مەملەكەت كاسىپكەرلەر قۇقىعىن قورعاۋ باعىتىندا ءتۇرلى شارا قولدانىپ, زاڭ تالابىن مەيلىنشە جەڭىلدەتۋگە ۇمتىلىپ وتىر. ەسەسىنە, ىسكەر ازاماتتاردىڭ قولىنداعى ءوندىرىس وركەندەپ, جۇمىس ورنى كوبەيىپ, شاعىن جانە ورتا بيزنەس تاراپىنان ەكونوميكاعا قوسىلعان ۇلەس تە ارتىپ كەلەدى.
دەگەنمەن قوعامدا جەكە كاسىپكەردىڭ جولىن كەسەتىن, ەل ىشىندەگى ىسكەرلىكتىڭ ىلگەرلەۋىنە كەدەرگى كەلتىرۋشىلەر دە كەمىمەي تۇر. اتاپ ايتقاندا, كاسىپكەرلەردىڭ مۇددەسىن قورعايتىن ۇيىمدار بيزنەستىڭ دامۋىنا بارىنشا قارسى بولاتىن كەرتارتپا كوزقاراستاعى كىسىلەردىڭ ءھام توپتىڭ بارىن جوققا شىعارمايدى ەكەن. مۇنداي ارەكەتتەردىڭ ارتىندا جەڭ ۇشىنان جالعاسقان جەمقورلىق پەن جەكە مۇددەنى كوزدەۋشىلەردىڭ تۇرعانى دا جاسىرىن ەمەس. مىسالى, وتكەن جىلى الماتى وبلىسىندا كاسىپكەرلەردىڭ قۇقىعىن اياققا تاپتاۋدىڭ كەسىرىنەن بيزنەس 1,2 ملرد تەڭگە زيان شەككەن.
– ايماقتاعى بيزنەستىڭ تۇيتكىلدى ماسەلەلەرىنىڭ قاتارىندا مەملەكەتتىك ساتىپ الۋ مەن جەر قاتىناستارى سالاسى, مەملەكەتتىك ورگانداردىڭ ءىس-ارەكەتتەرىنە شاعىمدار, سالىق, اگروونەركاسىپتىك كەشەن سالاسىنداعى كەلەڭسىز ارەكەتتەردى اتاۋعا بولادى. وتكەن جىلى ءبىزدىڭ پالاتاعا كاسىپكەرلەردىڭ قۇقىعىن قورعاۋ بويىنشا زاڭدى تۇلعالاردان 233 ءوتىنىش كەلىپ ءتۇستى, ونىڭ 88-ءى وڭ شەشىمىن تاپتى. بىلتىر ءبىزدىڭ قولداۋىمىزدىڭ ارقاسىندا بيزنەس قۇقىعى جالپى سوماسى 1,2 ملرد تەڭگەگە قورعالدى, بۇل 2019 جىلمەن سالىستىرعاندا ەكى ەسە كوپ, – دەيدى وبلىستىق كاسىپكەرلەر پالاتاسىنىڭ باسشىسى اسەت شاياحمەتوۆ.
داۋلى ماسەلەلەردى شەشۋگە پالاتا وكىلدەرى ءۇشىنشى تاراپ رەتىندە قول ۇشىن سوزىپ وتىر ەكەن. ماسەلەن, بىلتىر زاڭگەرلەر سوتتا «الساد قازاقستان» جشس قۇقىعىن قورعاپ, سوتقا جۇگىنگەن. كومپانيا سوتتان مەملەكەتتىك ورگاننىڭ ارەكەتىن زاڭسىز دەپ تانۋدى جانە 2020 جىلعى ناۋرىزدان مامىرعا دەيىن تاعامدىق تاۋىق جۇمىرتقاسى ءوندىرىسىنىڭ قۇنىن ارزانداتۋعا وتىنىمدەر قابىلداۋ جانە سۋبسيديالار تولەۋ بويىنشا بۇزىلعان قۇقىقتارىن قالپىنا كەلتىرۋدى تالاپ ەتكەن. ءىستى قاراعان سوت كاسىپورىننىڭ 56 ملن تەڭگە كولەمىندەگى تالاپ-ارىزىن قاناعاتتاندىرۋ تۋرالى شەشىم شىعارىپتى. سونداي-اق پالاتا ساراپشىلارىنىڭ قاتىسۋمەن 243 نورماتيۆتىك-قۇقىقتىق اكتىلەر قارالىپ, ءتيىستى شەشىمىن تاۋىپتى.
جالپى, وتكەن جىلى الماتى وبلىسىندا 16 مىڭنان استام كاسىپكەر سەرۆيستىك قىزمەت پەن كەڭەس العان ەكەن. ونىڭ ىشىندە بيزنەستى قارجىسىز قولداۋ باعىتىنداعى جۇمىس قارقىندى جۇرگىزىلىپتى.
– ءبىز بىلتىر ءوڭىردىڭ 16 مىڭنان استام كاسىپكەرىنە 17,5 مىڭ سەرۆيستىك جانە كونسۋلتاتسيالىق قىزمەت كورسەتتىك. كاسىپكەرلەر, نەگىزىنەن, جەكە كاسىپكەرلىك اشۋ, بيزنەس-جوسپاردى ازىرلەۋ, بۋحگالتەرلىك ەسەپتى تاپسىرۋ سياقتى قىزمەتتەرگە كوپ جۇگىندى. ءبىزدىڭ پالاتانىڭ ارالاسۋىمەن 1,3 مىڭ جوبا مەملەكەتتىك قولداۋ قۇرالدارى اياسىندا قارجىلاندىرىلدى. سونداي-اق مەنەدجەرلەرىمىز جالپى سوماسى 50 ملرد تەڭگەگە جۋىقتايتىن 529 بيزنەس-جوسپار ازىرلەدى. ونىڭ ىشىندە 5,2 ملرد تەڭگەنىڭ 153 جوباسى ىسكە استى, – دەيدى اسەت شاياحمەتوۆ.
الماتى وبلىسى