شاراينا
بۇۇ جانىنداعى ادام قۇقى جونىندەگى كەڭەس كوميسسياسى سيريا پرەزيدەنتى باشار اسادتىڭ رەجىمىنە قارسى ايىپتاۋلارمەن شىقتى. وندا رەجىمنىڭ ادامزاتقا قارسى قىلمىس جاساعانى اتاپ كورسەتىلەدى. «دەيلي تەلەگراف» كوميسسيا تۇزگەن قۇپيا تىزىمدە اتالعان قىلمىسقا قاتىسى بارلاردىڭ اتى اتالىپ, ءتۇسى تۇستەلەدى ەكەن.
شاراينا
بۇۇ جانىنداعى ادام قۇقى جونىندەگى كەڭەس كوميسسياسى سيريا پرەزيدەنتى باشار اسادتىڭ رەجىمىنە قارسى ايىپتاۋلارمەن شىقتى. وندا رەجىمنىڭ ادامزاتقا قارسى قىلمىس جاساعانى اتاپ كورسەتىلەدى. «دەيلي تەلەگراف» كوميسسيا تۇزگەن قۇپيا تىزىمدە اتالعان قىلمىسقا قاتىسى بارلاردىڭ اتى اتالىپ, ءتۇسى تۇستەلەدى ەكەن.
باسىلىمنىڭ جازۋىنشا, تىزىمدە سيريا قالالارىنداعى تۇرعىن ءۇي اۋداندارىن زەڭبىرەكتەردەن اتقىلاۋعا, سونداي-اق, ادامداردى ولتىرگەندەر مەن ازاپتاعاندارعا, ايەلدەر مەن بالالاردى قوسا العاندا, اۋرۋحانالاردا جارالى وپپوزيتسيونەرلەردى قيناعاندارعا جاۋاپتىلار مەڭزەلىپتى. كوميسسيا كورسەتىلگەن قىلمىستارعا ب.اسادتىڭ شەنەۋنىكتەرىن ايىپتاپ وتىر ەكەن. تىزىمگە ناقتى كىمدەر كىرگەنى ازىرشە بەلگىسىز. بۇعان دەيىن وعان پرەزيدەنت ب.اساد تا كىرەدى دەگەن اڭگىمە ايتىلىپ كەلگەن بولاتىن.
يانۋكوۆيچتى قولداعاندار اكتسياسى
ۋكراينادا مازاسىز كۇندەر مەن تۇندەر جالعاسۋدا. حالىق تا بيلىككە قارسىلار جانە جاقتاستار بولىپ ەكىگە ءبولىنىپ وتىر. كەشە ۋكرايناداعى بيلەۋشى وڭىرلەر پارتياسىنىڭ وكىلدەرى پرەزيدەنت ۆيكتور يانۋكوۆيچتى قولداعان اكتسيالارىن باستادى.
اكتسيالار كيەۆتەگى ماريا ساياباعىندا جانە جوعارى رادا ماڭىندا باستاۋ الدى. بۇگىن ءبىز ماريا پلاتسدارمىن الدىق... ءبىز... پرەزيدەنت پەن ءبىزدىڭ پارتيامىزدى قولداۋ جونىندەگى اكتسيامىزدى باستاۋدامىز, دەدى وڭىرلەر پارتياسىنان بۇرىنعى دەپۋتات يۋري بولدىرەۆ شارا باسىندا سويلەگەن سوزىندە. سونداي-اق, ول ۋكرايناداعى بيلىككە قارسى سوڭعى وقيعالاردى «فاشيستىك توڭكەرىسكە» ارەكەت دەپ باعالادى. وسى ارالىقتا وپپوزيتسياداعى «ۋدار» قوزعالىسىنىڭ سەركەسى ۆيتالي كليچكو باس بىرىكتىرسەك, الىنبايتىن اسۋ جوق دەپ مالىمدەدى.
قىسقا قايىرىپ ايتقاندا:
* «روساتوم» مەملەكەتتىك كورپوراتسياسىنان 45 ملن. رۋبل قولدى بولعان. وسىعان بايلانىستى قىلمىستىق ءىس قوزعالدى. اقشا ۇرلانعانىن ءىىم قىزمەتكەرلەرى انىقتاعان سىڭايلى.
* اۋعاندىق ەسىرتكى ساۋدالاۋشىلار 30 جاستاعى تاجىكستان ازاماتى ميرماد باروتوۆتى ۇرلاپ كەتكەن. ونى بوساتۋ ءۇشىن اقشا تالاپ ەتىپتى. ەگەر اقشا تولەنبەگەن جاعدايدا ونىڭ باسىن الامىز دەپ قوقان-لوقى جاساپتى. سويتسە, ۇرلانعاننىڭ ۇلى ەسىرتكى پارتياسى ءۇشىن قارىزىن قايتارماپتى.
*جانۋارلاردى قورعاۋشىلاردىڭ ءبىر توبى نيۋ-يورك باسشىلىعىنا 26 جاستاعى توممي دەپ ايدار تاعىلعان شيمپانزەنى جەكە تۇلعا رەتىندە رەسمي تانۋ تۋرالى ءوتىنىش ءتۇسىرىپتى. بەلسەندىلەر وسىلايشا ەرلى-زايىپتىلاردىڭ يەلىگىندە قاماۋدا ۇستالاتىن مايمىلدىڭ بوستاندىققا شىعارىلۋىن تالاپ ەتكەن.
پۋتينگە نارازىلار كوپ
رەسەي پرەزيدەنتى ۆلاديمير پۋتين ارمەنياعا ساپارمەن كەلگەن بولاتىن. ەۋروپالىق ينتەگراتسيانى جاقتاۋشىلار ارمەنيانىڭ كەدەن وداعىنا وتۋىنە قارسىلىق تانىتىپ, رەسەي باسشىسىنىڭ ساپارىنا نارازىلىقتارىن ءبىلدىردى.
ارمەنيانىڭ استاناسى – ەرەۆان قالاسىنىڭ ورتالىعىنا جينالعان مىڭداعان بەلسەندىلەر ءوز ەلدەرىنىڭ ەۋروپاعا ينتەگراتسيالانعانى ۇتىمدى ەكەنىن ايتىپ, ۇران كوتەردى. «ءبىز ءوز ەلىمىزدىڭ قوجايىندارىمىز!» دەپ ۇرانداتتى جينالعاندار. سونىمەن قاتار, ولار ارمەنيا پرەزيدەنتى سەرج سارگسياننىڭ وتستاۆكاعا كەتۋىن تالاپ ەتتى. اكتسيا ورنىنا پوليتسيا كوپتەپ شوعىرلاندىرىلدى. ولاردىڭ اراسىندا جاي كيىم كيىپ جۇرگەن «جانسىزدار» دا كوپ بولدى. اسا بەلسەندىلىك تانىتقان ونداعان ادام قاماۋعا الىنعان.
ەلدەگى ەكىنشى ادام ورنىنان ءتۇستى
سولتۇستىك كورەيا باسشىسى كيم چەن ىننىڭ ناعاشىسى چان سون تحەك ۇلتتىق قورعانىس كوميسسياسى باسشىسىنىڭ ورىنباسارى لاۋازىمىنان ءتۇسىرىپ تاستالدى. ۇلتتىق قورعانىس كوميسسياسى كحدر-دەگى جوعارى اسكەري ورگان بولىپ تابىلادى.
قورعانىس كوميسسياسىنا كيم چەن ىننىڭ ءوزى باسشىلىق ەتەدى. سوندىقتان ونىڭ ورىنباسارى ەلدەگى ەكىنشى ىقپالدى ادام سانالادى. مۇنى وڭتۇستىك كورەيانىڭ ۇلتتىق بارلاۋ اگەنتتىگى ءبىلىپ قويعان. وتستاۆكا تۋرالى قورىتىندى جاساۋعا چان سون تحەكتىڭ ەكى جاقىن سەرىگىنىڭ اۋىر جازاعا كەسىلىپ, جۇرت كوزىنشە ءولتىرىلۋى نەگىز بولعان سەكىلدى. وسىدان سوڭ چان سون تحەكتىڭ ءوزى دە رەسمي شارالاردان كورىنبەي كەتكەن. وڭتۇستىككورەيالىق بارلاۋ كيم چەن ىن كوڭىلدەرىنەن شىقپاعان سوڭ جازالانعاندار ونى تاعىنان تايدىرماق بولۋى ىقتيمال دەگەن بولجام جاساعان.
اسكەردى دايىندىق ساپىنا قويدى
ۆەنەسۋەلا پرەزيدەنتى نيكولاس مادۋرو ەل استاناسى – كاراكاس قالاسىندا شامالى ۋاقىتقا جارىق ءسونىپ قالعاننان كەيىن اسكەردى بارىنشا دايىندىققا كەلتىرۋ تۋرالى بۇيرىق بەرگەن.
ن.مادۋرونىڭ سوزىنە قاراعاندا, ارميا ەنەرگيا جۇيەسىن ب ۇلىكشىلەر مەن وپپوزيتسياشىلاردىڭ ودان ارعى شابۋىلىنان قورعاۋى ءتيىس. ونىڭ پىكىرىنشە, ەلەكتر جارىعىنىڭ ءوشىپ قالۋىنا ۇكىمەتكە قارسىلاردىڭ ءىس-ارەكەتى الىپ كەلگەن. ەل پرەزيدەنتى, سونداي-اق, قۋات جەلىلەرىنە «شابۋىلدى» 8 جەلتوقساندا وتەتىن ۆەنەسۋەلا قالالارىنىڭ مەرلەرىن سايلاۋمەن دە بايلانىستىرادى. ءسوز رەتىندە ايتا كەتسەك, كەشە كەشكىسىن كاراكاس پەن ونىڭ توڭىرەگىندە ەلەكتر جارىعى جاپپاي ءوشىپ قالعان بولاتىن. بۇل كەزدە ن.مادۋرو جەرگىلىكتى تەلەۆيزيا ارقىلى تىكەلەي ەفيردەن ءسوز سويلەپ جاتقان ەدى.
وپپوزيتسيا ۇكىمەت ۇيىنە باسىپ كىردى
بانگكوك قالاسىندا دەمونسترانتتار ۇكىمەت ۇيىنە باسىپ كىردى. تايلاندتىڭ «ناتيون» گازەتىنىڭ جازۋىنشا, وپپوزيتسيا باسشىلارى نارازىلىق تانىتۋشىلاردىڭ جەڭىسى تۋرالى جاريا ەتىپ ۇلگەرگەن.
ال «اسسوشيەيتەد پرەسس» اگەنتتىگى بولسا, وپپوزيتسيونەرلەردىڭ ۇكىمەت ءۇيى ورنالاسقان كەشەن اۋماعىنا عانا كىرگەنىن ايتىپ وتىر. بۇل ءۇشىن ولار سىرتقى قاقپانى قيراتىپ, عيمارات الدىنداعى شالعىنعا بارىپ جايعاسقان. پوليتسيا نارازىلىق تانىتۋشىلارعا ەشقانداي قارسىلىق كورسەتپەگەن. عيماراتتىڭ ءوزى بولسا, 29 قاراشادان بەرى جابىق تۇر. سوندىقتان ىشىندە ەشقانداي شەنەۋنىك جوق. تايلاند بيلىگى وسىلايشا وپپوزيتسيونەرلەرگە قاتىستى تاكتيكاسىن كۇرت وزگەرتكەن. ال نارازىلىق اكتسياسى قاراشا ايىنىڭ سوڭىنان بەرى جالعاسىپ كەلەدى.
ينتەرنەت ماتەريالدارى نەگىزىندە ازىرلەندى.