بيىل ەلوردا كۇنى قۇرمەتىنە ميلاننىڭ «لا سكالا» تەاترى كەلىپ ونەر كورسەتەدى دەپ كۇتىلۋدە
«استانا وپەرا» مەملەكەتتىك وپەرا جانە بالەت تەاترى الداعى ءۇش جىلدا اتقارىلاتىن ءىس-شارالاردى ناقتىلادى. سونىڭ ىشىندەگى ەڭ ءبىر ەلەۋلى وقيعا – اتى اڭىزعا اينالعان «لا سكالا» تەاترىنىڭ استانا كۇنىنە وراي گاسترولدىك ساپارمەن كەلىپ, 30-ماۋسىم مەن 4-شىلدە ارالىعىندا ەلوردالىق كورەرمەنگە «دون كيحوت» بالەت-سپەكتاكلىن ۇسىناتىندىعى. ايتۋلى ونەر ورداسى ءوزىنىڭ 2015-2016 جىلعا دەيىنگى ءىس-جوسپارىن الدىن-الا شەگەلەپ قويعانىنا قاراماستان, قازاقستانعا ونەر ساپارىمەن كەلۋگە بارىنشا نيەت ءبىلدىرىپ وتىر.
بيىل ەلوردا كۇنى قۇرمەتىنە ميلاننىڭ «لا سكالا» تەاترى كەلىپ ونەر كورسەتەدى دەپ كۇتىلۋدە
«استانا وپەرا» مەملەكەتتىك وپەرا جانە بالەت تەاترى الداعى ءۇش جىلدا اتقارىلاتىن ءىس-شارالاردى ناقتىلادى. سونىڭ ىشىندەگى ەڭ ءبىر ەلەۋلى وقيعا – اتى اڭىزعا اينالعان «لا سكالا» تەاترىنىڭ استانا كۇنىنە وراي گاسترولدىك ساپارمەن كەلىپ, 30-ماۋسىم مەن 4-شىلدە ارالىعىندا ەلوردالىق كورەرمەنگە «دون كيحوت» بالەت-سپەكتاكلىن ۇسىناتىندىعى. ايتۋلى ونەر ورداسى ءوزىنىڭ 2015-2016 جىلعا دەيىنگى ءىس-جوسپارىن الدىن-الا شەگەلەپ قويعانىنا قاراماستان, قازاقستانعا ونەر ساپارىمەن كەلۋگە بارىنشا نيەت ءبىلدىرىپ وتىر.
وسىعان بايلانىستى «استانا وپەرا» تەاترى قازىردىڭ وزىندە «Biletbar.kz» وپەراتورى ارقىلى بيلەت ساتۋدىڭ ەلەكتروندىق جۇيەسىن ىسكە قوسىپ ۇلگەردى. ءبىر ايتا كەتەرلىگى, كاسسا ارقىلى ساتىپ الىناتىن بيلەت پەن عالامتوردىڭ كومەگىمەن قول جەتكىزەتىن بيلەتتىڭ قۇنى بىردەي. سوڭعى جوبا ونەرسۇيەر قاۋىمنىڭ سپەكتاكلگە كىرۋىن ىڭعايلى ەتۋمەن قاتار بيلەتتىڭ بارلىق ادامعا قولجەتىمدى بولۋىن قامتاماسىز ەتەدى.
«Biletbar.kz»-ءتىڭ باس ديرەكتورى جاندوس جاكەتوۆتىڭ مالىمدەۋىنشە, بيلەت ساتۋ جۇيەسى اشىق جانە زاماناۋي ۇلگىدە جۇزەگە اسادى. ساتىلعان ءار بيلەت جۇيەدە تىركەلەتىندىكتەن ونى باعدارلاما ارقىلى ءوشىرۋ, وزگەرتۋ استە مۇمكىن ەمەس. سونداي-اق, بيلەتتى قولدان جاساۋ سياقتى الاياقتىق ارەكەتتەردى بولدىرماۋعا دا اسا ءمان بەرىلىپ وتىر. ويتكەنى, ءار بيلەت ورنى, قاتارى, قالاي جانە قاي ۋاقىتتا الىنعانى جايلى ساتىپ الۋ دەرەگى بار «QR كودپەن» قامتىلعان. زالعا كىرگەندە وسى كود ارنايى قۇرالدىڭ كومەگىمەن سكاننان وتكىزىلەدى دە اقپارات وقىلادى. وسىلايشا بيلەت لەزدە تەكسەرۋدەن ءوتىپ شىعا كەلەدى.
سمارتفون جانە پلانشەتتىك قۇرالى بار ادام بيلەتتى باسىپ شىعارىپ, اۋرە-سارساڭعا تۇسپەيدى, سەبەبى, ەندى مۇنان بىلاي ەلەكتروندىق بيلەت وپتسياسى ىسكە قوسىلىپ وتىر. «استانا وپەرا» تەاترىنىڭ ماركەتينگ دەپارتامەنتىنىڭ ديرەكتورى مانسۇر سماعامبەتوۆ «QR كودى» بارلىق بيلەتتەرگە ەنگىزىلەتىنىن, ونىڭ ىشىندە كاسسا ارقىلى ساتىلاتىن بيلەتتەر دە بار ەكەنىن, سونىمەن بىرگە, بيلەتتى ەلەكتروندىق جولمەن ساتىپ الۋ جۇيەسى الداعى جىلدىڭ قاڭتارىنان باستاپ جۇمىس ىستەيتىنىن ايتتى.
ءبارىن ايت تا, ءبىرىن ايت, اتىنا بۇرىن تەك سىرتتاي ءسۇيسىنىپ جۇرگەن قازاقستاندىقتار يتالياعا ات تەرلەتىپ بارماي-اق «لا سكالانىڭ» تاماشا ونەرىن ءوز جەرىندە وگەيسىمەي قىزىقتايتىن عاجاپ تارتۋعا يە بولىپ وتىر. يتالياندىقتار اكەلەتىن سەرۆانتەستىڭ «دون كيحوت» سپەكتاكلى ءبىزدىڭ كورەرمەن ءۇشىن اسا تىڭ دۇنيە ەمەس, استانالىق تەاترلاردا بۇل قويىلىم وسىعان دەيىن تالاي مارتە كورەرمەننەن ءوز باعاسىن الىپ تا قويعان. كومەديا مەن تراگەديانى قاتار قامتىعان ەكى اكتىلى بالەتتى كەزىندە ەلباسىنىڭ ءوزى كەلىپ تاماشالاعانى ەستە.
دەي تۇرعانمەن, كلاسسيكانىڭ وتانى سانالاتىن ەلدىڭ مايتالماندارى ەڭسەرگەن ونەردەن ۇلگى الىپ, ۇيرەنەر تۇستار از بولماسى انىق. شالعايداعى ونەر شاڭىراعىن مۇندا شاقىرۋداعى ماقسات تا سول بولسا كەرەك. «استانا وپەرا» تەاترىن «لا سكالا» دارەجەسىنە جەتكىزۋ. كلاسسيكالىق ونەردىڭ شىڭىنا بالانعان تەاتردىڭ كاسىبي جەتىستىگىنەن سۋسىنداۋ.
الدىن-الا حابارلاۋعا تۇراتىن تاعى ءبىر جاڭالىق – وسى جىلعى كۇزدە ەلىمىزگە ۆەنا وپەراسىنىڭ ترۋپپاسى دا گاسترولدىك ساپارمەن كەلەدى دەپ جوسپارلانۋدا. «شتاتس وپەرا» دۇنيە جۇزىندەگى ەڭ ايگىلى وپەرالاردىڭ بىرىنە جاتادى. «استانا وپەرا» تەاترىنداعى تاماشالار مۇنىمەن شەكتەلىپ قالمايدى, ولار دا وزدەرىنىڭ كەرەمەت جەتىستىكتەرىن وزگەلەرگە پاش ەتۋگە اسىعادى. مىسالى, فرانتسيادا, سونىمەن بىرگە نيۋ-يوركتەگى «كارنەگي حولدا» كونتسەرت بەرىپ, «كوۆەنت-گاردەندە» ونەر كورسەتەدى دەگەن ماقساتتار تۇر. ال, جاس تەاتر ۇجىمى جىل باسىنداعى شىعارماشىلىقتى الماتىعا گاسترولدىك ساپار جاساۋمەن باستاماق. اقپاننىڭ 4-ءى مەن 10-ى ارالىعىندا اباي اتىنداعى مەملەكەتتىك اكادەميالىق وپەرا جانە بالەت تەاترىندا «ءبىرجان-سارا», «رودەن» سپەكتاكلدەرى قويىلىپ, كونتسەرتتىك باعدارلامالار ۇسىنىلماق. سونداي-اق, ناۋرىزدىڭ 8-ءى مەن 10-ى ارالىعىندا رەسەيدىڭ سانكت-پەتەربۋرگ قالاسىنداعى «ماريا» تەاترىنا «اتتيلا», «ءبىرجان-سارا», «رودەن» تۋىندىلارىمەن بارۋدى كوزدەپ وتىر.
قاراشاش توقسانباي,
«ەگەمەن قازاقستان».