پورتۋگاليا بيلىگى اتى اڭىزعا اينالعان تەگى موزامبيكتىك پورتۋگال فۋتبولشىسى ەيسەبيونىڭ قايتىس بولۋىنا بايلانىستى ءۇش كۇندىك ازا جاريالادى. بۇل تۋرالى ريا «نوۆوستي» حابارلادى.
اتاقتى فۋتبولشى ەيسەبيو 5 قاڭتار, جەكسەنبى كۇنى تاڭەرتەڭ ليسسابوندا جۇرەك جەتىسپەۋشىلىگى سالدارىنان 72 جاسىندا ومىردەن ءوتتى. وسىعان بايلانىستى پورتۋگاليادا ءۇش كۇندىك ۇلتتىق ازا جاريالاندى.
ەيسەبيو ءوزىنىڭ 22 جىلدىق مانسابىنىڭ باسىم بولىگىن ليسسابوننىڭ «بەنفيكا» كلۋبىندا وتكىزدى. ول جالپى سانى 745 رەت الاڭعا شىعىپ, 733 گول سوقتى.
1966 جىلعى الەم چەمپيوناتىندا پورتۋگاليا كوپ رەتتە ەيسەبيونىڭ ارقاسىندا قولا مەدالگە قول جەتكىزدى. سول چەمپيوناتتا ول 9 گولمەن ۇزدىك مەرگەن اتاندى.
ەيسەبيو 1965 جىلى ەۋروپانىڭ ۇزدىك فۋتبولشىسى بولىپ تانىلدى. سول سياقتى حالىقارالىق فۋتبول فەدەراتسياسىنىڭ ساۋالداماسى بويىنشا افريكانىڭ XX عاسىرداعى ەڭ ۇزدىك فۋتبولشىسى دەگەن اتاققا دا قول جەتكىزدى.
دامير قوجامقۇل.
دەرەككوز: ريا نوۆوستي.