گازەتىمىزدىڭ 2013 جىلعى 26 جەلتوقسان كۇنگى نومىرىندە جارىق كورگەن جۋرناليست جىلقىباي جاعىپار ۇلىنىڭ «پيك – كۇرمەۋى كۇردەلى كووپەراتيۆ» اتتى ماقالاسى جەر-جەردە ۇلكەن قوعامدىق پىكىرلەر تۋعىزۋدا. ماقالا جارىق كورگەن كۇننىڭ ەرتەڭىنە استانا قالاسىنىڭ اكىمى يمانعالي تاسماعامبەتوۆ ءوزىنىڭ باق وكىلدەرىمەن جىل اياعىندا وتەتىن ءداستۇرلى كەزدەسۋىندە بۇل وزەكتى ماسەلەگە ەرەكشە توقتالىپ, ىزىنشە قالالىق گازەتتەردىڭ وسى ماقالانى كوشىرىپ باسۋىنا مۇرىندىق بولدى. جاڭا جىلدىڭ العاشقى كۇندەرىندە-اق گازەت پوشتاسىنا اعىلىپ كەلىپ جاتقان وقىرمان حاتتارى دا كوپشىلىك مۇددەسىنە تىكەلەي قاتىستى بۇل وزەكتى جايدىڭ ەشكىمدى بەيجاي قالدىرماي وتىرعاندىعىن كورسەتەدى. تومەندە ءبىز قاراعاندى وبلىسىنان كەلگەن پىكىرلەردى جاريالاپ وتىرمىز.
گازەتىمىزدىڭ 2013 جىلعى 26 جەلتوقسان كۇنگى نومىرىندە جارىق كورگەن جۋرناليست جىلقىباي جاعىپار ۇلىنىڭ «پيك – كۇرمەۋى كۇردەلى كووپەراتيۆ» اتتى ماقالاسى جەر-جەردە ۇلكەن قوعامدىق پىكىرلەر تۋعىزۋدا. ماقالا جارىق كورگەن كۇننىڭ ەرتەڭىنە استانا قالاسىنىڭ اكىمى يمانعالي تاسماعامبەتوۆ ءوزىنىڭ باق وكىلدەرىمەن جىل اياعىندا وتەتىن ءداستۇرلى كەزدەسۋىندە بۇل وزەكتى ماسەلەگە ەرەكشە توقتالىپ, ىزىنشە قالالىق گازەتتەردىڭ وسى ماقالانى كوشىرىپ باسۋىنا مۇرىندىق بولدى. جاڭا جىلدىڭ العاشقى كۇندەرىندە-اق گازەت پوشتاسىنا اعىلىپ كەلىپ جاتقان وقىرمان حاتتارى دا كوپشىلىك مۇددەسىنە تىكەلەي قاتىستى بۇل وزەكتى جايدىڭ ەشكىمدى بەيجاي قالدىرماي وتىرعاندىعىن كورسەتەدى. تومەندە ءبىز قاراعاندى وبلىسىنان كەلگەن پىكىرلەردى جاريالاپ وتىرمىز.
تۇرعىن ءۇي-كوممۋنالدىق شارۋاشىلىق سالاسىنداعى شالاعاي قىزمەت قاراعاندىلىقتاردىڭ دا وكپە-رەنىشىن ءوسىرىپ جۇرگەن ماسەلە. «ەگەمەن قازاقستان» گازەتىنىڭ 2013 جىلعى 26 جەلتوقسانداعى سانىندا جارىق كورگەن گازەت ءتىلشىسى جىلقىباي جاعىپار ۇلىنىڭ «پيك – كۇرمەۋى كۇردەلى كووپەراتيۆ» اتتى ماقالاسى وسى سالاداعى قوردالانعان كەمشىلىكتەردىڭ بەتىن اشىپ, كوپشىلىكتىڭ كوڭىلىندەگى ماسەلەنى تاپ باستى. جاعدايدى رەتتەۋگە, قالپىندا ساقتاۋعا مىندەت ارتىپ, ۇلكەن جاۋاپكەرشىلىك جۇكتەۋشى پاتەر يەلەرى كووپەراتيۆتەرىنىڭ كوبى سەنىمدى اقتاي الماي-اق كەلە جاتقانى بارىمىزگە ايان. ولاردىڭ قۇرىلعانىنا ءبىراز جىل ءوتىپ, كۇش تە, تاجىريبە دە جيناقتالعانداي ۋاقىت بولسا دا ۇيلەر مەن اۋلالاردى تالاپقا ساي ۇستاۋعا دەگەن قۇلشىنىس جوق.
ءبىزدىڭ وسىناۋ كوشە بويىنداعى 32-ءشى ءۇيدى مەكەن ەتۋىمىزگە 30 جىلدان استى. بەرتىنگى جىلداردا «ارمان» اتتى پيك قاراۋىنا ەندى. باسىندا ونى قۇرۋشىلاردىڭ ۋادە-ۋاجىنەن ۇلكەن ءۇمىت كۇتىلگەن ەدى. ۋاقىت وتە كەلە ءبارى الدارقاتپا ءسوز بولىپ شىقتى. بەسىنشى قاباتتاعى پاتەرىمىزدىڭ توبەسىنەن قار, جاڭبىر سۋى سىزدىقتايتىندىقتان بىتەۋگە بىرنەشە جىل بويى ءوتىنىش جاساپ باققانىمىزبەن ورىندالمادى. اقىرى امال نە, كورشىلەر اقشا قوسىپ, جوندەتۋگە ءماجبۇر بولدىق. پاتەرلەرىمىزدىڭ قىستا سالقىن بولۋىنا بايلانىستى جىلۋ جەلىسىن جاڭارتۋ ءۇشىن تالاي ارىز-شاعىمىمىزعا دا قۇلاق اسپادى. تاعى قاراجات جيناپ, سىرتتان جوندەۋشىلەر شاقىرۋعا تۋرا كەلدى.
كىرەبەرىستەر 30 جىلدان بەرى اكتەلمەگەن, سىلاعى ابدەن تۇسكەن قالپىندا تۇر. جەرتولە ءىشى كوپ رەتتە تىزەدەن سۋعا قالقىپ قالادى. جاز جاعىمسىز ءيىس قولقا اتادى. قايسىسىن ايتا بەرەيىك, «ارمان» پيك-ءى تاراپىنان ءۇيىمىزدىڭ جاي-كۇيىنە قارايلاسۋعا ەشقانداي بەيىل جوقتىعى قاجىتتى.
ال جارنا جيناۋعا كەلگەندە بۇل جاعىنا اسا ساق. اي سايىن اۋلا سىپىرۋشىعا ءاربىر پاتەردەن 600 تەڭگە تولەنۋىن ەسكەرتىپ, قۇلاق مازالاپ باعادى. ونى نە ءۇشىن, قانداي ىستەر ءۇشىن تالاپ ەتىلەتىندىگىن بىلمەيمىز. كۇردەلى جوندەۋلەردى بىلاي قويعاندا قۇبىردان سۋ اعىپ, شام سونە قالسا دا كومەك كورسەتىلمەيدى. تىسقارى بىرەۋگە جوندەتۋگە جالىناسىڭ تاعى.
«پيك – كۇرمەۋى كۇردەلى كووپەراتيۆ» اتتى ماقالانى وقىعاندا وسى جايلار كوز الدىما كەلدى. بۇعان كونە بەرۋگە بولا ما؟ بولمايدى دەپ ويلايمىز. بۇل جۇيەدە تارتىپتىلىك پەن جاۋاپكەرشىلىكتى كۇشەيتپەيىنشە جاعداي جاقسارمايتىندىعى انىق. قايتكەندە, وسى سالانى ساۋىقتىرار ءبىر امال كەرەك.
كۇنىم يلياسوۆا,
قاراعاندى قالاسىنىڭ تۇرعىنى.