الماتىداعى «اتاجۇرت» باسپاسىنان بەلگىلى جازۋشى-جۋرناليست, ديپلومات, فيلولوگيا عىلىمدارىنىڭ دوكتورى, قازاقستان جۋرناليستەر اكادەمياسى «التىن جۇلدىز» ديپلومىنىڭ يەگەرى سەرىكقالي بايمەنشەنىڭ «دانەكەر» دەپ اتالاتىن ەسسە-اڭگىمەلەر جيناعى جارىق كوردى.
الماتىداعى «اتاجۇرت» باسپاسىنان بەلگىلى جازۋشى-جۋرناليست, ديپلومات, فيلولوگيا عىلىمدارىنىڭ دوكتورى, قازاقستان جۋرناليستەر اكادەمياسى «التىن جۇلدىز» ديپلومىنىڭ يەگەرى سەرىكقالي بايمەنشەنىڭ «دانەكەر» دەپ اتالاتىن ەسسە-اڭگىمەلەر جيناعى جارىق كوردى.
اتى ايتىپ تۇرعانداي, بۇل كىتاپ – الىستاعى اعايىندى اتاجۇرتپەن جالعايتىن دانەكەرلىكتى دارىپتەۋىمەن, يگى ماقساتقا ءىزاشار بولاتىن ادامي ىزگىلىكتى ىزەتتەۋىمەن ەرەكشەلەنەدى. سونداي-اق, قازاق ۇلتىن ۇلىقتايتىن اتاۋلار مەن بەلگىلەرگە, ارماندا وتكەن ارىستاردىڭ ءومىر-عۇمىرىنا قاتىستى تىڭ دەرەكتەر بايىپتى باياندالادى. كىتاپتاعى كەز كەلگەن تۋىندى تاريح-تانىم-تاعىلىم-تاربيە تىزبەگى اياسىندا, سول ماقساتقا ساي تۇزىلگەن.
قالامگەر سەرىكقالي بايمەنشەنىڭ ەسىمى رەسەي قازاقتارىنا جاقسى تانىس. ول – قازاقستاننىڭ رەسەيدەگى ەلشىلىگىندە ەڭبەك ەتكەن جىلدارى ەكى ەل اراسىنداعى مادەني-گۋمانيتارلىق بايلانىستاردى نىعايتۋعا رەسەي جەرىندە تۇرىپ جاتقان وتانداستارىنىڭ ابزال ىستەرىن ناسيحاتتاپ, اتامەكەنگە جەتكىزۋگە كوپ ۇلەس قوسقان ازامات. ول, اسىرەسە, ەل گازەتى «ەگەمەن قازاقستاننىڭ» رەسەيدەگى ءتىلشىسى مىندەتىن قوعامدىق نەگىزدە قوسا اتقارا ءجۇرىپ, گازەتتە كوپتەگەن كوكەيكەستى شىعارمالارىن جاريالادى.
اۆتور رەسپۋبليكالىق باسىلىمداردا جارىق كورگەن وسى ەڭبەكتەرىنىڭ بىرقاتارىن «دانەكەر» كىتابىنا ەنگىزىپتى. ولاردىڭ ىشىندە كىشىارالداعى كەسەنە», «جاقسىنى ىزدەۋ», «ءاي, قاپ!», «قۇباش, پۋشكين, شاكارىم», «تۇرار تۇرعان ءۇي», «قۇپيا قۇلپىتاس», «بەسەۋدىڭ بەسىگى», «قيىرداعى قازاق جۇرتى», «ماسكەۋلىك» مومىش ۇلى», «جەڭىسكەر جىر», «اقجۇرەك», «الماتى» ستانساسى», «تەڭبىل دوپ», «سەرپىن», «اسىلزادا», «سوڭعى سۇحبات», «پۋتين جولى» سياقتى اڭگىمە-ەسسەلەرى بار. اۆتور بۇل ەڭبەكتەرىندە رەسەي ومىرىنە, وسى ەلدەگى قانداس باۋىرلارعا, قازاقستاندىق اتاۋلارعا قاتىستى كوپتەگەن كەلەلى تاقىرىپتاردى قوزعايدى.
رەسەيدەگى قانداستار ماسكەۋدەگى قازاق قوعامدىق ۇيىمدارىنىڭ نەگىزىن قالاۋشىلاردىڭ ءبىرى, ءوزىنىڭ سانالى عۇمىرىن «قازاعىم», «ۇلتىم», «قازاقستانىم!» دەپ وتكىزگەن قادىرلى اقساقال قايدار قۇماربەكوۆتى جاقسى بىلەدى. «دانەكەر» كىتابىنان سول اسىل ازامات تۋرالى «اقجۇرەك» دەگەن اڭگىمەنى وقىپ, قاتتى اسەرگە بولەندىك. قايدار اعا ءوزى سىرقاتتانىپ جاتقاندا «اتامەكەننەن الىستا جۇرگەن قانداس باۋىرلارىڭ تۋرالى, قازاعىمنىڭ ىستەرى جايىندا ءالى دە جازا بەر, جازاتىن نارسە از ەمەس …», دەپ كىتاپ اۆتورىنا ءوتىنىش-تىلەگىن جولداعان ەكەن. وسى ەسسە-اڭگىمەسىن اۆتور بىلايشا تۇيىندەپتى: «بەۋ, دۇنيە-اي, شىن اسىل, جايدارى اعا, جانى – جاز, اقجۇرەكتى قايران اعا; شىقپايسىڭ ەشقاشان دا ويدان, اعا; وزىڭدەي تابىلادى قايدان, اعا؟!. ءجۇرۋشى ەڭ ءوز ورتاڭدا جايناپ, اعا; باسقان ءىزىڭ وشپەستەي جاتىر ءالى; ورامدا تازا توعان سايراپ, اعا...». قالامگەردىڭ جاقسىنى وسىلاي جوقتاۋى جۇرەگىمىزدى ەلجىرەتپەي قويمادى.
اتالعان كىتاپتى دۇنيەجۇزى قازاقتارى قاۋىمداستىعىنىڭ «اتاجۇرت» باسپا ورتالىعى 2000 دانا تارالىممەن شىعارعان ەكەن. بۇل از تارالىم قازاقستاننىڭ وزىنەن دە اۋىسپايتىن شىعار, سول سەبەپتى, قاۋىمداستىق باسشىلىعىنان وسى كىتاپتىڭ رەسەي قازاقتارىنا دا جەتۋىن ويلاستىرۋدى سۇرايمىز. سونىمەن بىرگە, دۇنيەجۇزى قازاقتارى قاۋىمداستىعى قازاقستان ەلشىلىگىمەن بىرلەسىپ ماسكەۋدە رەسەي قازاقتارى ءۇشىن وسى كىتاپتىڭ ارنايى تانىستىرىلىمىن ۇيىمداستىرسا, قۇبا-قۇپ بولار ەدى.
ورىنباسار قۋاندىقوۆ,
ماسكەۋ وڭىرلىك «قازاق ءتىلى» قوعامى توراعاسىنىڭ ورىنباسارى, پەداگوگيكا عىلىمدارىنىڭ كانديداتى.