ەلباسى نۇرسۇلتان نازارباەۆ الماتىداعى «ۋنيۆەرسيادا-2017» نىساندارىنىڭ دايىندىق بارىسىمەن جانە «كوكجايلاۋ» تاۋ شاڭعىسى كۋرورتىنىڭ جوباسىمەن تانىستى, دەپ حابارلادى پرەزيدەنتتىڭ ءباسپاسوز قىزمەتى.
ەلباسى نۇرسۇلتان نازارباەۆ الماتىداعى «ۋنيۆەرسيادا-2017» نىساندارىنىڭ دايىندىق بارىسىمەن جانە «كوكجايلاۋ» تاۋ شاڭعىسى كۋرورتىنىڭ جوباسىمەن تانىستى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسىنا بارلىق ماۋسىمعا ارنالعان «كوكجايلاۋ» تاۋ شاڭعىسى كۋرورتىن دامىتۋ تۇجىرىمداماسى تانىستىرىلدى.
نۇرسۇلتان نازارباەۆ بارشا قازاقستاندىقتاردى جاڭا جىلمەن تاعى دا قۇتتىقتاپ, كوزدەلگەن بارلىق جوسپارلاردىڭ تابىستى ىسكە اسىرىلۋىنا تىلەكتەستىگىن ءبىلدىردى. مەملەكەت باسشىسى الماتى وبلىسى جانە جالپى ەلىمىز ءۇشىن تۋريزم يندۋسترياسىنىڭ ماڭىزدىلىعىن اتاپ ءوتتى.
– بۇگىن مەن تاۋ ءتۋريزمىن دامىتۋ سالاسىنداعى الەمنىڭ كورنەكتى ماماندارىنىڭ ۇسىنىستارىن قاراپ شىقتىم. قازىردىڭ وزىندە شىمبۇلاق تاۋ شاڭعىسى كەشەنى مىڭداعان قازاقستاندىقتىڭ سالاماتتى ءومىر سالتىن ۇستانۋىنا مۇمكىندىك بەرەدى. جاڭا تاۋ شاڭعىسى كۋرورتىنىڭ جوباسى بۇكىل ەلىمىز ءۇشىن ماڭىزدى بولىپ سانالادى. الماتىدا جانە وبلىستا ءتۋريزمدى دامىتۋ 100 مىڭعا جۋىق قوسىمشا جۇمىس ورنىمەن قامتاماسىز ەتۋگە مۇمكىندىك بەرەدى. قالانىڭ قارقىندى دامۋى تاۋلارىمىزدى ۇتىمدى پايدالانۋعا بايلانىستى بولماق. ەۋروپانىڭ كوپتەگەن ەلىندە ادامدار كىشكەنتايىنان سپورتتىڭ قىسقى تۇرىمەن اينالىسادى. تاۋ شاڭعىسى كۋرورتىنا باراتىن تۋريست جىلى جانە تەڭىزى بار ەلدەرگە باراتىن تۋريستەرگە قاراعاندا 6 ەسە كوپ كىرىس اكەلەدى. ەگەر ءبىز وسى باعىتتاعى تۋريستىك سالانى دامىتاتىن بولساق, وندا مىڭداعان جۇمىس ورنىن اشىپ, كوپ مولشەردە, سونىڭ ىشىندە تابيعات قورعاۋ سالاسىنا ينۆەستيتسيانى كوبىرەك تارتاتىن بولامىز. تەك شىمبۇلاق كەشەنى عانا ەمەس, وبلىستاعى باسقا دا ورىندار پايدالانىلاتىن بولادى جانە بۇل رەتتە تابيعات ءوز كورىك-كەلبەتىن ساقتاپ قالا بەرەدى, – دەدى قازاقستان پرەزيدەنتى.
سونداي-اق, نۇرسۇلتان نازارباەۆ الماتى وبلىسىندا تاۋ شاڭعىسى كۋرورتى جوبالارىن ىسكە اسىرۋدىڭ ناتيجەسىندە ونىڭ قازاقستاندىقتار دەمالاتىن جانە بۇكىل الەم تۋريستەرى باراتىن تانىمال كوپشىلىك ورىنعا اينالاتىنىن اتاپ ءوتتى.
بۇعان قوسا, مەملەكەت باسشىسىنا مۇز ايدىنى مەن اتلەتيكالىق قالاشىقتىڭ ماكەتتەرىمەن قوسا, «ۋنيۆەرسيادا-2017» بولاشاق ينفراقۇرىلىمىنىڭ بىرقاتار جوبالىق نىساندارى تانىستىرىلدى.
ۋنيۆەرسياداعا دايىندىق جونىندە بايانداما جاساعان الماتى قالاسىنىڭ اكىمى احمەتجان ەسىموۆ ەكى نىساننىڭ – 3000 جانە 12 000 كورەرمەنگە ارنالعان مۇز ايدىنى قۇرىلىسىنىڭ تەحنيكالىق-ەكونوميكالىق نەگىزدەمەسىن ازىرلەۋ اياقتالعانى تۋرالى حاباردار ەتتى. بۇل ماقساتقا جەرگىلىكتى بيۋدجەتتەن 439,9 ملن. تەڭگە بولىنگەن. قازىرگى ۋاقىتتا جوبالىق-سمەتالىق قۇجاتتاما ازىرلەمەلەرى جاسالىپ جاتىر. ال 5 000 ورىنعا ارنالعان اتلەتيكالىق قالاشىقتىڭ تەحنيكالىق-ەكونوميكالىق نەگىزدەمەسىنىڭ جوباسى ازىرلەنۋ ۇستىندە.
الماتى قالاسىنىڭ اكىمى بۇل نىسانداردىڭ قۇرىلىس-مونتاج جۇمىسىنىڭ باستالۋى 2014 جىلدىڭ ءبىرىنشى توقسانىنا, ال اياقتالۋى 2016 جىلدىڭ شىلدەسىنە جوسپارلانعانىن اتاپ ءوتتى.
سۋرەتتى تۇسىرگەندەر
س.بوندارەنكو, ب.وتارباەۆ.