قازاقتىڭ بەينەلەۋ ونەرى كەڭەستىك يدەولوگيانىڭ كىسەنىنەن بوساپ شىعىسىمەن كوپ ۇزاماي, مىڭ ءتۇرلى قۇلپىرما بوياۋعا قانىعىپ ۇلگەردى. سۋرەتشىلەردىڭ ايتار ويىنان تارتىپ, وقىرمانعا جەتكىزەر ءادىس-تاسىلىنە, تانىمى مەن نانىمىنا دەيىنگى ارالىق تا مەيلىنشە تۇرلەندى. ارينە, ونىڭ ءبارى ەگەمەندىگىمىزدىڭ ناتيجەسى. وسىعان وراي ەلىمىزدەگى «TAMYR» شىعارماشىلىق توبىنىڭ كوركەمونەر كورمەسىنىڭ سالتاناتتى اشىلۋ ءراسىمى ءوتتى.
اتالعان كورمە تاۋەلسىزدىگىمىزدىڭ 30 جىلدىعىنا ارنالدى. حالىقارالىق ارت كەڭىستىكتە ونەردىڭ ءارتۇرلى جانرلارىندا جۇمىس ىستەيتىن, ءوزىنىڭ قايتالانباس دۇنيەتانىمى, جاڭاشىلدىعى بار دارىندى سۋرەتشىلەردىڭ مارتەبەسىن كوتەرۋدى ماقسات تۇتقان ءىس-شارا ۇلتتىق مۋزەيدە ۇيىمداستىرىلدى.
العاشقى بەتاشار ءسوزدى ۇلتتىق مۋزەي̆ ديرەكتورىنىڭ ورىنباسارى نازگۇل كادريمبەتوۆا الدى.
«TAMYR» – كوركەمونەر رۋحىن ءوز زامانىنا ساي كاسىبي شەبەرلىكتەرى ارقىلى بەينەلەيتىن سۋرەتشىلەردىڭ بىرلەستىگى. ونەردى ماماندىق رەتىندە ەمەس, ءومىر سالتى رەتىندە قابىلداعاندار. وسى ارادا اعىلشىن جازۋشىسى, سۋرەتشى ءارى ونەرتانۋشى دجون ريوسكيننىڭ جاقسى ءسوزى ەسىمە ءتۇسىپ تۇر. «سۋرەتشىنىڭ قولى, قيالى جانە جۇرەگى بىرگە جۇمىس ىستەسە عانا تاماشا سۋرەت شىعادى». بۇل كورمە دە شەبەر قولدى, قيالى ۇشقىر, جۇرەگى كەڭ سۋرەتشىلەرىمىزدىڭ ەڭبەكتەرى مەن قۇندى دۇنيەلەرىنە تولى», دەدى ن.كادريمباەۆا.
ىزگى تىلەكتەن كەيىن قازاقستاننىڭ ەڭبەك سىڭىرگەن قايراتكەرى, سۋرەتشىلەر وداعىنىڭ مۇشەسى ابدۋاحات مۇراتباەۆ وسىناۋ كورمەنىڭ ۇيىمداستىرىلۋىنا قولداۋ بىلدىرگەن مۋزەي ۇجىمىنا العىسىن ءبىلدىرىپ, كورمەدە ەكسپوزيتسيالانعان جاس بۋىننان باستاپ اعا بۋىنعا دەيىنگى قىلقالام شەبەرلەرىنىڭ جۇمىستارى مۋزەي قوناقتارىنىڭ جۇرەگىنەن ەرەكشە ورىن الاتىنىنا سەنىم ءبىلدىردى.
ايتا كەتەيىك, «TAMYR» شىعارماشىلىق توبىنا ەلىمىزگە تانىمال, وزىندىك قولتاڭباسى قالىپتاسقان سۋرەتشىلەر وداعىنىڭ مۇشەلەرى كىرەدى. ولاردىڭ قاتارىندا ناسىر رۋستاموۆ, مۇرات مانسۇروۆ, سۇلتان يلياەۆ, ابدۋاحات مۇراتباەۆ, راسىلبەك ەستەمەسوۆ, اينۇر اسانوۆا, ەدىگە تۇرلىبەكوۆ, مۇحتار بەكەنوۆ سىندى قىلقالام شەبەرلەرى بار. شىعارماشىلىق توپتىڭ بارلىق وكىلى كاسىبي كوركەمدىك بىلىمگە يە, بەدەلدى رەسپۋبليكالىق جانە حالىقارالىق بايقاۋلاردىڭ لاۋرەاتتارى بولىپ سانالادى. قازاقستان اۋماعىمەن قاتار, شەتەلدە دە بەلسەندى ەڭبەكتەنىپ جۇرگەن اۆتورلاردىڭ كوركەمونەر تۋىندىلارى كوپتەگەن ەلدىڭ جەكە توپتامالارىندا ۇسىنىلعان. دەمەك, بۇل ولاردىڭ كوپجىلدىق ەڭبەگىنىڭ جوعارى دەڭگەيدە باعالانۋى.
كورمەگە 100-دەن استام كوركەمونەر تۋىندىلارى ۇسىنىلدى. سونداي-اق كورمە اياسىندا «TAMYR» شىعارماشىلىق توبىنداعى تانىمال قازاقستاندىق سۋرەتشىلەردىڭ شەبەرلىك سىنىپتارى دا وتكىزىلدى.