وتكەن اپتادا پرەزيدەنت قاسىم-جومارت توقاەۆقا پاۆلودار وبلىسىنىڭ اكىمى ابىلقايىر سقاقوۆ ىندەتكە قارسى جۇرگىزىلىپ جاتقان جۇمىس بارىسى جايىندا ەسەپ بەردى. ياعني «سارى ايماقتاعى» ءوڭىردىڭ ەپيدەميالىق احۋالى وبلىستىق اكىمدىك تاراپىنان قاتاڭ باقىلاۋدا.
مەديتسينا قىزمەتكەرلەرى مەن بارلىق دەڭگەيدەگى اكىمدەر جەرگىلىكتى جەردە ىندەت تارالماۋىنا وراي قاۋىپسىزدىك شارالارىن جۇرگىزۋدە. بۇل ماسەلە وبلىستىق اكىمدىكتىڭ جەدەل شتاب وتىرىسىندا اپتا سايىن تالقىلانۋدا.
– جالپى, «سارى ايماقتا» بولعانىمىزبەن, ەپيدەميالىق جاعداي ءبىر تاۋلىك ىشىندە وزگەرۋى مۇمكىن, – دەدى وبلىس اكىمى ابىلقايىر سقاقوۆ جەدەل شتاب وتىرىسىندا. – وسى ماسەلەگە وراي بارلىق جۇكتەمەنى دەنساۋلىق ساقتاۋ سالاسىنىڭ عانا مىندەتى دەپ قاراۋعا بولمايدى. جەرگىلىكتى اكىمدىكتەر ىندەتتى جاپپاي جۇقتىرۋدىڭ, تارالماۋىن باقىلاۋعا الۋلارى ءتيىس.
سوندىقتان سانيتارلىق-ەپيدەميولوگيالىق باقىلاۋ دەپارتامەنتى كەيبىر شەكتەۋ شارالارىن قايتا ەنگىزۋگە ارنالعان جاڭا قۇجات دايىندادى. وبلىس اۋماعىندا شەكتەۋلى كارانتيندىك شارالار تۋرالى وزگەرىستەر مەن تولىقتىرۋلار ەنگىزىلگەن №9 جاڭا قاۋلىنىڭ تولىق نۇسقاسى جاريالاندى. دەپارتامەنت باسشىسى باتىربەك اليەۆتىڭ مالىمدەۋىنشە, الداعى كۇندەرى وڭىردە كارانتيندىك شارالار قايتادان كۇشەيتىلۋى مۇمكىن.
– ويتكەنى, 9-15 ءساۋىر ارالىعىندا 313 جاعداي تىركەلسە, ال 2-8 ءساۋىر ارالىعىنداعى كورسەتكىش – 248-گە جەتتى. اۋىرعانداردىڭ تاۋلىكتىك ءوسىمى – 0,21 پايىز, اپتالىق 1,29 پايىزدى قۇرادى, – دەيدى باس سانيتار دارىگەر.
16 ساۋىردە ىندەت جۇقتىرۋدىڭ 43 جاعدايى راستالسا, 28-ىندە ينفەكتسيا بەلگىلەرى انىقتالعان. قازىر كاسىپكەرلىك نىساندارىندا دا ەپيدەميالىق رەجىمنىڭ ساقتالۋىن قاداعالايتىن مونيتورينگتىك توپتار ءتارتىپ بۇزۋشىلىقتاردى انىقتاۋدا. توپ وكىلدەرى بەلگىلەنگەن ءتارتىپ ەرەجەسىن بۇزىلۋىن, نىساندارداعى ادامدار سانىنىڭ شەكتەن اسۋى, الەۋمەتتىك قاشىقتىقتى ساقتامايتىن جايلاردى تىركەدى.
– مىسالى, 12 نىسان يەلەرىنە اكىمشىلىك ايىپپۇل سالىندى,– دەيدى باس سانيتار دارىگەر. – ال بۇزۋشىلىقتار جۇيەلى تۇردە انىقتالاتىن نىساندار بويىنشا ماتەريالدار سوتقا جىبەرىلۋدە. كەيبىر ورىندارعا قاتىستى جۇمىسىن 15 كۇنگە توقتاتا تۇرۋ تۋرالى شەشىم دە قابىلدانعان. سونىمەن بىرگە 5 ادام شەكارا ارقىلى وبلىسقا پتر-انىقتاماسىز وتپەك بولعان, ال 7 ادام كارانتيندىك ستاتسيونارلارعا جىبەرىلىپتى. سوڭعى تاۋلىكتە شەكارا ارقىلى وبلىسقا 414 ادام – 261 جاياۋ جۇرگىنشى جانە 153 جۇك كولىگىنىڭ جۇرگىزۋشىسى وتكەن.
جالپى, شەكتەۋلەر ەنگىزىلگەن ۋاقىتتان باستاپ وبلىسقا 87 939 ادام كەلدى, 54 358 جۇرگىزۋشى حالىقارالىق تاسىمالداردى جۇزەگە اسىرۋشى جانە 33 581 جولاۋشى. ال پتر-تەكسەرۋ ءۇشىن كارانتيندىك ستاتسيونارلارعا 2 701 جولاۋشى ورنالاستىرىلدى. بارلىعى 25 034 پتر-تەست وتكىزىلدى, – دەلىنگەن دەپارتامەنت مالىمەتىندە. ال وبلىستىق دەنساۋلىق ساقوتاۋ باسقارماسىنىڭ مالىمەتىنشە, 13 ساۋىردە وبلىسقا سپۋتنيك V ۆاكتسيناسىنىڭ ءبىرىنشى كومپونەنتىنىڭ 21 750 جانە ەكىنشى كومپونەنتىنىڭ 10 750 مولشەرى جەتكىزىلگەن.
قازىرگى كەزدە وڭىردەگى 74 ەگۋ پۋنكتىندە ىندەتكە قارسى ەكپە الۋعا بولادى. وسى كۇنگە دەيىن 19 مىڭعا جۋىق تۇرعىن «گام-كوۆيد-ۆاك» (سپۋتنيك V) ۆاكتسيناسىنىڭ I كومپونەنتىن, تاعى 4 مىڭنان استامى – پرەپاراتتىڭ II كومپونەنتىن الدى.
– ال جەتكىزىلەتىن ۆاكتسينا كولەمى كوبەيگەن كەزدە ءبىزدىڭ رەسۋرستارىمىز دايىن بولۋى ءتيىس, – دەدى وتىرىس بارىسىندا وبلىس اكىمى. – ورىن جەتپەگەن جاعدايدا ەمحانالار باسقا نىسانداردى جالعا الۋ شارتىن جاساي الادى.
سوندىقتان تۇرعىندار اراسىندا دۇربەلەڭ تۋىنداماس ءۇشىن, ولار ەكپەنى قايدان الاتىنى تۋرالى اقپاراتتان حاباردار بولۋى ءتيىس. قالالار مەن اۋدانداردىڭ اكىمدەرىنە بارلىق ەگۋ پۋنكتتەرىن ارالاپ, ولاردىڭ جۇمىسىن ۇزدىكسىز باقىلايتىن تۇراقتى توپتار قۇرۋ تاپسىرىلدى.
پاۆلودار وبلىسى