بولات اعا جايساڭباەۆتى كورگەن سايىن وسى قارتتىقتىڭ ءوزى سالىستىرمالى ۇعىمداي كورىنەدى. ونىڭ قۇرداستارىنا قارايسىڭ دا, بۇلار ونىمەن جاستى دەۋگە كوڭىل قيمايدى. ءتىپتى, ولار ءبىر-بىرىنە قالجىڭ ايتىپ جاتقاندا باسقالاردىڭ بوكەڭە قاراي ايتقاندارى ارتىقتاۋ كورىنەتىنى دە بار. بىراق شىندىقتى مويىنداماسقا لاجىڭ جوق. بوكەڭ دە 80 دەيتىن جاسقا كەلىپ قالدى. كەيبىر قۇرداستارىنداي مۇجىلمەي, سەرگەك كوڭىلمەن, جايدارى جۇزىمەن كەلدى.
بولات اعا جايساڭباەۆتى كورگەن سايىن وسى قارتتىقتىڭ ءوزى سالىستىرمالى ۇعىمداي كورىنەدى. ونىڭ قۇرداستارىنا قارايسىڭ دا, بۇلار ونىمەن جاستى دەۋگە كوڭىل قيمايدى. ءتىپتى, ولار ءبىر-بىرىنە قالجىڭ ايتىپ جاتقاندا باسقالاردىڭ بوكەڭە قاراي ايتقاندارى ارتىقتاۋ كورىنەتىنى دە بار. بىراق شىندىقتى مويىنداماسقا لاجىڭ جوق. بوكەڭ دە 80 دەيتىن جاسقا كەلىپ قالدى. كەيبىر قۇرداستارىنداي مۇجىلمەي, سەرگەك كوڭىلمەن, جايدارى جۇزىمەن كەلدى.
بۇل كىسىنى وسىلاي كورسەتەتىنى, ءسىرا, ونىڭ بويىنا بىتكەن ەڭبەكقورلىعى, قاراپايىمدىلىعى, ادالدىعى, تازالىعى ما دەرسىڭ. وسىدان قىرىق جىلداي بۇرىن ونى العاش كورگەنىمىزدە بوكەڭ وسىنداي سياقتى ەدى. سوندا دا وزىنەن كوپ كىشى ەڭبەكتەس ارىپتەستەرىنە ءوزىنىڭ ۇلكەندىگىن بۇلدامايتىن. باسقاعا يتەرە سالۋ جوق, جۇمىستى جاستارمەن جارىسىپ تىندىرىپ جاتار ەدى. سونىسى ءۇشىن كەيىنگى بۋىن بولات اعاسىن جاقسى كورەتىن.
ال بوكەڭدەردىڭ جۇمىسى, قازىرگىدەي ەمەس, سوندا قيىن ەدى. گازەتتى باسىپ شىعارۋ تاڭعا دەيىن سوزىلاتىن. ەڭ سوڭعى نۇكتەنى قوياتىن سول گازەت شىعارۋشى, بوكەڭدەر. «سوتسياليستىك قازاقستان» دەيتىن ەلدىڭ باس گازەتى كۇن سايىن شىعادى. كەزەگىڭ كۇنارا بولعانمەن, اركەز تاڭعا دەيىن ءجۇرۋ جاي قالجىراتىپ قانا قويماي, جۇيكەگە اۋىر تيەدى. كوپ ادام سونى كوتەرە المايدى. ءتىلى شىعادى, سول ءتىل باسقاعا تيەدى. مىنە, سول جۇيكەنىڭ جۇقارۋى بوكەڭدە بولا قويمايتىن. ونى وزگەلەردەن ەرەكشەلەيتىن دە سول.
كوبىنە ءبىز باسشىعا, اتاعى بار تۇلعالارعا كوبىرەك قۇرمەت كورسەتىپ جاتامىز. ونى دا ءجون دەلىك. باسشى لاۋازىمعا, اتاققا جەتۋ دە جايدان-جاي كەلمەيدى, ونىڭ جولىندا تالاي توگىلگەن تەر, قاجىرلى ەڭبەك جاتىر. بىراق كەيبىر ادامداردان سول لاۋازىمدى, اتاقتى الىپ تاستاساڭ, ار جاعىندا تۇك تە قالمايدى. ال بولات اعامىزدا لاۋازىم دا جوق, اتاق تا جوق, بىراق وعان دەگەن جۇرتتىڭ قۇرمەتى ءبىر پەندەنىڭ باسىنا جەتەرلىك. قاشاندا بولسىن بىرسىدىرعى ازاماتتىق قالپى. بىرەۋدەن قۇرمەت تە سۇرامايدى, جاسىم ۇلكەن دەپ تورگە دە ۇمتىلمايدى. ال ۇلكەننەن دە, كىشىدەن دە وعان دەگەن قۇرمەت ارقاشان دايىن.
ءار ادامنىڭ قادىرى الدىمەن ءوز ۇجىمىندا اڭعارىلادى عوي. ۇزاق جىل «ەگەمەن قازاقستاندا» گازەت شىعارۋشى بولىپ قىزمەت اتقارعاندا بولات جايساڭباەۆ رەداكتسيا ۇجىمىنىڭ ەڭ سىيلى ادامىنىڭ ءبىرى بولدى. وعان تياناقتى دا تىندىرىمدى ەڭبەگىمەن قاتار, بىرەۋگە قالايدا جاقسىلىق جاساسام دەگەن پەيىلدە جۇرەتىن جاعىمدى مىنەزى سەبەپشى. جۇرتتىڭ بارىنە جاعۋ قيىن دەيمىز عوي, ال بوكەڭ جاعاتىن. ءتىپتى, جۇمىس جايىنا وراي بىرەۋگە داۋىس كوتەرسە دە سول ادامنىڭ ءوزى ونى سىيلاۋدان شەكتەلمەس ەدى. جۇمىس بابى دەيتىنىمىز بار, سوعان وراي بولات اعامىز رەداكتسيانىڭ بارلىق قىزمەتكەرىمەن بايلانىستا ءجۇردى. ءتۇس شايىسقان ەشقايسىسى جوق. ءتىپتى, رەداكتسيا باسشىلارىنىڭ ىشىندەگى جۇمىسقا دەگەن تالاپشىلىقتارى قاتقىلداۋ بالعابەك قىدىربەك ۇلى, ەرجۇمان سمايىل دا بوكەڭە كەلگەندە جۇمساقتاۋ ەدى. ال قاسىندا كوبىرەك بولاتىن كوررەكتورلار قاۋىمى, جالپى رەداكتسيانىڭ كىشى بۋىن قىزمەتكەرلەرى ونى اكەسىندەي, اقىلشى اعاسىنداي كورەر ەدى. كەيبىر قىزمەتى باسقا جاققا اۋىسقان ءابدىمۇتال الىبەكوۆ, تىلەكقابىل بورانعاليەۆ, باقتيار ەرىمبەتوۆ سياقتى ىنىلەرىنىڭ اركەز ونى ىزدەپ, سۇراستىرىپ جۇرەتىنى دە بار.
بوكەڭ ەڭبەك دەمالىسىنا شىققاننان كەيىن دە ءوز ۇجىمىنان قول ۇزگەن ەمەس. ەڭبەك دەمالىسى دەگەندە, بولات اعامىز وعان ەكى رەت شىققانداي بولعان. سول كەزدەگى ءتارتىپ بويىنشا زەينەتكە شىققان ادام جۇمىس ىستەسە, زەينەتاقى تولەنبەيتىن بولعان سوڭ, امالسىز كەتكەن ەدى. اسا بىلگىر قىزمەتكەرىنەن رەداكتسيا دا قيماي قوشتاسقان. كەيىنىرەك ءتارتىپ وزگەرگەن سوڭ, ول ءوزىنىڭ كوپ جىل جۇمىس ىستەگەن ۇجىمىنا قايتا ورالىپ, قايتا ءبىر جاساعانداي بولعان. سودان كەيىن رەداكتسيا استاناعا كوشكەنشە جاستارعا اعا, اقىلشى بولىپ ءجۇردى.
– 80 دەگەن دە از جاس ەمەس-اۋ, ءبىزدى ەڭبەك شىڭدادى عوي, – دەيدى بولات اقساقال. – مەن ءوز ۇجىمىمنان ەشقاشان دا قول ۇزگەنىم جوق, «ەگەمەن قازاقستان» گازەتى كۇن سايىن ۇيىمە كەلگەندە ۇجىمىممەن ۇشىراسقانداي بولام. كەشەگى كۇندەر ەسكە تۇسەدى. كوڭىل جاسارىپ قالادى.
كوڭىلىڭىز قارتايماسىن, بوكە!
ماماديار جاقىپ,
«ەگەمەن قازاقستان».