كەشە ورتالىق كوممۋنيكاتسيالار قىزمەتىنىڭ وكىلى التاي ابيبۋللاەۆ جۋرناليستەرگە وسى اپتادا بولاتىن رەسمي شارالار تۋرالى بايانداعان بريفينگ وتكىزدى.
كەشە ورتالىق كوممۋنيكاتسيالار قىزمەتىنىڭ وكىلى التاي ابيبۋللاەۆ جۋرناليستەرگە وسى اپتادا بولاتىن رەسمي شارالار تۋرالى بايانداعان بريفينگ وتكىزدى.
الدىمەن ول 5 جەلتوقساندا پرەمەر-مينيستر سەرىك احمەتوۆ جانە باسقا دا ۇكىمەت مۇشەلەرى سپورت جانە دەنە-شىنىقتىرۋ ىستەرى اگەنتتىگىنىڭ توراعاسى تاستانبەك ەسەنتاەۆتىڭ قازاقستان قۇراما كومانداسىنىڭ سوچيدە بولاتىن ءححىى قىسقى وليمپيا ويىندارىنا بارۋعا دايىندىعى تۋرالى بايانداماسىن تىڭدايتىنىن ايتتى. ءبىزدىڭ مەملەكەت سپورتتىڭ قىسقى تۇرلەرىنە دە باسىمدىق بەرەدى, وعان استانا مەن الماتىدا ءVىى قىسقى ازيا ويىندارىنىڭ تابىسپەن ءوتكىزىلگەنى كۋا, دەدى وكىل.
ا.ابيبۋللاەۆتىڭ ايتۋىنا قاراعاندا, 4 جەلتوقساندا باسەكەلەستىكتىڭ ەۋرازيالىق باعدارلاماسى بويىنشا العاشقى ءدوڭگەلەك ۇستەل وتەدى. مۇندا قازاقستاننىڭ الەمدەگى باسەكەگە بارىنشا قابىلەتتى 30 ەلدىڭ قاتارىنا ەنۋ ماسەلەسى ءسوز بولماق.
مەملەكەتتىك قىزمەت ءىستەرى جونىندەگى اگەنتتىكتىڭ ءتوراعاسى ءاليحان بايمەنوۆ 5 جەلتوقساندا جۇمىس ساپارىمەن پاريج قالاسىنا بارىپ, فرانتسۋزدىق ارىپتەستەرىمەن ىنتىماقتاستىقتى تەرەڭدەتۋ ماسەلەلەرى بويىنشا كەلىسسوزدەر جۇرگىزەدى. ودان ءارى ءا.بايمەنوۆ ءتۇركياعا ساپار شەگىپ, ءوزىنىڭ ونداعى ارىپتەستەرىمەن دە ىنتىماقتاستىق ماسەلەلەرى بويىنشا كەلىسسوزدەر جۇرگىزەدى ەكەن.
وسى اپتاداعى ينۆەستيتسيالىق جوبالار جونىندەگى ەڭ ۇلكەن جيىن الماتىدا وتەدى. وندا 3-4 جەلتوقساندا ءى حالىقارالىق الماتى ينۆەستيتسيالىق فورۋمى بولىپ, وڭتۇستىك استانانىڭ ينۆەستيتسيالىق ءمۇمكىندىكتەرى مەن جوبالاردى قارجىلاندىرۋدىڭ جاڭا تەتىكتەرى, كولىك-لوگيستيكالىق ينفراقۇرىلىمداردى دامىتۋ, تۋريزم مەن ۇلتتىق يننوۆاتسيالىق جۇيەنى ودان ءارى جانداندىرۋ جانە ت.ب. ماسەلەلەر تالقىلانادى. فورۋم جۇمىسىنا ۇكىمەت وكىلدەرى, حالىقارالىق قارجىلىق ينستيتۋتتار باسشىلارى, كورنەكتى ەكونوميست عالىمدار جانە سالالىق ۇيىمدار جەتەكشىلەرى قاتىساتىن بولادى, دەدى ا.ابيبۋللاەۆ.
سونىمەن بىرگە, بريفينگتە سىرتقى ىستەر ءمينيسترى ەرلان ىدىرىسوۆتىڭ 5-6 جەلتوقساندا ەقىۇ-عا مۇشە ەلدەر سىرتقى ىستەر مينيسترلەرىنىڭ 20-شى مەرەيتويلىق وتىرىسىنا قاتىسۋ ءۇشىن كيەۆكە باراتىنى ايتىلدى. 2015 جىلدىڭ 1 قاڭتارىندا ۋكراينانىڭ اتالمىش ۇيىمداعى توراعالىعى اياقتالادى. وتىرىس بارىسىندا وسى ەلدىڭ حالىقارالىق ۇيىمعا توراعالىق ەتۋىنىڭ ناتيجەسى شىعارىلاتىنى دا بەلگىلى. وتىرىس جۇمىسىنىڭ بارىسىندا ەرلان ىدىرىسوۆتىڭ ەقىۇ باس حاتشىسى لامبەرتو زانەر, ۇلتتىق ازشىلىقتار جونىندەگى جوعارعى كوميسسار استريد تورس جانە كەيبىر مۇشە ەلدەردىڭ سىرتقى ىستەر مينيسترلەرىمەن كەزدەسۋلەرى جوسپارلانىپتى. سونداي-اق, كيەۆتە ۇقشۇ-عا مۇشە ەلدەر سىرتقى ىستەر مينيسترلەرى بەيرەسمي جاعدايدا كەزدەسەدى دەپ كۇتىلىپ وتىر ەكەن.
ەلباسى ن.نازارباەۆتىڭ «بولاشاق» باعدارلاماسىنىڭ 20 جىلدىعىنا ارنالعان فورۋمدا ايتقان سوزدەرى مەملەكەتتىڭ جاستار ءىسى مەن ءبىلىم بەرۋ سالاسىنداعى نەگىزگى ساياسي باعدارى ەكەنى انىق. جاستار ۇيىمدارى جۇمىسىن ۇيلەستىرۋ جونىندەگى كەڭەستىڭ 6 جەلتوقساندا بولاتىن وتىرىسىندا وسى ماسەلەلەر تالقىلانىپ, جاڭا جوسپارلار بەلگىلەنبەك كورىنەدى.
جاقسىباي سامرات,
«ەگەمەن قازاقستان».