پەتروپاۆل قالاسى – ەكولوگيالىق تۇرعىدان ەلىمىزدەگى تازا قالالاردىڭ ءبىرى. ونىڭ ورتالىق كوشەلەرىنىڭ بارلىعىن جازدىگۇنى جاسىل جەلەك كومكەرىپ, سارى كۇزگە دەيىن قۇلپىرىپ تۇرادى. گۇلزارلار مەن دەمالىس ورىندارى دا گۇلگە ورانىپ, جايلى كۇندەرى قالالىقتاردىڭ سۇيىكتى ورنىنا اينالادى.
قالا باسشىلىعى بىلتىردان بەرى ەكوپارك قۇرىلىسىن دا جۇرگىزۋدە. «قاراساي باتىر» ستاديونىنىڭ ماڭىندا ورنالاسقان بۇل ورىن – بالالىق داۋرەننىڭ قىزىق ورداسى. «جاستار» ستاديونىنىڭ فۋتبول مانەجى دە بيىل جوندەۋدەن ءوتىپ, سپورتسۇيگىش بالالاردىڭ سۇيىكتى ورنىنا اينالعان.
قالا اكىمى بولات جۇمابەكوۆ ءوزىنىڭ جۋىرداعى الەۋمەتتىك-ەكونوميكالىق دامۋ جونىندەگى بايانداماسىندا تۇرعىن ۇيلەردىڭ اۋلاسىنا جاسالعان بۇرىنعى 6 ترەناجەردىڭ ورنىنا بيىل تاعى 20-سى قوسىلاتىنىن ايتىپ, بالالاردى قۋانتىپ قويدى. جازعى كانيكۋلدا 15 سپورت الاڭىندا شاعىن فۋتبولدان بالالار اراسىندا جارىس وتكىزىلمەك. وعان كەم دەگەندە 2 مىڭنان ارتىق بالا قاتىسادى دەپ جوسپارلانعان.
قىزىلجاردىڭ وسىنداي كوركىنە قالا ىشىندە جۇرەتىن ەسكى اۆتوبۋستاردىڭ جۇتاڭقى تۇرلەرى جاراسپايدى-اق. قازىر قالانىڭ ىشىندە 20 اۆتوبۋس مارشرۋتى بار. كۇن سايىن قالا كوشەلەرىنە 197 اۆتوبۋس پەن شاعىن اۆتوبۋس شىعادى. مارشرۋتتارعا 11 تاسىمالداۋشى كومپانيا قىزمەت كورسەتەدى. 2020 جىلى قالاعا بىردە-ءبىر جاڭا اۆتوبۋس الىنباعان. ونىڭ وبەكتيۆتى سەبەپتەرى بار. سونىڭ ىشىندە جامان ىندەتتىڭ كەسىرى كوپ بولعانى بەلگىلى. ال بيىل 100 جاڭا اۆتوبۋس الىناتىنى جونىندە اڭگىمە كوپتەن بەرى ايتىلىپ كەلەدى, بىراق سولار ءالى دە جەتپەي جاتىر. اكىم بايانداماسىندا بۇل كولىكتەردىڭ شىلدە مەن تامىز ايلارىندا كەلىپ قالاتىنىن ايتتى. ال قازىرگى اۆتوبۋستاردىڭ كوبى قالانىڭ كوركىن قاشىرىپ تۇر. ونىڭ كەيبىرىنەن قويۋ قارا ءتۇتىن بۋداقتاپ, قالانىڭ ەكولوگياسىن دا ءبۇلدىرىپ ءجۇر.
جۋىردا وبلىس پوليتسەيلەرى «قوعامدىق كولىكتەگى ەكولوگيالىق قاۋىپسىزدىك» اتاۋلى رەيدىن جۇرگىزىپ, ارنايى قۇرىلعىلارمەن اۆتوبۋستان شىعاتىن ءتۇتىننىڭ اۋانى لاستاۋ دەڭگەيىن انىقتادى. تۇتىندەگى زياندى گاز مولشەرى تەكسەرىلگەن 6 اۆتوبۋستىڭ بەسەۋىندە شامادان تىس كوپ بولدى. بىرەۋىندە ونىڭ مولشەرى نورمادان 5 ەسە ارتىق بولسا, تاعى بىرىندە 16 ەسە كوپ بولعان.
«بۇل جۇرگىزۋشىلەر اكىمشىلىك قۇقىق بۇزۋشىلىق كودەكسىنىڭ «شىعارىندىلاردا لاستاۋشى زاتتاردىڭ بولۋى نورماتيۆتەردەن اسىپ كەتەتىن اۆتوموتوكولiكتەردى جانە باسقا دا جىلجىمالى قۇرالداردى پايدالانۋ» جونىندەگى 334-بابىمەن جاۋاپكەرشىلىككە تارتىلدى. اۋانى لاستايتىن زاتتاردىڭ كولەمى 2 ەسە كوپ بولسا ەسكەرتۋ, ال كوبىرەك بولسا 2 ايلىق ەسەپتىك كورسەتكىش كولەمىندە ايىپپۇل سالىنادى», دەيدى پد جەرگىلىكتى پوليتسيا قىزمەتى باسقارماسى باستىعىنىڭ مىندەتىن اتقارۋشى, پوليتسيا پودپولكوۆنيگى گريگوري تىش.
سونىمەن بىرگە كولىك قۇرالدارىنىڭ تەحنيكالىق جاعدايى دا تەكسەرىلگەن. سويتسە رەيس الدىنداعى بايقاۋدان 4 جۇرگىزۋشى وتپەگەن بولىپ شىقتى. بۇل جول قاۋىپسىزدىگىن ساقتاۋ ءتارتىبىن ورەسكەل بۇزۋشىلىق بولىپ ەسەپتەلەدى. جۇرگىزۋشىنىڭ قان قىسىمى تەكسەرىلمەگەن بولسا, الكوگولدى ىشىمدىك پايدالانباعانى انىقتالماسا, وعان سەنىم دە جوق. دەمەك, تاسىمالداۋمەن اينالىساتىن كومپانيالار وزدەرىنىڭ مىندەتىن تولىق ورىندامايدى.
اكىمدىك قالانىڭ ىشىندەگى №2, №14 جانە №24 مارشرۋتتارعا قىزمەت كورسەتەتىن وسىنداي تاسىمالداۋشىلارمەن كەلىسىمشارتتاردى بۇزىپ, باسقا تاسىمالداۋشى تاعايىنداۋ تۋرالى شەشىم قابىلداپ وتىر. ەندى ءوز ىسىنە جاۋاپتى كومپانيالار كەلىپ, شاھار ىشىندەگى اۆتوبۋس تاسىمالى جاقسارار دەگەن ءۇمىت بار. بۇل, اسىرەسە جەكە كولىگى جوق قارت ادامدار مەن الەۋمەتتىك ءالجۋاز توپقا جاتاتىن جاندار ءۇشىن ماڭىزدى. ولار كولىك ءۇشىن تەك اۆتوبۋستى پايدالانادى. قازىر قالا اكىمدىگىنىڭ قولداۋىمەن وسىنداي 9,5 مىڭ ادام قالاىشىلىك اۆتوبۋستارمەن تەگىن جانە جارتىلاي تەگىن باعامەن جۇرەدى.
پەتروپاۆل