ەلىمىز تاۋەلسىزدىك العان, ەسكى بايلانىستار ءۇزىلىپ, ەكونوميكا داعدارىسقا تاپ بولعان وتپەلى كەزەڭدە جاس مەملەكەتتىڭ ەرتەڭى ءۇشىن قوعامداعى ساياسي تۇراقتىلىقتى ساقتاۋ اۋاداي قاجەت بولدى. وسى ورايدا, ەلباسىنىڭ ەتنوسارالىق كەلىسىم ەگەمەندىكتى نىعايتۋدىڭ ىرگەتاسى بولاتىنىن ەسكەرىپ, ۇلت پەن ۇلىستاردىڭ باسىن بىرىكتىرۋگە كۇش سالعان ساياساتى بىردەن-ءبىر دۇرىس باعىت بولعانىن ۋاقىت كورسەتىپ وتىر.
حالىق بىرلىگىن كۇشەيتە ءتۇسۋ ماقساتىندا قۇرىلعان قازاقستان حالقى اسسامبلەياسى (قحا) ەلىمىزدەگى ەتنوستاردى ءبىر شاڭىراقتىڭ استىندا توپتاستىرىپ, رۋحاني بىرلىك يدەيالارىن قالىپتاستىرىپ جانە ىسكە اسىرىپ كەلەدى. بۇگىندە تاۋەلسىز قازاقستان حالىقارالىق قوعامداستىقتىڭ تولىققاندى مۇشەسى جانە بار الەمگە ەتنوسارالىق جانە كونفەسسياارالىق تاتۋلىق پەن بىرلىكتى ساقتاۋدىڭ ناقتى ۇلگىسى بولىپ وتىر.
قحا قىزمەتىنىڭ ءبىر ماڭىزدى باعىتى – مەدياتسيا ينستيتۋتىن دامىتۋ. اسسامبلەيانىڭ XXV سەسسياسىندا ەلباسى نۇرسۇلتان نازارباەۆ مەدياتسيانىڭ ماڭىزدىلىعى مەن دامۋى تۋرالى ەرەكشە اتاپ ءوتىپ, قحا-عا قوعامدىق كەلىسىمدى نىعايتۋ, قايىرىمدىلىق جانە مەدياتسيا كەڭەستەرى جۇمىستارىن كۇشەيتۋدى تاپسىرعان بولاتىن. 2011 جىلعى 28 قاڭتاردا قابىلدانعان «مەدياتسيا تۋرالى» زاڭ بۇعان قۇقىقتىق نەگىز بولىپ وتىر.
بۇگىندە ەلىمىزدىڭ ءار وڭىرىندە, ءار قالادا مەدياتورلار ۇيىمدارى مەن كاسىبي مەدياتورلار جۇمىس ىستەيدى. ولار سوت نەمەسە وزگە دە قۇقىق قورعاۋ ورگاندارىنا جۇگىنبەستەن, بەلگىلى ماسەلەلەر بويىنشا داۋ-جانجالداردى شەشۋدە ءتيىستى كومەك كورسەتە الادى. وسى ورايدا, قازاقستان حالقى قاراعاندى وبلىستىق اسسامبلەياسىنىڭ, ونىڭ ىشىندە وبلىستىق ىشكى ساياسات باسقارماسى جانىنداعى «قوعامدىق كەلىسىم» مەكەمەسىنىڭ تاراپىنان ءبىرتالاي يگى ءىس-شارالار اتقارىلۋ ۇستىندە.
«قوعامدىق كەلىسىم» مم-ءنىڭ مەدياتسيا كابينەتى جەرگىلىكتى مەدياتورلار قاۋىمداستىعىمەن جانە وڭىردەگى 200-دەن استام قوعامدىق مەدياتورمەن تىعىز بايلانىس ورناتقان. ەلىمىزدە ورىن العان ەپيدەميالىق جاعدايعا قاراماستان, وتكەن جىلى دا تۇرعىندارعا مەدياتسيا ينستيتۋتىن ناسيحاتتاۋعا, قوعامدىق مەدياتورلاردى وقىتۋعا بايلانىستى ءتۇرلى ءىس-شارالار قاشىقتىقتان وتكىزىلىپ, ءتيىستى ناتيجەسىن بەردى. حالىقارالىق, وبلىستىق دەڭگەيدەگى جاتتىقتىرۋشى-مەدياتورلاردىڭ قاتىسۋىمەن ۇلىتاۋ اۋدانىندا, ساتباەۆ, جەزقازعان, تەمىرتاۋ قالالارىندا بولعان سەمينارلار مەن ونلاين فورماتتا تۇراقتى تۇردە وتكىزىلەتىن كەڭەس بەرۋ وتىرىستارىنىڭ تۇرعىندار ءۇشىن ماڭىزى زور.
مەملەكەت باسشىسى قاسىم-جومارت توقاەۆتىڭ 2020 جىلعى جولداۋىندا سوتتاردا داۋلاردى شەشۋدىڭ بالاما تۇرلەرىن, مەدياتسيا ينستيتۋتىن دامىتۋ ماسەلەسىنە ەرەكشە كوڭىل ءبولۋى وبلىس مەدياتورلارى ءۇشىن تىڭ سەرپىلىس تۋدىردى. قازىرگى ۋاقىتتا وبلىس مەدياتورلارى وبلىستىق قازاقستان حالقى اسسامبلەياسىمەن بىرگە مەدياتسيانى دامىتۋعا بايلانىستى ءىس-شارالاردى جۇزەگە اسىرۋعا كىرىستى. وسى ورايدا وبلىستىق اسسامبلەيا جانىنداعى انالار كەڭەسى مەن ۆولونتەر-مەدياتورلاردىڭ الاتىن ورنى ەرەكشە. ايماقتاعى مەدياتسيا كابينەتتەرىندە جۇمىس ىستەيتىن قوعامدىق مەدياتورلار, انالار كەڭەسىنىڭ مۇشەلەرى وتباسىلىق داۋ-دامايلاردى شەشۋدە ناتيجەلى جۇمىستار اتقارسا, ۆولونتەر مەدياتورلار مەدياتسيانى ناسيحاتتاۋ جۇمىستارىمەن اينالىسۋدا.
بيىل العا قويعان ماقساتىمىزدىڭ ءبىرى – وبلىستىق قازاقستان حالقى اسسامبلەياسى مەدياتورلارىنىڭ قاتارىن كوبەيتۋ. ويتكەنى مەدياتسيا – ازاماتتاردى ءوزارا سىيلاستىق پەن كەشىرىمدىلىككە تاربيەلەۋگە, تۇرمىستا تۋىنداپ جاتاتىن كيكىلجىڭدەردى وركەنيەتتى شەشۋگە ىقپال ەتەتىن بىردەن-ءبىر قۇرال. ۇلتىمىزدىڭ تولەرانتتىلىعىنىڭ قۇپياسى – حالقىمىزدىڭ دانالىعىن, توزىمدىلىگى مەن سابىرلىلىعىن دارىپتەي وتىرىپ, قازاقستاندىقتار ساناسىندا ىنتىماقتاستىق مەنتاليتەتىن قالىپتاستىرۋعا اتسالىسا بەرمەكپىز.
سۆەتلانا شارداربەكوۆا,
قاراعاندى وبلىسى كاسىپوداقتار ورتالىعى جانىنداعى تاتۋلاسۋ ورتالىعىنىڭ باسشىسى,
وبلىستىق قازاقستان حالقى اسسامبلەياسىنىڭ كاسىبي مەدياتورى