قارجىلىق مونيتورينگ اگەنتتىگىنىڭ الماتى قالاسى بويىنشا دەپارتامەنتى «Boxy Wealth» قارجى پيراميداسىن قۇرۋ جانە وعان باسشىلىق ەتۋ دەرەگى بويىنشا تەرگەۋدى اياقتادى. تەرگەۋ ناتيجەسىندە كۇدىكتىنىڭ 1 جىل بويى الماتى اۋماعىندا اتالعان جوبانىڭ قۇرىلىمدىق بولىمشەسىن باسقارعانى انىقتالدى, دەپ جازادى Egemen.kz.
تەرگەۋ ماتەريالدارىنا سايكەس, جوبا «www.boxywealth.com» ينتەرنەت-رەسۋرسى جانە مەسسەندجەرلەر ارقىلى جۇمىس ىستەگەن. «كۇندەلىكتى تابىس» دەپ اتالاتىن چاتتا باستاپقىدا تۇتىنۋ تاۋارلارى تۋرالى اقپارات تاراتىلىپ, كەيىن ازاماتتاردى ينۆەستيتسيالىق پلاتفورماعا تارتۋ مەحانيزمى ىسكە قوسىلعان.
6,8 ملرد تەڭگە شىعىن كەلتىرگەن: اباي وبلىسىندا قارجى پيراميداسى اشكەرە بولدى
قاتىسۋشىلارعا ءارتۇرلى ينۆەستيتسيالىق پاكەتتەردىڭ ءبىرىن ساتىپ الۋ جانە كۇن سايىن جارنامالىق ماتەريالداردى قاراۋ ۇسىنىلعان. بۇل رەتتە پايدالانۋشىلارعا تاۋلىگىنە 5%-10% كولەمىندە تابىس ۋادە ەتىلگەن.
سونىمەن قاتار جۇيەدە جاڭا قاتىسۋشىلاردى تارتقانى ءۇشىن بونۋس بەرىلەتىن رەفەرالدىق سحەما جۇمىس ىستەگەن.
قاراجات قابىلداۋ جەكە تۇلعالاردىڭ (دروپپەرلەردىڭ) بانك شوتتارى ارقىلى جۇرگىزىلىپ, كەيىن P2P اۋدارىمدار ارقىلى كريپتوۆاليۋتاعا اينالدىرىلعان. مۇنداي سحەما قارجى اعىندارىن جاسىرۋعا باعىتتالعان.
سەنىم قالىپتاستىرۋ ماقساتىندا ۇيىمداستىرۋشىلار كومپانيانى تىركەپ, كەڭسە اشقان, جارنامالىق جۇمىستار جۇرگىزگەن, «تابىس» كورسەتكىشتەرىن كورسەتىپ, سالىمشىلارعا كەڭەس بەرۋدى جولعا قويعان.
تەرگەۋ قورىتىندىسىنا سايكەس, 78 جابىرلەنۋشى ازامات جالپى سوماسى 110 ملن تەڭگەدەن استام قاراجات سالعان.
10 ملرد تەڭگەدەن استام شىعىن: قارجى پيراميداسىن باسقارعان كۇدىكتى ەلگە ەكستراديتسيالاندى
كۇدىكتى قاماۋعا الىندى. سوت سانكتسياسىمەن ونىڭ الماتى قالاسىنداعى جەر ۋچاسكەسىنە تىيىم سالىندى.
قىلمىستىق ءىس سوتقا جولداندى. قىلمىستىق-پروتسەستىك كودەكستىڭ 201-بابىنا سايكەس, وزگە دەرەكتەر جاريا ەتۋگە جاتپايدى.
قارجىلىق مونيتورينگ اگەنتتىگى ازاماتتارعا ينۆەستيتسيالىق جوبالارعا قارجى سالماس بۇرىن ولاردىڭ زاڭدىلىعىن مۇقيات تەكسەرۋدى, ۇسىنىلاتىن اقپاراتتىڭ شىنايىلىعىن باعالاۋدى جانە ۇيىمداردىڭ رەسمي تىركەلگەنىنە كوز جەتكىزۋدى ەسكەرتەدى.
«NBC TV» قارجى پيراميداسىنا قاتىستى قىلمىستىق ءىس سوتقا جولداندى