قارشاداي يۋليانى اكەسى ەۆگەني مەن اناسى سۆەتلانا التى جاسىندا وبلىس ورتالىعىنىڭ ىرگەسىندە جاڭادان اشىلعان فريستايل سەكتسياسىنا اپارا باستادى. اننا كورنىشەۆا دەگەن جاتتىقتىرۋشى يۋ.گالىشەۆانىڭ بويىنداعى وجەتتىكتى بىردەن بايقاپ, ونى ەرەكشە قامقورلىعىنا الدى.
دۇنيە دوداسىنىڭ ءدۇبىرى
ءححىى قىسقى وليمپيادانىڭ باستالۋىنا 21 كۇن قالدى
قارشاداي يۋليانى اكەسى ەۆگەني مەن اناسى سۆەتلانا التى جاسىندا وبلىس ورتالىعىنىڭ ىرگەسىندە جاڭادان اشىلعان فريستايل سەكتسياسىنا اپارا باستادى. اننا كورنىشەۆا دەگەن جاتتىقتىرۋشى يۋ.گالىشەۆانىڭ بويىنداعى وجەتتىكتى بىردەن بايقاپ, ونى ەرەكشە قامقورلىعىنا الدى.
موگۋلدىڭ قىر-سىرىن ۇيرەتىپ قانا قويماي, قىسقى سپورتتىڭ قىزىعى مەن شىجىعىنىڭ دا كەزدەسەتىنىن سان مارتە ەسكەرتتى. فريستايلدىڭ موگۋل ءتۇرىنىڭ ەرەكشەلىكتەرى مەن قيىندىقتارى از ەمەس. ارنايى جاسالعان كەدىر-بۇدىرلى ترامپليننەن سەكىرگەن كەزدە وكپەڭ وشكەندەي جاعىمسىز كۇيگە تۇسەتىنىڭ ءوز الدىنا ءبىر بولەك. امال بار ما, ەكى جىلدان كەيىن باپكەرى گەرمانياعا قونىس اۋداردى. الايدا, ول تالابى تاۋداي قىزدان ءۇمىت كۇتەتىنىن اتاپ ايتىپ, دارىندى بالالارعا ارنالعان سپورت مەكتەبىنىڭ جاتتىقتىرۋشىسى ۆيكتور لەمەشكوعا تاپسىرىپ كەتتى.
ۆ.لەمەشكو ءوز توبىنداعى قىزداردان تاباندىلىق پەن ىزدەنىستى, قايسارلىق پەن وجەتتىكتى تالاپ ەتتى. جوعارىدا اتاپ كورسەتىلگەنىندەي, فريستايلدىڭ باسقا قىسقى سپورت تۇرلەرىنە قاراعاندا قيىندىقتارى كوپ. سوندىقتان بولار, بۇل سپورت تۇرىنە ەكىنىڭ ءبىرى تاۋەكەل ەتىپ بارا بەرمەيدى. ال قازاق قىزدارى ءۇشىن بۇل ءتىپتى تاڭسىق, قۇپياسى مول سپورت ءتۇرى دەۋگە تۋرا كەلەدى. ءبىر سۇيسىنەرلىگى, قازاقتىڭ قاراقات كوز قىزى اياۋلىم امىرەنوۆا فريستايلدىڭ موگۋل ءتۇرى سەكتسياسىنا جازىلىپ, اينالاسى ءۇش جىلدا تولايىم تابىستارعا جەتىپ ۇلگەردى. ءتورت جاسىندا شاڭعىنى اياعىنا ىلگەن اياۋلىم ءى قىسقى جاستار ويىندارىندا, بىرنەشە حالىقارالىق جارىستاردا جەڭىمپاز اتاندى. «كۇنى ەرتەڭ امىرەنوۆا الەم چەمپيوناتىندا التىننان القا تاعىپ جاتسا, تاڭدانباڭىزدار», – دەيدى باپكەر ۆ.لەمەشكو.
– سوچي وليمپياداسىنا باراتىن فريستايلشىلار قازىر امەريكادا جاتتىعىپ, الەم كۋبوگى كەزەڭىندە بىلىكتىلىگىن ارتتىرىپ جاتىر. جاقىندا عانا اق وليمپياداعا باراتىن دميتري رەيحەرد, داريا رىبالوۆا مەن يۋليا گالىشەۆا كانادانىڭ كالگاري قالاسىندا وتكەن الەم كۋبوگىنىڭ كەزەڭىندە كۇش سىناسىپ, العاشقىسى 6-شى ورىن, كەيىنگىلەرى 13, 19-شى ورىنداردى قاناعات تۇتتى. فريستايلشىلار ءۇشىن ءدۇبىرلى دودانىڭ ەندى عانا باستالعانىن ەسكەرسەك, قالعان ءۇش اپتا ۋاقىتتا ولار تاجىريبەلەرىن شىڭداپ, وليمپيادادا جاقسى ناتيجە كورسەتەدى دەگەن ويدامىز. ءتىپتى ۇشەۋىنىڭ ءبىرى مەدالعا يە بولار دەگەن ءۇمىتىمىز بار, – دەپ قىسقى سپورت تۇرلەرى بويىنشا جوعارى سپورت مەكتەبىنىڭ ديرەكتورى, كەزىندە دزيۋدو مەن سامبو كۇرەسىنەن حالىقارالىق جانە رەسپۋبليكالىق جارىستاردا سان مارتە توپ جارعان سەرىك حالەلوۆ اعىنان جارىلدى.
يۋ.گالىشەۆانىڭ فريستايلداعى العاشقى تابىسى ون جىل بۇرىن باستالدى. ول نەبارى 11 جاستا بولاتىن. رەسەيدىڭ سانكت-پەتەربۋرگ قالاسىنداعى كورشى مەملەكەتتىڭ كۋبوگى جارىسىندا ايدى اسپانعا شىعارىپ, كۋبوكتى يەلەندى. ارادا ءۇش جىلدان كەيىن ەل بىرىنشىلىگىندە كۇمىسپەن كۇپتەلدى. 2008 جىلى ەۋروپانىڭ ەكى دۇركىن چەمپيونى اتانىپ, حالىقارالىق دارەجەدەگى سپورت شەبەرى نورماسىن ورىندادى. 2009 جىلى جاپونيادا وتكەن الەم چەمپيوناتىندا العاشقى ۇشتىكتەن كورىنە الماسا دا, باپكەرلەردىڭ نازارىنا ىلىكتى. جۇپتاسىپ ونەر كورسەتۋدە الەم چەمپيونى اتاندى. بۇل العاشقى ءىرى جەڭىسى بولاتىن. ۆانكۋۆەردە وتكەن اق وليمپيادادا موگۋلدە جاپ-جاقسى ونەر كورسەتىپ ەدى, امال بار ما, تورەشىلەر كوپە-كورىنەۋ قيانات جاساپ, 11-ءشى ورىنعا ءبىر-اق سىرعىتتى. سول ادىلەتسىزدىككە دە توزىمدىلىك تانىتتى. ەسەسىنە, 2010 جىلدىڭ جەلتوقسانىندا فرانتسيانىڭ مەريبەل قالاسىندا وتكەن الەم كۋبوگى كەزەڭىندە التىننان القا تاقتى.
الماتى مەن استانادا وتكەن قىسقى ازيا ويىندارىنا وسكەمەندىك ورەن تاس-ءتۇيىن ازىرلىكپەن كەلدى. باپكەرلەرى مەن اناسى, جەرلەستەرى, ءوزى ءبىلىم الىپ جۇرگەن الماتىداعى تۋريزم جانە سپورت اكادەمياسىنىڭ رەكتورى قايرات زاكاريانوۆ جانكۇيەر رەتىندە تاباعانداعى سپورت كەشەنىنە كەلىپ, يۋليانىڭ جەڭىسكە جەتۋىن تىلەدى. ول ەكى رەت جارىس جولىنا شىعىپ, قوس التىندى ومىراۋىنا تاققان كەزدە اناسى جىلاپ جىبەرىپ, بۇدان بىرنەشە جىل بۇرىن و دۇنيەلىك بولعان اكە اماناتىنىڭ ورىندالعانىنا شۇكىرشىلىك ەتتى. 2011 جىلدىڭ 7 قاڭتارىندا شىعىس قازاقستان وبلىسىنىڭ اكىمى بەردىبەك ساپارباەۆ باستاعان مىڭعا تارتا جانكۇيەر ازيادان جەڭىسپەن ورالعان شاڭعىشىلار, فريستايلشىلار مەن بياتلونشىلارعا ەرەكشە قۇرمەت كورسەتتى. ماسەلەن, ءوڭىر باسشىسى تەمىر تۇلپار مەن اقشالاي سىيلىقتار تابىس ەتتى.
قاڭتاردىڭ 20-سىنان كەيىن سوچي وليمپياداسىنا قاتىساتىن سپورتشىلار وسكەمەندە باس قوسپاق. ءداستۇر بويىنشا بەردىبەك ماشبەك ۇلى ولارعا اق جول مەن جەڭىس تىلەيتىن بولادى. بۇل جولى بۇكىل قازاقستاندىقتار شاڭعىشى الەكسەي پولتورانين, فريستايلشىلار دميتري رەيحەرد, داريا رىبالوۆا, يۋليا گالىشەۆا جانە باسقالاردان ءۇمىت كۇتەدى.
وڭداسىن ەلۋباي,
«ەگەمەن قازاقستان».
وسكەمەن.