شىنىندا ءوتىپ بارا جاتقان جىل كاسىپقوي بوكسشى گەننادي گولوۆكيننىڭ ابىرويىن بۇرىنعىدان دا اسىرىپ, اتاعىنا اتاق قوسقان ايتۋلى جىل بولدى. وسىدان بىرنەشە كۇن بۇرىن ەلىمىزدىڭ سپورت جۋرناليستەرى ونى «قازاقستاننىڭ 2014 جىلعى ەڭ ۇزدىك سپورتشىسى» دەپ تانىدى. ال امەريكانىڭ USA Today باسىلىمى «جىل بوكسشىسى» دەپ اتادى. تاعى ءبىر قاۋىم الداعى 2014 جىل الدەن قاراعاندىلىق قابىلان ءۇشىن بۇدان دا جوعارى بەلەستەردىڭ كەزەڭى بولادى دەپ كەسىپ-ءپىشىپ وتىر.
شىنىندا ءوتىپ بارا جاتقان جىل كاسىپقوي بوكسشى گەننادي گولوۆكيننىڭ ابىرويىن بۇرىنعىدان دا اسىرىپ, اتاعىنا اتاق قوسقان ايتۋلى جىل بولدى. وسىدان بىرنەشە كۇن بۇرىن ەلىمىزدىڭ سپورت جۋرناليستەرى ونى «قازاقستاننىڭ 2014 جىلعى ەڭ ۇزدىك سپورتشىسى» دەپ تانىدى. ال امەريكانىڭ USA Today باسىلىمى «جىل بوكسشىسى» دەپ اتادى. تاعى ءبىر قاۋىم الداعى 2014 جىل الدەن قاراعاندىلىق قابىلان ءۇشىن بۇدان دا جوعارى بەلەستەردىڭ كەزەڭى بولادى دەپ كەسىپ-ءپىشىپ وتىر.
ءار نارسەنىڭ ءبىر سەبەبى بولادى. تەگىندە گەننادي گولوۆكيننىڭ بۇلايشا بارشا جۇرتتىڭ جانارىندا قالىقتاپ, ىنتا-ىقىلاسىنا بولەنۋىنە ونىڭ بيىلعى جىلى ءتورت مارتە شارشى الاڭعا شىعىپ, سونىڭ تورتەۋىن دە مەرزىمىنەن بۇرىن اياقتاعانى ايرىقشا اسەر ەتسە كەرەك. WBA بولجامى بويىنشا الەمنىڭ ورتا سالماقتاعى سۋپەرچەمپيونى بولىپ سانالاتىن جەرلەسىمىز وسى ۇرىستاردىڭ ءبارىن ەرەكشە ءبىر ەكپىنمەن, جاڭاشا ءبىر جىگەرمەن وتكىزدى.
ال بەدەلدى امەريكالىق باسىلىمنىڭ جوعارىداعى «جىل بوكسشىسى» دەگەن اتالىمى ءۇشىن تالاس رەسەيلىك سەرگەي كوۆالەۆ پەن كانادالىق ادونيس ستيۆەنسون ۇشەۋىنىڭ اراسىندا ءوتىپتى. ءداۋىر كوكجيەگىنەن كەتىپ بارا جاتقان جىلى بۇلاردىڭ ۇشەۋى دە رينگكە ءتورت رەتتەن شىعىپتى. وسىنىڭ ءوزى بۇگىنگى تاڭداعى كاسىپقوي بوكستاعى ەليتالى بىلعارى قولعاپ شەبەرلەرى ءۇشىن سيرەك كەزدەسەتىن دەرەك بولىپ تابىلادى. بۇلار سونىڭ تورتەۋىندە دە جەڭىسكە جەتكەن. سونىڭ ىشىندە كوۆالەۆ قارسىلاستارىنىڭ ءبارىن ءتورتىنشى راۋندتان ارىعا جىبەرمەي, تالقانداپ وتىرعان. الايدا, USA Today باسىلىمى ءتۇيىندى ءسال باسقاشا تۇيگەن. ونىڭ ساراپشىلارى سوندىقتان: «بىراق ونىڭ «تورتتىگى» بۇرىن ەشقاشان ءبىرىنشى راۋندتا جەڭىلىپ كورمەگەن الەمنىڭ جارتىلاي اۋىر سالماقتاعى ەكس-چەمپيوندارى تاۆوريس كلاۋد پەن چەد دوۋسوندى تىزەرلەتكەن ستيۆەنسوننىڭ جەڭىستەرى قالقاسىندا ونشالىقتى كورنەكتى بولىپ كورىنە قويمايدى», – دەپ ءبىر تۇيدەكتەتىپ وتەدى دە, ەڭ سوڭىنان: «جەڭىمپاز گولوۆكيننىڭ ءستيلى, شەبەرلىگى, جويقىن سوققىسى ونىڭ تەلەۆيدەنيەدەن كورسەتىلگەن بارلىق ايقاستارىن بوكس جانكۇيەرلەرى ءۇشىن كەرەمەت تارتىمدى كورىنىستەر ەتىپ شىعاردى. سول سەبەپتى دە ءبىز تاپ وسى گولوۆكيندى «جىل بوكسشىسى» ەتىپ تاڭدادىق», – دەپ اعىنان اقتارىلادى. بۇدان باسقا, امەريكالىق باسىلىم گەناعا بريتانيالىق مەتتيۋ ماككلينمەن وتكىزگەن شايقاسىنىڭ ءۇشىنشى راۋندىندا قارسىلاسىنا بەرگەن دۇلەي سوققىسى ءۇشىن ىنتالاندىرۋ سىيلىعىن دا تاپسىرىپتى.
وسى تۇستا امەريكانىڭ Bleacher Report اتتى تانىمال سايتى گەننادي گولوۆكيننىڭ ءبىر جىلدىڭ ىشىندە كەلەشەگىنەن ۇلكەن ءۇمىت كۇتتىرەتىن قاتارداعى بوكسشىدان سۋپەر جۇلدىز دارەجەسىنە دەيىن جەتىپ ۇلگەرگەن تارلان تالانت ەكەنىن ەرەكشە اتاپ ءوتتى. ال ءبىزدىڭ جەرلەسىمىزگە وسىنشالىقتى بيىك باعا بەرىلىپ, جوعارى اتاقتار تاڭىلۋىنا سەبەپ بولعان ۇرىستاردىڭ ىلكىسى ۇستىمىزدەگى جىلدىڭ 13 قاڭتارىندا نيۋ-يوركتە تەگى مەكسيكالىق اقش بوكسشىسى گابريەل روسادومەن ءوتىپ ەدى. سول جولى گەنا ءوزىنىڭ WBA بولجامى بويىنشا الەم چەمپيونى دەگەن اتاعىن التىنشى مارتە, IBO نۇسقاسى بويىنشا ءۇشىنشى رەت قورعادى. سونىمەن بىرگە, بۇل ونىڭ نۆو تەلەارناسىنان كورسەتىلگەن ەكىنشى جەكپە-جەگى بولدى. بىراق بۇل جۇرتتىڭ ءبىرازى الدىن الا بال اشقانداي, بىردەن روسادانىڭ مۇرىنى جەر يىسكەيتىندەي تەكەتىرەس بولعان جوق. كەرىسىنشە ءوز جانكۇيەرلەرىنىڭ قۋاتتى قولداۋىنا سۇيەنگەن الاڭ يەسى العاشقىدان ارىنداپ العا ۇمتىلدى. ءبىر كەزدە قارسى شابۋىل تاكتيكاسىنا جاقسى ەنىپ العان ول بىرتە-بىرتە ءدال سوققىسىنىڭ سانىن دا ارتتىرا ءتۇستى. دەگەنمەن, بۇل جۇدىرىق سىلتەستەر كەيىن كەلە گولوۆكيننىڭ اۋانىڭ اپشىسىن قۋىرىپ بارىپ, قارسىلاسىن قارىپ تۇسەتىن سۇرگىن سۇرمەلەرىنە قاراعاندا, بالانىڭ ويىنشىعىنداي عانا بولىپ كورىنە بەردى. اقىرىندا قارسى جاقتىڭ كومانداسى ءوز باعلاندارىنىڭ ءمۇشىنىڭ كۇشى باسىم قازاقستاندىق بوكسشىنىڭ سۇراپىل تەگەۋرىنىنە توتەپ بەرە الماي بارا جاتقانىنا انىق كوزدەرى جەتكەسىن, ورتاعا ورامال تاستاپ, ساۋعا سۇرادى. ءسويتىپ, گەننادي ۇرىستى 7 راۋندتا تەحنيكالىق نوكاۋتپەن اياقتادى.
قاراعاندىلىق قارشىعانىڭ ەل ەسىندە قالعان ەكىنشى شايقاسى 30 ناۋرىز كۇنى موناكو كىنازدىگىنىڭ مونتە-كارلو قالاسىندا كوگەن جازدى. ول وسىندا جاپون جۇلدىزى نوبۋحيرو يسيدامەن قولعاپ ءتۇيىستىردى. بۇل جولى گەنا ءبىرىنشى بولىپ العا تارتتى. بىراق وجەت جاپون دا كەرى شەگىنە قويمادى. دەگەنمەن, چەمپيوننىڭ شىرەنە تاستاعان شەڭبەرلەرى وكيناۆا وعلانىن ءبىراز تەڭسەلتىپ تە تاستادى. العاشقى ەكى راۋند وسىلايشا گولوۆكيننىڭ ۇستەمدىگىن ۇلپىلدەتىپ كورسەتتى. جۇرت بۇل كەزدە ونىڭ وسىنشالىقتى اۋىر سوققىلارعا توتەپ بەرىپ تۇرعان باسەكەلەسىنە دە قايران قالا باستاپ ەدى. جوق, ۇزامادى, ءۇشىنشى راۋند اياقتالا بەرگەن شامادا ءبىزدىڭ باعلان تايتالاسقان تارلانىن كەسكەن تەرەكتەي سۇلاتىپ ءتۇسىردى. نوكاۋت! بۇعان گەنا سول قولىمەن اپپەركوت جاساپ, جاپوننىڭ وڭ قۇلاعىن جاپىرا سوعۋى ارقىلى وياعا كەلتىردى.
شاحتەرلەر شاھارىنىڭ شاكىرتى امەريكانىڭ ماشانتاكەت قالاسىندا اعىلشىن مەتتيۋ ماككلينمەن بولعان ءۇشىنشى كەزدەسۋىندە وسىلاي تازا نوكاۋتپەن اياقتادى. بۇل جولى دا ول ءۇشىن جەڭىستىڭ جالاۋى ءۇشىنشى راۋندتا جەلبىرەدى. جوعارىداعى باسىلىمنىڭ تارتىمدى تارتۋىنا يە بولعان بۇل شايقاس تا قازاقستاندىقتىڭ ايقىن باسىمدىعىن تانىتتى. بىراق ۇرىس ەكى جاقتى دا قايتپاي ۇرىس سالۋى ارقىلى ءوربىپ الا جونەلدى. قازاقستاندىق جىگىت راۋندتىڭ سوڭعى شيرەگى كەلگەندە عانا ءوزىنىڭ ارتىقشىلىعىن كورسەتىپ ۇلگەردى. الدىمەن ونىڭ تىكەلەي ۇرعان كروسى كوزدەگەن جەرىنە ءبىرىنشى رەت ءدال ءتيىپ, سوڭىنان سول قولىمەن بەرگەن حۋگى ماككليندى شاتقاياقتاتىپ جىبەردى. ال, ءۇشىنشى راۋندتا ءبارىن گەنانىڭ ءبىر سوققىسى شەشىپ كەتتى.
گولوۆكين ءتورتىنشى شايقاسىن دا اقش جەرىندە وتكىزدى. تاعى نيۋ-يوركتىڭ اتاقتى «مەديسون سكۆەر گاردەن» سارايىندا كەرۋەن كەرگەن كەزدەسۋ ەندى امەريكالىق كەرتيس ستيۆەنستىڭ شاما-شارقىن بايقاۋعا ارنالدى. مۇندا گەنا قارسىلاسىن ءتورت رەت نوكداۋنعا جىبەردى. العاش رەت ەكىنشى راۋندتا ورىن العان سونداي سۇراپىل سوققى كەرتيستى سەگىزىنشى راۋندتا ءۇش رەت قولىمەن جەر تىرەۋگە ءماجبۇر ەتتى. وسىدان كەيىن الاڭداعى اربيتر ۇرىستى اياقتاۋعا پارمەن بەردى.
قازاقستاندىق كاسىپقوي بوكسشى گەننادي گولوۆكيننىڭ 2013 جىلدىڭ جۇلگەسىندەگى جەڭىستى جورىقتارىنىڭ جاي-جاپسارى وسىنداي. باۋىرىنىڭ وسى تولاعاي تابىستارى وعان جاتتىقتىرۋشى بولىپ قىزمەت ەتىپ كەلە جاتقان ەگىز سىڭارى ماكسيم گولوۆكينگە دە بيىل قۇت بولىپ دارىدى. ول جاقىندا عانا «قازاقستاننىڭ ەڭبەك سىڭىرگەن جاتتىقتىرۋشىسى» دەگەن جوعارى اتاققا يە بولدى.
ال ءبىز بيىلعى جىلعى ءساۋىر ايىندا قازاقستان حالقى اسسامبلەياسىنىڭ حح سەسسياسىندا ءسويلەگەن سوزىندە: «مەنىڭ اكەم – ورىس, انام – كورەي قىزى, ال مەن – قازاقپىن!», – دەگەن ءمالىمدەمەنى تازا قازاق ءتىلىندە جەتكىزگەن گەننادي گولوۆكيننىڭ جەڭىستەرىنە الداعى ۋاقىتتاردا دا قۋانا قول سوعۋدان ءۇمىتتىمىز.
سەرىك ءپىرنازار,
«ەگەمەن قازاقستان».