وڭتۇستىك قازاقستان وبلىسىنىڭ ورتالىعى – شىمكەنت قالاسىندا كوشەدە ساتىلىپ تۇرعان پەتاردانى ەرمەك قىلعان ۇلكەندى-كىشىلى 11 ادام 5 كۇننىڭ ىشىندە ءارتۇرلى جاراقاتپەن اۋرۋحاناعا ءتۇستى. بۇل تۋرالى «كتك» تەلەارناسى حابارلادى.
تەلەارنا ءتىلشىسىنىڭ ايتۋىنشا, قولىنان جاراقات العان 7 سىنىپ وقۋشىسى ۇلان التىنبەكتىڭ كوزىنە تاعى ءبىر وتا جاسالادى. وقىستان اتىلعان پەتاردا ونى ەكى كوزىنەن ايىرا جازداعان. دارىگەرلەر بۇل ءجاسوسپىرىم مۇگەدەك بولىپ قالۋى دا مۇمكىن دەپ وتىر.
قالا كوشەلەرىندە تارس-تارس ەتكەن پەتاردانىڭ تولاستايتىن ءتۇرى جوق. وسىعان بايلانىستى دارىگەرلەر زارداپ شەگەتىندەردىڭ سانى ارتۋى ىقتيمال دەگەن پىكىردى العا تارتادى.
باقىتبەك كەنەش ۇلى.
دەرەككوز: «كتك» تەلەارناسى
فوتو: «كتك» تەلەارناسى.