ماڭعىستاۋ وبلىسىنداعى تابيعي عاجايىپتاردىڭ ءبىرى سانالاتىن بەلگىلى بوزجىرا شاتقالى قوقىس ۇيىندىسىنە اينالىپ بارادى, دەپ حابارلايدى Egemen.kz.
«قىزىلساي» تابيعي ساياباعىنىڭ ون ينسپەكتورى دەمالۋشىلار قالدىرعان قوقىستى جيناۋعا تىرىسادى. بىراق ولار مەملەكەتتىك قورىقتىڭ 316 مىڭ گەكتار اۋماعىن باقىلاپ وتىرا المايتىنىن ايتتى.
ەرەكشە پەيزاجدارىمەن ايگىلى شاتقال اقتاۋدان 300 شاقىرىم جەردە ورنالاسقان. 1 ناۋرىزدان بەرى بوزجىرعا ەكى مىڭعا جۋىق تۋريست كەلگەن. جول تالعامايتىن كولىكتى جالعا الۋ باعاسى - 80 مىڭ تەڭگە جانە ودان جوعارى. الايدا بۇل جەردىڭ تانىمالدىعى تابيعات سۇلۋلىعىنىڭ ساقتالۋىنا زيانىن تيگىزىپ جاتىر.
ء«بىز ساياحاتشىلاردى قارسى الامىز, براكونەرلىكتىڭ الدىن الىپ, كولىكتەردە قارۋدىڭ بار-جوعىن تەكسەرەمىز. نۇسقاۋ بەرەمىز, وت جاقپاۋدى, قوقىستى قالدىرماي الىپ كەتۋدى سۇرايمىز. بىراق شاتقالعا اپاراتىن بارلىق جولدى باقىلاۋ مۇمكىن ەمەس. سوندىقتان ساياحاتشىلار قوقىستارىن قالدىرىپ كەتە بەرەدى», دەيدى «قىزىلساي» مەملەكەتتىك وڭىرلىك تابيعي ساياباق قىزمەتكەرى ناۋرىز انەسوۆ.