ەلوردادا جالعان پتر انىقتامالارىن ساتۋدىڭ ەكى فاكتىسى انىقتالدى, دەپ حابارلايدى Egemen.kz پوليتسيا دەپارتامەنتىنە سىلتەمە جاساپ.
«وسى وقيعاعا قاتىستى پوليتسيا قىزمەتكەرلەرى جەكە مەديتسينالىق ورتالىقتىڭ ديرەكتورىن ۇستادى. ول تەرىس ناتيجەلى پتر-تەست تاپسىرعانى تۋرالى جالعان انىقتاما ساتقان دەگەن كۇدىككە ىلىنگەن. ورتالىق باسشىسى زاڭسىز قىزمەت كورسەتكەنى ءۇشىن «كليەنتتەردەن» 6 مىڭ تەڭگەدەن الىپ وتىرعان. قازىرگى ۋاقىتتا پوليتسيا پتر انىقتامانى زاڭسىز العان ادامداردىڭ ناقتى سانىن انىقتاپ جاتىر. قاجەتتى ساراپتامالار تاعايىندالدى», دەلىنگەن حابارلامادا.
سونداي-اق, پوليتسيا ەلدەن تىس جەردە جۇرگەن قر ازاماتى 5500 تەڭگەگە تەرىس ناتيجەلى پتر انىقتاماسىن ەلەكتروندىق نۇسقادا دايىنداپ, ساتقانىن انىقتادى. انىقتامالاردى تەلەگرامم مەسسەندجەرى ارقىلى جىبەرىپ وتىرعان. ەل اۋماعىنا كەلگەننەن كەيىن كۇدىكتىگە قاتىستى قىلمىستىق زاڭناما شەڭبەرىندە شارالار قابىلداناتىن بولادى.
قازىرگى ۋاقىتتا اتالعان فاكتىلەر بويىنشا جالعان قۇجاتتاردى دايىنداۋ جانە وتكىزگەنى ءۇشىن قر قك 385-بابى بويىنشا قىلمىستىق ءىس قوزعالدى.
پوليتسيا قىزمەتكەرلەرى ەلوردا تۇرعىندارىنا جالعان انىقتامالار بەرۋ فاكتىلەرىن انىقتاۋ بويىنشا بىرقاتار مەديتسينالىق ورتالىقتارعا, ەمحانالارعا, ۆاكتسينا الۋ پۋنكتتەرىنە تەكسەرۋ جۇرگىزدى.