جامبىل وڭىرىنەن شىققان جومارت جۇرەكتى ازاماتتار بۇگىندە اۋىلدىڭ وركەندەۋىنە ۇلەس قوسىپ كەلەدى.
ەلىمىزدە باستاۋ العان «تۋعان جەر» جوباسىن قولداعان كاسىپكەرلەر ەلگە پايدالى جۇمىس اتقارۋدا. ماسەلەن, قازىرگى كەزدە شۋ اۋدانى اقسۋ اۋىلىنىڭ تۋماسى بولات تىلەۋجانوۆ اۋىلدىڭ ورتاسىنان اۋماعى 1 گەكتار بولاتىن جەرگە جالپى قۇنى 30 ملن تەڭگەنى قۇرايتىن ساياباق سالىپ جاتىر. ول – بۇگىندە شىمكەنت قالاسىندا شارۋاسىن دوڭگەلەتىپ وتىرعان كاسىپكەر. بىراق اۋىلدان شالعاي جۇرسە دە تۋعان توپىراعىنا دەگەن ىستىق ىقىلاسىن, اۋىل تۇرعىندارىنا دەگەن قۇرمەتىن ۇمىتپاعان.
بۇل كۇندە زەرتحانادان ساياباق ىشىندەگى توپىراقتىڭ ءتيىستى قورىتىندىسى الىنىپ, ناۋرىز مەرەكەسى قارساڭىندا القاپقا تال-داراقتار ەگۋ جۇمىستارى باستالىپ كەتتى. مۇندا تۇرعىندار ءۇشىن ارنايى ساحنا مەن ءساندى ساكىلەر سالىنادى. سونىمەن قاتار ساياباقتىڭ كىرەبەرىسىندە ەڭسەلى اركا مەن كۇزەتشىگە ارنالعان بولمە دە بولادى. ال جاڭا ساياباقتىڭ ىشىنەن بالالاردىڭ ويىن الاڭى دا سالىنادى دەپ جوسپارلانۋدا. سونداي-اق بۇل جەرگە اۋىلدان شىققان بەلگىلى ازاماتتار مەن ەڭبەك ەرلەرىنىڭ ەسىمدەرى جازىلعان ەسكەرتكىش-تاقتا دا ورناتىلادى. جاڭا سالىنىپ جاتقان ساياباق ەل تاۋەلسىزدىگىنىڭ 30 جىلدىعىنا ارنالىپ وتىر. اۋىلدىقتار دا كاسىپكەردىڭ بۇل باستاماسىنا قولداۋ كورسەتىپ, العىس بىلدىرۋدە. وسى ورايدا بولات تىلەۋجانوۆ وسكەن ورتاسىن وركەندەتۋ ءاربىر ازاماتتىڭ پارىزى ەكەنىن, اتالعان ساياباققا 600 ءتۇپ دەكوراتيۆ اعاشىنىڭ كوشەتى ەگىلەتىنىن, بۇگىندە سونىڭ 400-دەن اسا كوشەتى وتىرعىزىلعانىن اتاپ ءوتتى.
اعاش وتىرعىزۋ جۇمىسىنا اۋىل تۇرعىندارى مەن جەرگىلىكتى اتقارۋشى بيلىكتىڭ وكىلدەرى جانە دەمەۋشىنىڭ تۋىستارى تۇگەلگە دەرلىك قاتىستى. شۋ اۋدانىنىڭ اكىمى نۇرجان كالەندەروۆ ءوزى باستاپ اعاش كوشەتىن وتىرعىزىپ, الداعى ۋاقىتتا ساياباقتىڭ ءارى قاراي دامۋىنا ءتيىستى كومەك كورسەتىلەتىنىن جەتكىزدى.
«قولى اشىقتىڭ – جولى اشىق» دەگەن جاقسى ءسوز بار حالقىمىزدا. كەمەل ەلدىڭ كەلىستى كەلەشەگى, ۇلاعاتتى بولاشاعى دەگەندە ىشەر اسىن جەرگە قوياتىن اتپال ازاماتتار اۋدانىمىزدا جەتەرلىك. جاقسى ادامنىڭ جيناعان دۇنيەسى ەمەس, جاقسى اتىنىڭ قالاتىنى وسىندايدان كورىنەدى. اۋىلداعى يگىلىكتى ىستەر تۋعان جەرىنە جاۋاپكەرشىلىكپەن قارايتىن, سول ءوڭىردىڭ توپىراعىنان تۇلەپ ۇشقان تابىستى تۇرعىنداردىڭ ارقاسىندا اتقارىلاتىن جۇمىستار», دەيدى اۋدان اكىمى.
ء«وڭىرىمىزدىڭ ويداعىداي دامۋىنىڭ كەپىلى – پاتريوتيزم مەن ءار تۇرعىننىڭ تۋعان ەلىنىڭ دامۋىنا قوسقان ۇلەسى. ساياباقتى اباتتاندىرۋ ماقساتىندا جوسپارلانعان جۇمىستار تولىعىمەن اياقتالسا, تاۋەلسىزدىگىمىزدىڭ 30 جىلدىق مەرەيتويىنا وراي نىساندى اۋىل اكىمشىلىگىنىڭ يەلىگىنە تارتۋ ەتەمىن», دەيدى كاسىپكەر.
اقسۋلىقتاردىڭ جاڭا ساياباقتى تاماشالايتىن كۇنى الىس ەمەس. مەتسەناتتىڭ اكەسى باقىتجان تىلەجانوۆ تا كەزىندە ويىلعان جولدى ءوز قارجىسىنا جوندەتىپ, ەلگە پايداسىن تيگىزگەن قادىرلى قاريا ەكەن. اۋىلدىقتار بۇگىندە بۇل باستاماعا ءدان ريزا. «مۇنىڭ ءبارى دە – تاۋەلسىزدىكتىڭ بىزگە بەرگەن سىيى. جەكە قاراجاتىن جۇمساپ, بىزگە جاڭا ساياباق سالىپ بەرىپ جاتقان ازاماتقا العىس ايتامىز», دەيدى اۋىل تۇرعىندارى.
جامبىل وبلىسى