بەلارۋس ەلىنىڭ استاناسى مينسك قالاسىندا وسىمەن ءتورتىنشى رەت قازاق كۇرەسىنەن جالاۋى جەلبىرەگەن الەم چەمپيوناتى ءوتىپ, ءبىزدىڭ بالۋاندارىمىز بارلىق سالماقتا الەم چەمپيونى اتاعىن جەڭىپ الدى. بۇل تۋرالى www.egemen.kz ءتىلشىسى حابارلادى.
اتاپ ايتقاندا, 60 كيلو سالماقتا ابزال ارىستانبەكوۆ, 70 كيلودا ەرلان ەستەك, 80 كيلودا ەرسىن مۇحامەدجانوۆ, 90 كيلو سالماقتا مۇحيت تۇرسىنوۆ جانە ەڭ اۋىر سالماق دارەجەسىندە بيىلعى «قازاقستان بارىسى» ايبەك نۇعىماروۆ الەم چەمپيونى اتاندى. سونىمەن بىرگە الپامىس توكيەۆ (90 كگ) كۇمىس جۇلدەگەر بولسا, امانگەلدى ساتىپالدينوۆ (60 كگ) ەراسىل ساكەن ۇلى (70 كگ) مەن ادىلجان ىستىباەۆ (80 كگ) قولا جۇلدەگە يە بولدى. بۇدان باسقا ءابسوليۋتتى سالماقتا ماقسات مازىباەۆ موڭعول بالۋانى سۇعارجارعىل بولدپۋرەۆتى جەڭىپ, بەيبىت ىستىباەۆتىڭ «ەۋرازيا بارىسىنداعى» جەڭىسىن قايتالادى.
جالپى, بيىلعى الەم چەمپيوناتى جوعارى دەڭگەيدە ءوتتى. وعان 29 ەلدىڭ بالۋاندارى قاتىستى. مۇنىڭ الدىندا 2006 جىلى الماتىدا, 2008 جىلى رەسەيدىڭ ور جانە 2010 جىلى استانادا وتكەن الەمدىك دوداعا دا وسىنشاما ەلدەردىڭ بالۋاندارى قاتىسىپ, كۇش سىناسقان بولاتىن.
داستان كەنجالين.
دەرەككوز: egemen.kz.