«استانا كەشتەرى» حالىقارالىق ونەر فەستيۆالى COVID-19 ىندەتىمەن بايلانىستى شەكتەۋلەردەن كەيىن ەلوردانىڭ ساحنالىق الاڭدارىنا قايتا ورالدى, دەپ حابارلايدى Egemen.kz.
بيىل ءوزىنىڭ 10 جىلدىق مەرەيتويىن اتاپ وتەتىن بۇل قايىرىمدىلىق جوبا «MuzVac - ۇزدىكمۋزىكالىق ۆاكتسينا!» ۇرانىن ارقاۋ ەتىپ, ەلوردا كۇنىن مەرەكەلەۋ اياسىندا وتكىزىلۋدە. «استانا كەشتەرى» فەستيۆالىنىڭ كونتسەرتتەرىن ەلوردالىق ونەر سۇيەر قاۋىم 18-20 ماۋسىم كۇندەرى ارالىعىندا تاماشالاي الادى. كونتسەرتتەردىڭ باستى قوناقتارى – بەيبىت كۇننىڭ باتىرلارى اتانىپ, پاندەميا ۋاقىتىندا كوروناۆيرۋسپەن ايانباي كۇرەس جۇرگىزگەن مەديتسينا قىزمەتكەرلەرى.
فەستيۆالدىڭ العاشقى كونتسەرتى «استانا وپەرا» تەاترىنىڭ كامەرالىق زالىندا ءوتتى. «كوشپەلى اۋەندەر» دەپ اتالاتىن جاڭا كونتسەرتتى يتاليادان كەلگەن مۋزىكانتتار فيلومەنا دە پاسكۋالە (فلەيتا) مەن دجوردجو البياني (گيتارا) ۇسىندى. «كونتراپۋنكت» دەگەن دۋەتكە بىرىككەن يتالياندىق ارتىستەردىڭ ونەرى كورەرمەندەردى اسقان شەبەرلىگىمەن جانە ۇيلەسىمدىلىگىمەن تامساندىردى. «كونتراپۋنكت» دۋەتىنىڭ مۋزىكانتتارى ارگەنتينا, برازيليا, يسپانيا, فرانتسيا, يتاليا كومپوزيتورلارىنىڭ تۋىندىلارىن ورىندادى. فلەيتا مەن گيتارانىڭ ەرەكشە اۋەزدىلىگى شەتەلدىك اۆتورلاردىڭ كەرەمەت مۋزىكاسىنا ەرەكشە مانەر بەرىپ, وزگەشە ورنەك قوستى.
ارتىستەردىڭ ايتۋىنشا, ولار بۇل كونتسەرتتە ەرەكشە تولعانىسپەن ونەر كورسەتكەن.
– ۇيىمداستىرۋشىلار تاراپىنان دارىگەرلەرگە كورسەتىلگەن ەرەكشە قۇرمەت «استانا كەشتەرى» فەستيۆالىنىڭ ىزگى ماقساتىن, الەۋمەتتىك ماڭىزىن ايقىنداي تۇسەدى. سەبەبى دەنساۋلىق – ادام ومىرىندەگى باستى قۇندىلىق. مۋزىكامەن, ءتىپتى باسقا كەز كەلگەن جۇمىسپەن اينالىسۋ ءۇشىن, ەڭ باستىسى, دەنساۋلىق كەرەك. ال ادام دەنساۋلىعى – دارىگەرلەردىڭ قولىندا. اۋرۋدى ەمدەۋ جانە ادامداردى ساۋىقتىرۋ – بۇل مەديتسينا قىزمەتكەرلەرى مەن مۋزىكانتتارعا ورتاق ماقسات. جاقىندا مەديتسينا سالاسىندا پايدا بولعان «مۋزىكالىق تەراپيا» باعىتى وسى تۇجىرىمدى دالەلدەيدى. سەبەبى مۋزىكا ادامنىڭ جانى مەن رۋحاني ساناسىنا يگى اسەر ەتەدى.
پاندەميا ومىردەگى قۇندىلىقتارعا باسقاشا قاراۋعا ۇيرەتتى, ءتىپتى مۋزىكانىڭ ءوزىن ءبىز قازىر باسقاشا تىڭدايمىز. ونى بۇگىنگى كونتسەرتكە جينالعان ونەر سۇيەر قاۋىمنىڭ ىقىلاسى كورسەتتى. مۋزىكا, شەكارالارعا قاراماستان, ءبىزدى بۇگىن قازاقستاندىق كورەرمەندەرمەن تابىستىردى, - دەدى دجوردجو البياني.
بۇل كەشتە يتاليانىڭ ۇزدىك مۋزىكانتتارىنىڭ ورىنداۋىندا شىرقالعان ءار شىعارما مەديتسينا قىزمەتكەرلەرىنىڭ قۇرمەتىنە ارنالىپ, ولارعا رۋحاني كۇش-قۋات سىيلادى. كونتسەرتتەن كەيىن دارىگەرلەر فەستيۆالدىڭ ۇيىمداستىرۋشىلارى – «دەگدار» گۋمانيتارلىق قورى, نۇر-سۇلتان قالاسىنىڭ اكىمدىگى جانە JTI كومپانياسىنا شىنايى العىستارىن ءبىلدىرىپ, جىلى لەبىزدەرىن جەتكىزدى.
ۇيىمداستىرۋشىلار مالىمدەگەندەي, «استانا كەشتەرى» فەستيۆالى ءالى 2 كۇن جالعاسادى. 19 ماۋسىم كۇنى «استانا وپەرانىڭ» كامەرالىق زالىندا پيانيست گەورگي مۋندروۆتىڭ (گەرمانيا) كونتسەرتى ۇسىنىلادى. فەستيۆالدىڭ باستى ءىس-شاراسى – «MuzVac - ۇزدىك مۋزىكالىق ۆاكتسينا!» اتتى كونتسەرت 20 ماۋسىم كۇنى «قازاقستان» وكز-دا وتەدى. ۇلكەن كونتسەرتتىڭ قاتىسۋشىلارى – بەلگىلى وتاندىق ارتىستەر مەن ونەر ۇجىمدارى جانە يتاليا مەن شۆەتسيانىڭ ونەر جۇلدىزدارى. كونتسەرتكە نۇر-سۇلتان قالاسى ەمحانالارىنىڭ قىزمەتكەرلەرى شاقىرىلادى. كونتسەرتتە بارلىق سانيتارلىق نورمالار ساقتالادى. كورەرمەندەر كونتسەرتتىك زالعا«Ashyq» جۇيەسى ارقىلى كىرە الادى.