قىتاي استاناسى – بەيجىڭ قالاسىنداعى بالالار اۋرۋحاناسىندا كۇتپەگەن وقيعا ورىن الدى. تۋعانىنا 16 اي بولعان نارەستە قۇلاعى ىشىنە ءوسىپ شىققان باقباقتى تامىرىمەن الىپ تاستاۋعا ارنالعان وتا جاسالعان بولاتىن. بۇل تۋرالى يتار-تاسس حابارلادى.
جەرگىلىكتى بۇقارالىق اقپارات قۇرالىنداعى جاريالانعان اقپاراتتا الگى وسىمدىكتىڭ كولەمى 2 سانتيمەتر ەكەنى جازىلعان. بۇل باقباق 4 اي كولەمىندە سىرتقا ءوسىپ شىققان. ءبۇلدىرشىن اناسى جۋرناليستەرگە بەرگەن سۇحباتىندا وسىدان ءبىرشاما مەرزىم بۇرىن بالاسى قۇلاعىن مازاسىزدانىپ قاسىپ, جىلاي بەرگەسىن دارىگەرلەرگە كورسەتكەنىن ايتىپتى. ونى تەكسەرگەن دارىگەرلەر قىز بالانىڭ قۇلاعىنا باقباق ءوسىپ كەلە جاتقانىن انىقتاعان. نارەستە اناسى بۇدان كەشىرەك قيمىلداعاندا, وسىمدىك تامىرى مي قاباتىنا قاراي وركەن جايىپ كەتەدى ەكەن. وسىعان دەيىن بۇل جەرگە قۇلاقتارىنا جەر جاڭعاق, ءىرى بۇرشاق نەمەسە شەگە ءتۇسىپ كەتكەن ادامدار كەلگەن كورىنەدى. ال قۇلاق ىشىنە باقباق ءوسۋ جاعدايى ءبىرىنشى رەت كەزدەسىپ وتىر. «باقباق قۇلاق قۋىسىن تولىق جاۋىپ قالىپتى, ونى اۋىرتپاي الۋ ءۇشىن انەستەزيا جاساۋعا تۋرا كەلدى», – دەيدى دارىگەر-وتولارينگولوگ گۋ تسينلۋن. ول ءسوز ورايىندا مۇنىڭ الدىندا قۇلاعىنان 100-گە جۋىق قۇرتتار تىزبەگى تابىلعان ءسابي كەلگەنىن اتاپ ءوتتى. جالپى, جەرگىلىكتى جەردەگى اۋرۋحاناعا جىلىنا دەنەسىنىڭ ءار جەرىنەن وزگەرىس بايقالعان 200-دەي ادام كەلەدى ەكەن.
باقىتبەك كەنەش ۇلى.
دەرەككوز: يتار-تاسس