قازاقستاندا بيىل 6 ميلليون ادامعا كوروناۆيرۋسقا قارسى ۆاكتسينا سالۋ كوزدەلگەن. بۇل تۋرالى ۇكىمەت وتىرىسىندا دەنساۋلىق ساقتاۋ ءمينيسترى الەكسەي تسوي ءمالىم ەتتى, دەپ حابارلايدى Egemen.kz
«كونتينگەنت كەلەسى تارتىپتە بەلگىلەنگەن: ءبىرىنشى كەزەڭدە ينفەكتسيالىق اۋرۋحانالاردىڭ مەديتسينا قىزمەتكەرلەرىنە, جەدەل جاردەم قىزمەتىنىڭ ماماندارىنا, جان ساقتاۋ ءبولىمىنىڭ, العاشقى مەديتسينالىق-سانيتارلىق كومەك قىزمەتىنىڭ, اۋرۋحانالاردىڭ قابىلداۋ ءبولىمىنىڭ, سانيتارلىق-ەپيدەميولوگيالىق قىزمەتتىڭ ماماندارىنا, ناقتىراق ايتقاندا 100 مىڭعا تارتا ازاماتقا ۆاكتسينا سالىنادى», - دەدى الەكسەي تسوي ۇكىمەت وتىرىسىندا.
ونىڭ ايتۋىنشا, ەكىنشى كەزەڭدە جالپى ءبىلىم بەرەتىن مەكتەپتەردىڭ مۇعالىمدەرىنە, جوو وقىتۋشىلارىنا, ۆەدومستۆولىق مەديتسينا قىزمەتىنىڭ ماماندارىنا, ناقتىراق ايتقاندا ناۋرىز ايىنان باستاپ شامامەن 150 مىڭ ادامعا ەكپە ەگىلەدى. ءۇشىنشى كەزەڭدە مەكتەپ-ينتەرناتتارىنىڭ پەداگوگتەرىنە, بالالار مەن مەكتەپكە دەيىنگى مەكەمەلەردىڭ قىزمەتكەرلەرىنە, ستۋدەنتتەرگە, سوزىلمالى اۋرۋلارى بار ازاماتتارعا (ساۋىردەن باستاپ شامامەن 600 مىڭ ادام) ۆاكتسيناتسيالاۋ جۇرگىزىلەدى.
ۆاكتسينانى جەتكىزۋ لەگى 4 كەزەڭنەن تۇرادى.
• ءبىرىنشى كەزەڭ - وندىرۋشىدەن بىرىڭعاي ديستريبيۋتوردىڭ قويماسىنا دەيىن جەتكىزۋ;
• ەكىنشى كەزەڭ – بىرىڭعاي ديستريبيۋتوردىڭ قويماسىنان دەنساۋلىق ساقتاۋ باسقارمالارىنىڭ دارىحانالىق قويماسىنا دەيىن جەتكىزۋ;
• ءۇشىنشى كەزەڭ - دەنساۋلىق ساقتاۋ باسقارمالارىنىڭ دارىحانالىق قويماسىنان اۋداندار مەن قالالاردىڭ مەديتسينا ۇيىمدارىنا دەيىن جەتكىزۋ;
• ءتورتىنشى كەزەڭ – مەديتسينا ۇيىمدارىندا وسى ۆاكتسينالاردى ساقتاۋ.