى ەسىل اۋدانىنىڭ كالاچي اۋىلىندا بەلگىسىز اۋرۋ جۇرتتى ابىگەرگە سالدى. بۇل تۋرالى «24 kz» حابارلادى.

سىرقاتقا شالدىققان اۋىل تۇرعىندارىنىڭ باستارى اينالىپ, كوزدەرى قاراۋىتىپ, سودان سوڭ مۇلدە ەستەن ايىرىلىپ ۇيىقتاپ قالادى ەكەن. وتكەن جىلدان بەرى بۇل اۋرۋ تۇرىمەن 33 ازامات جەرگىلىكتى دارىگەرلەرگە كورىنىپتى. وبلىستان ارنايى ماماندار كەلىپ, سۋدى, اۋانى, ازىق-ت ۇلىكتى تەكسەرىپ ءبارى قالىپتى دەگەن قورىتىندى جاساعان. «مۇنداي جاعداي وبلىس توڭىرەگىندە بۇرىن-سوڭدى بولعان ەمەس. جالپى, قازاقستان بويىنشا وسى سىرقات العاش رەت بەلەڭ الىپ وتىر دەسەم قاتەلەسپەسپىن. اۋىل تۇرعىندارى بەلگىسىز سىرقاتتىڭ سەبەبىن وڭىردە وسىدان 10 جىل بۇرىن جابىلىپ قالعان ۋران وندىرىسىمەن بايلانىستىرادى», - دەيدى ەسىل اۋداندىق اۋرۋحاناسىنىڭ باس دارىگەرى قابدىراشيت الماعامبەتوۆ.

ءبىر جىل بويى جەرگىلىكتى تۇرعىنداردىڭ دەنساۋلىعىن قاداعالاعان وبلىستىق دەنساۋلىق ساقتاۋ باسقارماسىنىڭ قىزمەتكەرلەرى بۇگىن تاعى كەزەكتى تەكسەرۋىن باستادى. ناۋقاستاردىڭ شاشى مەن تىرناعى استانا قالاسىنداعى زەرتحاناعا جىبەرىلدى. «ەكى تاۋلىك بەلگىسىز سىرقاتتىڭ سەبەبىن انىقتادىق. ول بويىنشا ديففۋزيالىق ىسىك بەلگىلەرى انىقتالىپ, توكسيكالىق ەنتسەفالوپا́تيا دەگەن قورىتىندىعا كەلدىك», - دەدى وبلىستىق بالالار اۋرۋحاناسىنىڭ نەۆروپوتولوگ دارىگەرى التىن قارتاباەۆا.

اۋرۋدىڭ اتى انىقتالعانىمەن, ونىڭ نەدەن بولاتىنى بەيمالىم كۇيىندە قالىپ وتىر. سوندىقتان مەديتسينا سالاسىنىڭ ماماندارى جان-جاقتى تەكسەرۋ جۇمىسىنا كىرىسىپ كەتتى...

ءامىرحان الماعانبەتوۆ.

دەرەككوز: «24 kz».

فوتو: «24 kz».