ەلورداداعى ۇلتتىق مۋزەيدە بيىل تۋعانىنا 150 جىل تولعان, كۇرەستىڭ بىرنەشە تۇرىنەن الەم چەمپيونى, داڭقتى بالۋان قاجىمۇقان مۇڭايتپاس ۇلىنا قاتىستى بىرنەشە جادىگەر ساقتالعان.
سولاردىڭ ءبىرى بالۋاننىڭ ورنەگى دە اسەم, كۇمىسپەن ادىپتەلگەن بەلدىگى. بۇل جادىگەر – 2002 جىلى وڭتۇستىك قازاقستان وبلىسى, ورداباسى اۋدانى تەمىرلان اۋىلىنداعى قاجىمۇقان اتىنداعى وبلىستىق سپورت مۋزەيىنە بەلگىلى سپورتشى, جازۋشى الىمقۇل بۇركىتباەۆتان ساتىپ الىنعان. الىمقۇل اعامىز كەزىندە وراسان كۇش يەسى جايىندا «قاجىمۇقان» اتتى دەرەكتى كىتاپ جازعانى ءمالىم. ول كىسى كۇمىس بەلدىكتى سانكت-پەتەربۋرگتە وتكەن سپورتتىق تروفەيلەردىڭ اۋكتسيونىنان ساتىپ الىپتى.ەندى بۇل قۇندى دۇنيە ۇلتتىق مۋزەيدىڭ تورىندە تۇر.
سونىمەن قاتار مۋزەيدە الىپ اتامىزدىڭ جەكە تولقۇجاتى, ۆارشاۆا مۇسىلماندارىنىڭ سىيعا تارتقان مەدالى جانە ءدارى ساقتايتىن ىدىسى ساقتالعان. بالۋاننىڭ ەمدىك شوپتەر سالۋعا ارنالعان تەمىر ىدىسىنىڭ ءپىشىنى تسيليندر ءتارىزدى جاسالعان, جەكە جابىلاتىن قاقپاقشاسى بار. اتالعان ىدىس وسىمدىك ءتارىزدى ويۋلارمەن ورنەكتەلگەن. ونىڭ ءبىر بۇيىرىنە ارابشا «باليشيفا», ال ەكىنشى بۇيىرىنە −«القاقني» دەپ جازىلعان. «باليشيفا» (شيفا) ءسوزى – «شيپا», «ەم», «دارۋمەن» دەگەن ماعىنا بەرسە, «القاقني» دەپ «ىدىستى» ايتادى ەكەن.