فۋتزالدان قازاقستاننىڭ ۇلتتىق قۇراماسى مەن الماتىنىڭ «قايرات» كلۋبىنىڭ قاقپاشىسى يگيتا 2020 جىلدىڭ قورىتىندىسى بويىنشا الەمنىڭ ۇزدىك گولكيپەرى اتانۋى مۇمكىن.
برازيليانىڭ ريو-دە-جانەيرو قالاسىندا تۋىپ-وسكەن ايتۋلى فۋتزالشى 2011 جىلدان بەرى «قايراتتا» ونەر كورسەتۋدە. 2013 جىلى قازاقستاننىڭ ازاماتتىعىن الىپ, ۇلتتىق كوماندامىزدىڭ جەيدەسىن كيدى. سول كەزدەن بەرى وزىنە عانا ءتان كەرەمەت ويىن مانەرى جانە تەڭدەسسىز ونەرىمەن كوزگە ءتۇسىپ, سان ميلليون جانكۇيەردىڭ جۇرەگىن جاۋلادى. بۇگىنگى تاڭدا الماتىنىڭ «قايرات» كلۋبىنىڭ بيىك بەلەستەردى باعىندىرىپ, تورتكۇل دۇنيەگە تانىلۋىنا يگيتانىڭ ەڭبەگى وراسان زور ەكەنى ەش داۋ تۋعىزباسا كەرەك. 2015, 2016, 2018 جانە 2019 جىلدارى ول الەمنىڭ ەڭ ۇزدىك قاقپاشىسىنا تيەسىلى ارنايى سىيلىقتى يەلەندى. مىنە, ەندى بەسىنشى رەت تەڭدەسسىز دەپ تانىلۋىنا تاماشا مۇمكىندىك تۋىنداپ وتىر.
يگيتادان بولەك, جوعارىدا اتالعان اتاقتان ۇمىتكەرلەر قاتارىندا كارەكا (برازيليا), ديداك ولترا (يسپانيا), ەدۋ (پورتۋگاليا), گۋيتتا, (برازيليا), حەسۋس ەررەرو (يسپانيا), ديەگو رونكالو (برازيليا), اليرەزا ساميمي (يران), البەرت تسايدەر (رەسەي) جانە ۆيلليان (برازيليا) سىندى قاقپاشىلار بار.