مەن ون سەگىز جىلدان بەرى زەينەت دەمالىسىندامىن, بۇل ارينە از ۋاقىت ەمەس. ون سەگىز جىل بۇرىن دۇنيەگە كەلگەن ۇلدارىمىز بۇگىن ەر جەتتى, قىزدارىمىز بوي جەتتى. بۇگىندە ءوزىم ىڭقىل-سىڭقىلمەن سەكسەننىڭ سەڭگىرىنە شىعىپ, بەيبىت زاماندا مەملەكەت قامقورىمەن كۇن كەشىپ جاتىرمىن.
ەل ەكونوميكاسىنىڭ تىعىرىققا تىرەلگەن شاعىن باستان كەشتىم. ودان شىعۋ ءۇشىن وتپەلى كەزەڭدە ۇكىمەت حالىق مۇددەسىنە ساي جەدەل شەشىمدەر قابىلداپ, ەل تۇرمىسىن ونىڭ سۇرانىسىنا ساي جاقسارتۋعا تىرىستى. بىراق ول شەشىمدەردى تەز ارادا جۇزەگە اسىرۋ وڭاي بولعان جوق. تاۋەلسىزدىگىمىزدى باياندى ەتۋ جولىندا قانشاما ىزدەنىسكە بارىپ, قانشاما قيىندىقتى باستان كەشىرۋگە تۋرا كەلگەنىن ەل تىزگىنىن ۇستاپ, وسى ماسەلەلەرمەن تىكەلەي اينالىسقان جاۋاپتى لاۋازىمداعىلار جاقسى بىلەدى.
تاۋەلسىزدىگىمىزدىڭ العاشقى جىلدارى بۇرىنعى سوتسياليستىك جۇيەگە بەيىمدەلگەن كادرلار حالىقتىڭ كۇنكورىس ماسەلەلەرىن تەز ارادا شەشۋگە قاۋقارسىز بولدى. الايدا تۇڭعىش پرەزيدەنت از ۋاقىت ىشىندە ماڭايىنا تاۋەكەلگە بارا الاتىن, وزىنە ءوزى سەنىمدى, ىنتالى مامانداردى ىرىكتەپ, ەل مۇددەسىنە قىزمەت ەتۋگە باعىتتاي الدى. ەلباسى باستاماسىمەن جوعارىدان باسقارىلاتىن جوسپارلى شارۋاشىلىق جۇرگىزۋ تاسىلدەرى تەز ارادا جويىلىپ, تاۋار ءوندىرۋشى كاسىپورىندار مەملەكەت مەنشىگىنەن الىنىپ, جەكەنىڭ مەنشىگىنە بەرىلدى. وسىلايشا, كاپيتاليستىك جۇيەگە نەگىزدەلگەن تاۋەلسىز مەملەكەت قۇرۋ ءۇشىن نارىقتىق ەكونوميكا ارەكەتتەرىنە بارساڭ دا باراسىڭ, بارماساڭ دا باراسىڭ دەگەن ءۇزىلدى-كەسىلدى تالاپ قويىلدى. سول كەزدەن باستاپ, مەنشىكتى مەملەكەت يەلىگىنەن الۋ, جەكەشەلەندىرۋ جانە مەنشىككە دەربەستىك بەرۋ دەگەن جاڭا تەرميندەر قولدانىسقا ەندى.
وعان دەيىن وداقتىق جوسپارلاۋ, ياعني «گوسپلان» دەگەن ورگاننىڭ حالىقتىق شارۋاشىلىق كەشەنى تاراتىلىپ, ماسكەۋ ەندىگى جەردە وداقتاس رەسپۋبليكالار ورتالىققا قول جايماي, ءوز كۇندەرىن وزدەرى كورسىن دەۋگە ءماجبۇر بولعان ەدى. وسىنىڭ ناتيجەسىندە وداقتىق ءوندىرىس ورىندارى جويىلىپ, كۇندەلىكتى ومىرگە قاجەت تاۋارلار ءوندىرىسى توقتاپ, دۇكەن سورەلەرى قاڭىراپ بوس قالدى. وسىنداي ەكونوميكالىق داعدارىستا ءبىز وداقپەن قوشتاسىپ, تاۋەلسىز قازاق مەملەكەتىنىڭ قابىرعاسىن قالاۋدى باستادىق, ايتۋعا ارينە وڭاي, تاجىريبەلىك تۇرعىدا وعان كەدەرگىلەر از بولعان جوق. ەل ەكونوميكاسىنىڭ تەز ارادا تىعىرىقتان شىعىپ, وركەندەپ دامي باستاۋىندا تۇڭعىش پرەزيدەنتتىڭ باتىل ارەكەتتەرى شەشۋشى ءرول اتقاردى. ول كىسىنىڭ كوش باستاۋعا لايىقتى تۇلعا ەكەنىن ۋاقىتتىڭ ءوزى دالەلدەپ بەردى.
تاۋەلسىزدىككە بەتبۇرىس باستالعان كەزدە ەلباسى وسى جاعدايلاردى حالىققا دالەلدى تۇردە ءتۇسىندىرىپ: «تاۋەلسىز مەملەكەت قۇرۋ بۇرىن-سوڭدى ءبىزدىڭ تاجىريبەمىزدە بولعان جوق. ول ءۇشىن ەندى قىرۋار جۇمىستار اتقارۋ قاجەت. سوندىقتان الدا ءالى تالاي قيىندىقتار بولادى. قاتەلىكتەر دە بولۋى مۇمكىن», دەپ اشىق ايتتى. وسىلايشا, مەملەكەت باسشىسى حالىقتى وتپەلى كەزەڭنىڭ نەبىر قيىندىقتارىنا توزە بىلۋگە شاقىردى. العاشىندا ءبىز «بۇل كەشەگى كەڭەس زامانىنداعى جالاڭ ۇراندار سياقتى بولىپ قالماس پا ەكەن؟» دەپ تە ويلادىق. بىراق كوپ كەشىكپەي ول كەزەڭنىڭ قيىندىقتارىن ءار ادام جان-تانىمەن سەزدى, اركىم بۇرىنعىداي مەملەكەتكە قول جايۋدان ارىلا باستادى. سودان كەيىن مەملەكەت مەنشىگىندەگى كاسىپورىندار بانكروتقا ۇشىراپ, ولاردىڭ م ۇلىكتەرى جەكەشەلەندىرىلدى, بورىشتارى جويىلدى. مەنشىك يەلەرى ەكونوميكالىق بوستاندىق الىپ, سۇرانىسقا ساي ءونىم شىعاراتىن شاعىن كاسىپورىندار اشىپ, وزدەرىنىڭ پوزيتسيالارىن كۇشەيتتى. شاعىن جانە ورتا كاسىپكەرلىكپەن اينالىسۋعا ۇكىمەت تاراپىنان كوپتەگەن جەڭىلدىك جاسالدى. بۇل جۇمىستاردىڭ بۇگىنگە دەيىن جالعاسىپ جاتقانىن كوزىمىز كورىپ وتىر. وسى يگى ىستەردىڭ باسى-قاسىندا ءوزىم دە جۇرگەندىكتەن, تاۋەلسىزدىك مەرەكەسى قارساڭىندا كورگەن-بىلگەنىمدى ايتىپ, وتكەن تاريحتى ەسكە العاندى ءجون كوردىم.
بارشامىزعا تاۋەلسىزدىك كۇنى مەرەكەسى قۇتتى بولسىن! ەلدە تىنىشتىق, بىرلىك بولسا, الىنبايتىن قامال, اسۋ بەرمەيتىن اسقار جوق, مەن وعان كامىل سەنەمىن! تاۋەلسىز قازاقستانعا تاۋەلدى بولايىق, اعايىن!
مىرزاعالي قۇرمانوۆ,
زەينەتكەر
قوستاناي وبلىسى,
توبىل قالاسى