تۇرىك ۇكىمەتى 350-گە تارتا پوليتسيا قىزمەتكەرلەرىن جۇمىستان شىعارۋ تۋرالى وكىم ەتكەن. ۆۆس اقپارات اگەنتتىگىنىڭ حابارلاۋىنشا, جۇمىستان بوساتىلعان پوليتسەيلەردىڭ ءبارى دە ەل استاناسى انكارادا جۇمىس ىستەگەن.
ولاردى جۇمىستان بوساتۋ تۋرالى شەشىم وتكەن جىلدىڭ جەلتوقسانىندا تۋىنداعان سىبايلاس جەمقورلىققا قاتىستى داۋ-جانجالعا بايلانىستى قابىلدانىپ وتىر. وسىعان دەيىن حابارلانعانىنداي, وتكەن ايدا تۇركيادا سىبايلاس جەمقورلىققا قارسى رەيد شەڭبەرىندە پوليتسيا ەلۋدەن استام ادامدى قاماۋعا العان بولاتىن, ولاردىڭ ىشىندە 3 ءمينيستردىڭ بالاسى مەن بىرنەشە ءىرى كاسىپكەر بار. بۇل وقيعا ەلدە ۇلكەن سىلكىنىس تۋعىزىپ وتىر.
تۇرىك ۇكىمەتى 350-گە تارتا پوليتسيا قىزمەتكەرلەرىن جۇمىستان شىعارۋ تۋرالى وكىم ەتكەن. ۆۆس اقپارات اگەنتتىگىنىڭ حابارلاۋىنشا, جۇمىستان بوساتىلعان پوليتسەيلەردىڭ ءبارى دە ەل استاناسى انكارادا جۇمىس ىستەگەن.
ولاردى جۇمىستان بوساتۋ تۋرالى شەشىم وتكەن جىلدىڭ جەلتوقسانىندا تۋىنداعان سىبايلاس جەمقورلىققا قاتىستى داۋ-جانجالعا بايلانىستى قابىلدانىپ وتىر. وسىعان دەيىن حابارلانعانىنداي, وتكەن ايدا تۇركيادا سىبايلاس جەمقورلىققا قارسى رەيد شەڭبەرىندە پوليتسيا ەلۋدەن استام ادامدى قاماۋعا العان بولاتىن, ولاردىڭ ىشىندە 3 ءمينيستردىڭ بالاسى مەن بىرنەشە ءىرى كاسىپكەر بار. بۇل وقيعا ەلدە ۇلكەن سىلكىنىس تۋعىزىپ وتىر.
زىمىران سىناقتان ءساتتى ءوتتى
ءۇندى اسكەريلەرى سەيسەنبى كۇنى يادرولىق وقتۇمسىق الىپ جۇرۋگە قابىلەتتى «پريتحۆي-2» وپەراتيۆتى-تاكتيكالىق زىمىراندى كەزەكتى رەت تابىستى سىناقتان وتكىزدى. The Times of India گازەتىنىڭ اقپاراتىنا قاراعاندا, سىناق ەلدىڭ شىعىسىنداعى وريسسا شتاتىندا ورنالاسقان «چانديپۋر» پوليگونىندا جۇزەگە اسىرىلعان.
«پريتحۆي-2» بالليستيكالىق زىمىرانى تولىقتاي ءۇندىستاندا ازىرلەنىپ, جاسالعان. ونىڭ ۇشۋ ۇزاقتىعى 350 شاقىرىمدى قۇراسا, پايدالى سالماق كولەمى شامامەن 500-1000 كيلوگرامدى قۇرايدى ەكەن. ۇندىستاندىق اسكەريلەر «پريتحۆي-2» زىمىرانىن سوڭعى رەت 2013 جىلدىڭ جەلتوقسان ايىندا سىناقتان وتكىزگەن بولاتىن.
فەدەرالدىق رەزەرۆ جۇيەسىن ايەل باسقارادى
اقش سەناتى پرەزيدەنت باراك وباما ۇسىنعان دجانەت يەللەننىڭ كانديداتۋراسىن فەدەرالدىق رەزەرۆتىك جۇيە باسشىسى لاۋازىمىنا بەكىتتى. ول بۇل قىزمەتتە بەن بەرنانكەنى الماستىراتىن بولادى. سوڭعى ەكى جىل بويى دج.يەللەن ونىڭ ورىنباسارى بولىپ ىستەگەن بولاتىن.
ب.بەرنانكە سياقتى دج.يەللەن دە ەكونوميستەر اراسىندا «كوگەرشىن» دەگەن اتاققا يە. بۇل ولار ءۇشىن ينفلياتسيامەن كۇرەس ەمەس, جاڭا جۇمىس ورىندارىن قۇرۋ باسىمدىققا يە بولىپ تابىلادى دەگەندى بىلدىرەدى. ول وتكەن جىلدىڭ قىركۇيەگىندە بۇرىنعى قارجى ءمينيسترى لارري ساممەرس وپپوزيتسيا قارسىلىعىنا تاپ بولۋ سالدارىنان ءوز كانديداتۋراسىن قايتىپ الۋىنا بايلانىستى فرج باسشىسى لاۋازىمىنا بىردەن-ءبىر كانديدات رەتىندە قالعان بولاتىن.
شاڭعىدان قۇلاپ, جاراقات الدى
گەرمانيا كانتسلەرى انگەلا مەركەل شۆەيتساريادا شاڭعىمەن سەرۋەندەپ ءجۇرىپ جامباسىنان جاراقات العان. بۇل تۋرالى ونىڭ ءباسپاسوز حاتشىسى جۋرناليستەرگە دۇيسەنبى كۇنى حابارلاعان كورىنەدى.
ونىڭ ايتۋىنشا, مەركەل شاڭعىمەن وتە جوعارى جىلدامدىقتا سىرعاناعان. Bloomberg اگەنتتىگىنىڭ حابارلاۋىنا قاراعاندا, گەرمانيا ۇكىمەتىنىڭ باسشىسى دارىگەرلەردىڭ وعان توسەك رەجىمىن ساقتاۋدى تالاپ ەتۋىنە بايلانىستى تاياۋداعى ءۇش اپتادا بەلگىلەنگەن كەزدەسۋلەرىن كەيىنگە قالدىراتىن بولادى. بۇعان دەيىن مەركەل 8 قاڭتاردا ۆارشاۆاعا بارادى دەپ بەلگىلەنگەن بولاتىن. سونىمەن بىرگە, كانتسلەردىڭ ءوز ۇيىندە وتىرىپ جۇمىس ىستەي بەرەتىنى جانە سارسەنبى كۇنى مينيسترلەر كابينەتىنىڭ كەزدەسۋىنە قاتىساتىنى دا بەلگىلى بولىپ وتىر.
پرەمەر پرەزيدەنت سايلاۋىنا قاتىسپايدى
ليتۆانىڭ پرەمەر-ءمينيسترى, سوتسيال-دەموكراتتار ليدەرى الگيرداس بۋتكياۆيچيۋس ارىپتەستەرىنىڭ سايلاۋعا تۇسۋگە شاقىرۋىنا قاراماستان, ءوزىنىڭ پرەزيدەنت سايلاۋىنا قاتىسپايتىنىن بەرىك تۇردە مالىمدەدى.
سوتسيال-دەموكراتيالىق پارتيانىڭ پرەزيديۋمى پرەزيدەنت سايلاۋىنا ەۋروپارلامەنت مۇشەسى زيگمانتاس ءبالچيتيستىڭ كانديداتۋراسىن قولايلاپ وتىر. دەگەنمەن, ونىڭ كانديداتۋراسى ازىرگە رەسمي تۇردە ۇسىنىلعان جوق. ال پارتيا توراعاسىنىڭ ورىنباسارى, دەنساۋلىق ساقتاۋ ءمينيسترى ۆيتيانيس پوۆيلاس اندريۋكايتيس دۇيسەنبى كۇنى ءوزىنىڭ پرەمەردى پرەزيدەنت سايلاۋىنا تۇسۋگە ۇگىتتەپ كورۋگە تىرىساتىنىن اتاپ وتكەن.
اتاقتى مەدياماگنات ومىردەن وزدى
ازياداعى ەڭ ىقپالدى مەدياماگناتتاردىڭ ءبىرى, Shaw Organisation مەدياكورپوراتسياسىنىڭ نەگىزىن قالاۋشى ران ران شوۋ (شاو جەنلەن) 107 جاسىندا گونكونگتا قايتىس بولدى, دەپ حابارلادى بريتاندىق ۆۆس كورپوراتسياسى.
ءوزىنىڭ باۋىرىمەن بىرگە ران ران شوۋ كۋنگ-فۋ تۋرالى فيلمدەردى كەڭىنەن تاراتۋمەن اينالىسقان Shaw Brothers Studios كينوكومپانياسىنىڭ نەگىزىن قالاعان بولاتىن. وندا سول سياقتى بىرقاتار كەڭ تانىمال تەلەشوۋلار مەن مىڭعا تارتا كينوفيلمدەر دە جاسالدى. ولاردىڭ اراسىندا بىرقاتار بەدەلدى سىيلىقتارعا يە بولعان «اتىشۋلى كۇڭ» اتتى تاريحي دراما دا بار. مەدياماگنات سول سياقتى قايىرىمدىلىقپەن دە بەلسەندى اينالىسىپ, مەديتسينا جانە ءبىلىم بەرۋ مەكەمەلەرىنە قارجى اۋدارىپ تۇردى.
بريتان پرەمەرى اتىنا سىن ايتتى
پولشا سىرتقى ىستەر ءمينيسترى رادوسلاۆ سيكورسكي دۇيسەنبى كۇنى ۇلىبريتانيادا جۇمىس ىستەيتىن, ال وتباسىلارى پولشادا تۇراتىن پولياكتارعا وتباسىلىق جاردەماقىلار تولەۋگە قارسىلىق بىلدىرگەن بريتان پرەمەرى دەۆيد كەمەروننىڭ اتىنا سىن ايتتى.
ەگەر ۇلىبريتانيا ءبىزدىڭ سالىق تولەۋشىلەرىمىزدى قابىلدايتىن بولسا, وندا ول ولارعا ءتيىستى جاردەماقىنى دا تولەۋگە ءتيىس ەمەس پە؟ ولاي بولسا نەلىكتەن پولشالىق سالىق تولەۋشىلەر بريتاندىق سالىق تولەۋشىلەردىڭ بالالارىن سۋبسيديالاۋعا ءتيىس. پولشا سىرتقى ىستەر ءمينيسترى وسى سوزدەردى اعىلشىن تىلىندە ءوزىنىڭ تۆيتتەرىندە جازعان كورىنەدى. ال ول كوپتەگەن ەۋروپالىق بۇقارالىق اقپارات قۇرالدارىنا تاراپ كەتكەن.
ينتەرنەت ماتەريالدارى نەگىزىندە ازىرلەندى.