قازاقستان مۇسىلماندارى ءدىني باسقارماسى مەن ءدىن ىستەرى اگەنتتىگى ءوزارا ىنتىماقتاستىق تۋرالى كەلىسىمگە قول قويدى. باس ءمۇفتي ەرجان قاجى مالعاجى ۇلى ءدىن ىستەرى اگەنتتىگىنىڭ توراعاسى مارات ازىلحانوۆپەن كەزدەسىپ, تاراپتار ەلىمىزدەگى ءدىني تۇراقتىلىقتى ساقتاۋ, ۇلتارالىق تاتۋلىقتى ارتتىرۋ, كونفەسسيالار مەن ءدىني بىرلەستىكتەر اراسىنداعى كەلىسىمدى كۇشەيتۋ سىندى بىرقاتار ماسەلەلەردى ءسوز ەتتى.
قازاقستان مۇسىلماندارى ءدىني باسقارماسى مەن ءدىن ىستەرى اگەنتتىگى ءوزارا ىنتىماقتاستىق تۋرالى كەلىسىمگە قول قويدى. باس ءمۇفتي ەرجان قاجى مالعاجى ۇلى ءدىن ىستەرى اگەنتتىگىنىڭ توراعاسى مارات ازىلحانوۆپەن كەزدەسىپ, تاراپتار ەلىمىزدەگى ءدىني تۇراقتىلىقتى ساقتاۋ, ۇلتارالىق تاتۋلىقتى ارتتىرۋ, كونفەسسيالار مەن ءدىني بىرلەستىكتەر اراسىنداعى كەلىسىمدى كۇشەيتۋ سىندى بىرقاتار ماسەلەلەردى ءسوز ەتتى.
قمدب عۇلامالار كەڭەسى مەن تورالقا مۇشەلەرى, وبلىستىڭ باس يمامدارى قاتىسقان باسقوسۋدا باس ءمۇفتي ورتاق كەلىسىمنىڭ ءمانى مەن ماڭىزىنا ءھام ماقساتىنا توقتالدى.
«اللا تاعالا بارشامىزعا بەيبىت زاماندا ءومىر ءسۇرۋدى ءناسىپ ەتتى. قۇدايعا شۇكىر, تاۋەلسىزدىگىمىزدىڭ ارقاسىندا يسلام ءدىنىن ناسيحاتتاۋدىڭ, ادامدار اراسىندا بىرلىكتى نىعايتۋدىڭ مۇمكىندىگى تۋدى. ءبارىمىزدىڭ يلەگەنىمىز ءبىر تەرىنىڭ پۇشپاعى. ول – ەلدىڭ بىرلىگى, مۇسىلمانداردىڭ ىنتىماعى. دانىشپان اباي اتامىز: «ءبىرىڭدى قازاق, ءبىرىڭ دوس, كورمەسەڭ, ءىستىڭ ءبارى بوس» دەيدى. ولاي بولسا, ءوزارا بىرىگىپ, ەلىمىزدىڭ بولاشاعى ءۇشىن ەڭبەك ەتۋىمىز كەرەك. اللا تاعالا قۇراننىڭ ءالي-يمران سۇرەسىندە: «ءتۇپ-تۇگەل اللانىڭ جىبىنەن (دىنىنەن) بەكەم ۇستاڭدار دا, بولىنبەڭدەر», دەيدى. قازىر ءدىن مەن ءتىلدى ساقتاۋدى, مادەنيەتىمىز بەن ادەبيەتىمىزدى جاڭعىرتىپ, جاستاردى جاقسىلىققا شاقىرۋدى ويلايتىن زامان. وسى ماقساتتا قازاقستان مۇسىلماندارى ءدىني باسقارماسى مەن ءدىن ىستەرى اگەنتتىگى ءوزارا ىنتىماقتاستىق تۋرالى كەلىسىم قابىلدادى. ورتاق كەلىسىم ەلىمىزدەگى ءدىني تاتۋلىقتى نىعايتۋعا, ۇلتارالىق قارىم-قاتىناستى جانداندىرۋعا سەپتىگىن تيگىزبەك. سونىمەن قاتار, قوعامعا قاۋىپتى اعىمداردىڭ يدەولوگياسىنا توسقاۋىل قويۋعا, تاعى باسقا ءدىني ماسەلەلەردى شەشۋگە ىقپال ەتەتىنىنە سەنىم بىلدىرەمىن», – دەدى باس ءمۇفتي ەرجان قاجى مالعاجى ۇلى.
ءدىن ىستەرى اگەنتتىگىنىڭ توراعاسى مارات ءازىلحانوۆ ءدىني باسقارما مەن ءدىن ىستەرى اگەنتتىگى زاڭ اياسىندا, ءوز قۇزىرەتتەرى شەڭبەرىندە بىرلەسكەن جوبالاردى جۇزەگە اسىراتىنىن جەتكىزدى. «ماقساتىمىز – قوعامداعى تاتۋلىق پەن ءوزارا كەلىسىمدى كۇشەيتۋگە بىرلەسە ىقپال ەتۋ», – دەدى ول.
قوس توراعا ىنتىماقتاستىق مەموراندۋمىنا قول قويىپ, قۇجات الماستى. تاراپتار قابىلدانعان بۇل قۇجات اياسىندا كونفەرەنتسيالار, دوڭگەلەك ۇستەلدەر, فورۋمدار وتكىزىلەتىن بولادى.
قانات ەسكەندىر,
«ەگەمەن قازاقستان».
الماتى.