قاراعاندى وبلىسىندا «جامان تۇماۋعا» قارسى جاپپاي ەكپە سالۋ كەڭىنەن جۇزەگە اسىرىلا باستادى. اۋەلدە بۇل ىسكە ۇركە قاراعان اعايىن قازىر ۆاكتسينا سالدىرۋدىڭ قاجەتتىلىك ەكەنىن ۇعىنا تۇسكەن.
قازىر قاراعاندىدا ەكپە سالدىرۋ ەمحانالاردا عانا ەمەس, وبلىس ورتالىعىنداعى ءىرى ساۋدا ۇيلەرىندە دە ۇيىمداستىرىلا باستادى. مىسالى, بۇل جاۋاپتى شارۋا Global City ساۋدا-ويىن-ساۋىق ورتالىعى مەن «تاير» ساۋدا ۇيلەرىندە باستالىپ تا كەتتى. الداعى ۋاقىتتا مۇنداي بەكەت «ابزال» جانە «ۇماي» ساۋدا ورىندارىندا دا پايدا بولماق.
«تاير» جانە Global City ساۋدا ورتالىقتارىنداعى ۆاكتسينالاۋ بولمەلەرى بارلىق قاجەتتى جابدىقتارمەن, اتاپ ايتقاندا, ۆاكتسينالاردى ساقتاۋعا ارنالعان ارنايى توڭازىتقىشپەن جابدىقتالعان. بۇل جەردە ەكپە سالدىرۋعا نيەت بىلدىرگەندەرگە بىلىكتى مەديتسينالىق ماماندار قىزمەت كورسەتەدى. سونىمەن بىرگە ەكپە ورتالىقتارىندا قاجەت بولعان جاعدايدا جەدەل كومەك كورسەتۋگە ارنالعان ارنايى كابينەت تە قاراستىرىلعان. ۆاكتسينالاۋ بەكەتتەرىندە سانيتارلىق نورمالار قاتاڭ ساقتالادى.
جالپى, وبلىستا بۇگىنگە دەيىن 115 ۆاكتسينالاۋ ورتالىعى جۇمىس ىستەپ تۇر. ونىڭ 12-ءسى وبلىس ورتالىعىندا. دەنساۋلىق ساقتاۋ باسقارماسىنىڭ باسشىسى گامال توقسامباەۆ ەكپە سالدىرۋشىلار قاتارى كوبەيەتىن بولسا, وندا قوسىمشا بەكەتتەر اشىلاتىنىن ءمالىم ەتتى. بۇدان بولەك, وڭىردە ۆاكتسينالاردى تاسىمالداۋعا ارنالعان تەرموكونتەينەرلەرمەن جابدىقتالعان جىلجىمالى مەديتسينالىق توپتار ۇيىمداستىرىلعان. ولار ەڭبەك ۇجىمدارىن ۆاكتسينالاۋمەن اينالىسادى. مىسالى, قازىردىڭ وزىندە «ارسەلورميتتال تەميرتاۋ», YDD Corporation جانە Qaz Carbon سىندى ءىرى كومپانيالاردىڭ قىزمەتكەرلەرىنە كوروناۆيرۋسقا قارسى ەكپە سالدىرۋ ءىسى دۇرىس جولعا قويىلعان. كەرەك بولعان جاعدايدا جوعارىدا ايتقان شاعىن توپتار ءوڭىردىڭ كەز كەلگەن ەلدى مەكەندەرىنە دە بارۋعا دايىن ەكەن.
تاياۋدا ءوڭىردىڭ باس دارىگەرى گ.توقسامباەۆ ءساۋىر ايىنىڭ سوڭىنا دەيىن وبلىسقا ۆاكتسينانىڭ تاعى 160 مىڭعا جۋىق دوزاسى جەتكىزىلەتىنىن مالىمدەدى. ايتا كەتۋ كەرەك, قاراعاندى وبلىسىندا بۇگىنگە دەيىن 20 مىڭنان استام ادام سپۋتنيك V ەكپەسىنىڭ ءبىرىنشى كومپونەنتىن الىپ ۇلگەردى. ال ەكپەنىڭ ەكى دوزاسىن العانداردىڭ سانى 10 مىڭنان استى.
وكىنىشكە قاراي, قولعا العان شارالارعا قاراماستان, وبلىستا كوروناۆيرۋس ينفەكتسياسى ءورشىپ كەلەدى. وتكەن تاۋلىكتەگى مالىمەتكە ساي, وڭىردە 202 ادامنىڭ ىندەت جۇقتىرعانى انىقتالدى.
قاراعاندى