وڭتۇستىك كورەيادا Educational Broadcast System اتتى ءبىلىم بەرۋ جۇيەسىنە ارنالعان تەلەارنا بار ەكەن. ءاسىلى, ەل جاستارىنا وزىق ءبىلىمدى ناسيحاتتاپ قانا قويماي, قورشاعان ورتا تۋرالى تانىمدىق حابارلار تۇسىرۋىمەن دە اتى وزىپ تۇرعان كورىنەدى. ەندى تەلەارنانىڭ ءتۇسىرىلىم توبى قازاقستانعا كەلىپ, تابيعاتى تامىلجىعان تەكەلى قالاسىن ارالاپ ءجۇر, دەپ حابارلايدى Egemen.kz.
ەلىمىزگە ارنايى كەلگەن شەتەلدىك تەلەجۋرناليستەردى تەكەلى قالاسىنىڭ اكىمى باتىر مولداحمەتوۆ قارسى الىپ, ءوڭىر جايىندا ماعلۇمات بەردى. ال كورەي تىلشىلەرى قازاقتىڭ ۇلتتىق سالت-داستۇرلەرى جايىندا ارنايى تەلەباعدارلاما تۇسىرۋگە كەلگەندەرىن ايتىپ, شاعىن قالاداعىتۋريزمدى وركەندەتۋ بويىنشا اتقارىلىپ جاتقان جۇمىستارمەن تانىستى.
جالپى, ەBS تەلارناسىنىڭ جۋرناليستەرى تەكەلەنىڭ كوركەم تابيعاتىن ارالاپ, تاۋ اراسىنداعى قالانىڭ كەلىستى كەلبەتىن ايشىقتايتىن بەينەبايان تۇسىرمەك نيەتتە ەكەن.
- شەتەلدىك قوناقتار تىرشىلىگىمىزبەن بىتە قايناسىپ جاتقان ۇلتتىق ەرەكشەلىكتەرىمىزگە, سالت-داستۇرلەرىمىزگە, ۇلتتىق ونەر مەن سپورتقا, اسىرەسە, حالقىمىزدىڭ اتا-بابامىزدان جالعاسىپ كەلە جاتقان شارۋاشىلىعىنا, ساياتشىلىق ونەرىنە, اتقا ءمىنۋ مادەنيەتىنە, سونىمەن بىرگە, بالا تاربيەسىنە ەرەكشە قىزىعۋشىلىق تانىتىپ, بەسىككە سالۋ, تۇساۋكەسەر سەكىلدى جورالعىلارعا, كوكپار, اۋدارىسپاق, تەڭگە ءىلۋ سىندى ۇلتتىق ويىندارعا ەرەكشە نازار اۋدارماق, دەيدى تەكەلى قالاسىنىڭ اكىمى باتىر مولداحمەتوۆ.
ايتپاقشى, كورەي ءجۋرناليسى سون جۋن حۆاننىڭقازاقستان تۋرالى ارنايى تەلەحابار تۇسىرۋگە نيەتى بولعانىمەن, ونى ءدال وسى تەكەلىدە باستايتىنىن جوسپارلاماپتى دا.
- تەكەلى قالاسىن تاڭداۋىمىزعا وسى قالانىڭ تۇرعىنى فايزوللا بۇركىتباي ەسىمدى ادامنىڭ الەۋمەتتىك جەلىلەرگە سالعان سۋرەتتەرى تۇرتكى بولدى. ول كىسى ساياتشى ەكەن. مەن اۆتوردىڭ قۇس باپتاۋ, ات باپتاۋ, ساياتشىلىق ونەرى جايىنداعى سۋرەتتەرى مەن اقپاراتتارىن قىزىعىپ وقىپ, زەرتتەدىم. تەكەلەنىڭ تابيعي ەرەكشەلىگىنە دە سۋرەتتەر ارقىلى قانىقتىم. ءبىزدىڭ بۇل جوبامىز قازاقستاننىڭ تابيعاتى جايىنداعى تانىمدىق فيلمگە ارقاۋ بولادى, دەيدى كورەي ءجۋرناليسى سون جۋن حۆان.