الماتى قالاسىندا وتاندىق جانە حالىقارالىق بيزنەس قاۋىمداستىقتىڭ وكىلدەرى مەن بانكيرلەر, قارجى-ەكونوميكا سالاسىنىڭ بىلگىر ماماندارى باس قوسقان ءى الماتى ينۆەستيتسيالىق فورۋمى ءوز جۇمىسىن باستادى.
الماتى قالاسىندا وتاندىق جانە حالىقارالىق بيزنەس قاۋىمداستىقتىڭ وكىلدەرى مەن بانكيرلەر, قارجى-ەكونوميكا سالاسىنىڭ بىلگىر ماماندارى باس قوسقان ءى الماتى ينۆەستيتسيالىق فورۋمى ءوز جۇمىسىن باستادى.
القالى جيىنعا ەل ۇكىمەتىنىڭ باسشىسى سەرىك احمەتوۆ ارنايى قاتىسىپ, فورۋم قوناقتارىنىڭ الدىندا قازاقستاننىڭ ەكونوميكالىق احۋالى مەن قول جەتكىزگەن تابىستارى, ينۆەستور تارتۋعا جاسالىپ وتىرعان تولىمدى باعدارلامالارى تۋرالى ايتىپ بەردى. سونداي-اق, بۇل فورۋم قازاقستاننىڭ, ونىڭ ىشىندە الماتى قالاسىنىڭ ينۆەستيتسيالىق احۋالىن جاقسارتۋعا ۇلكەن ۇلەس قوساتىندىعىن ايتا كەلە, بۇگىنگى تاڭدا ەلىمىزدە جيناقتالعان تىكەلەي شەتەل ينۆەستيتسياسى كولەمىنىڭ جان باسىنا شاققاندا 6,5 مىڭ اقش دوللارىن قۇراپ وتىرعانىن مالىمدەدى.
«بۇل كورسەتكىشتەرگە ماكروەكونوميكالىق تۇراقتىلىقتى قامتاماسىز ەتۋ جانە قولايلى ينۆەستيتسيالىق احۋال قۇرۋ بويىنشا جۇيەلى شارالاردىڭ ارقاسىندا قول جەتكىزىلدى. بۇگىنگى تاڭدا قازاقستاندا 8 مىڭعا جۋىق كاسىپورىن شەتەل كاپيتالىنىڭ قاتىسۋىمەن بەلسەندى جۇمىس ىستەۋدە. ونىڭ ىشىندە «Fortune-500» جانە «Global-2000» تىزىمىنە ەنگەن ءىرى ترانسۇلتتىق كومپانيالار بار. ۇستىمىزدەگى جىلى قازاقستاندا اۆتوكولىك قۇراستىرۋ بويىنشا «تويوتا» جانە «پەجو» كومپانيالارىمەن ىنتىماقتاستىق تۋرالى مەموراندۋمدارعا قول قويىلدى» دەدى سەرىك احمەتوۆ.
مەملەكەت باسشىسىنىڭ ينۆەستورلارعا بيزنەستى جۇرگىزۋ ءۇشىن قولايلى جاعدايلار جاساۋعا ايرىقشا كوڭىل بولەتىنىنە توقتالىپ, قولدانىستاعى زاڭنامادا قۇرال-جابدىقتاردى يمپورتتاۋ كەزىندە كەدەندىك سالىقتان بوساتۋ, جەر تەلىمدەرى تۇرىندەگى گرانتتار ءبولۋ, جەكەلەگەن سالىقتار بويىنشا جەڭىلدىكتەر جاساۋ سەكىلدى بىرقاتار شارالاردىڭ قاراستىرىلعانىن اتاپ كورسەتتى. شەتەل ينۆەستورلارىنىڭ بارىپ-كەلۋ جاعدايلارى جاقسارىپ, ينۆەستورلىق ۆيزالاردى الۋ مەرزىمدەرى قىسقارعانىن, قازاقستاننىڭ بارلىق وڭىرلەرىندە ينۆەستورلار ءۇشىن جوبالاردى جۇزەگە اسىرۋدى باستاۋعا قاجەتتى اقپاراتتارمەن قامتاماسىز ەتەتىن ارنايى قىزمەت كورسەتۋ ورتالىقتارى قۇرىلعانىن مالىمدەدى.
ينۆەستيتسيالاردى تارتۋدا جانە بيزنەس ءۇشىن قولايلى جاعدايلار جاساۋدا مەملەكەت پەن ينۆەستور اراسىنداعى تىكەلەي ءتىل قاتىسۋلاردىڭ ماڭىزىن اتاي وتىرىپ, ۇكىمەت باسشىسى بۇل ورايدا قر پرەزيدەنتى جانىنداعى شەتەل ينۆەستورلارى كەڭەسىنىڭ تيىمدىلىگىنە دە توقتالدى. كەڭەستىڭ ينۆەستيتسيالىق احۋالدى جاقسارتۋ بويىنشا جانە ۆەدومستۆوارالىق جۇمىس توپتارىنىڭ تابىستى قىزمەتتەرىن اتاپ ءوتتى. ونىڭ ايتۋىنشا, 2013-2014 جىلدارعا ارنالعان دۇنيەجۇزىلىك ەكونوميكالىق فورۋمدا جاريالانعان ينۆەستورلاردىڭ قۇقىقتارىن قورعاۋ يندەكسىنە سايكەس, قازاقستان بىرقاتار ەۋروپا ەلدەرىن باسىپ وزىپ 10-شى ورىندى يەلەنگەن.
پرەزيدەنتتىڭ «قازاقستان-2050» ستراتەگياسى شەڭبەرىندە الەمنىڭ دامىعان 30 ەلىنىڭ قۇرامىنا ەنۋ مىندەتىن العا قويعانىنا توقتالعان س.احمەتوۆ «بۇل ماقساتقا جەتۋ ءۇشىن ينۆەستيتسيالىق ساياساتتى ودان ءارى دامىتا ءتۇسۋ ماسەلەسىنىڭ نەگىزگى تەتىك بولىپ تابىلاتىنىن» اتاپ كورسەتتى.
پرەمەر-مينيستر فورۋمعا قاتىسۋشىلارعا جاڭا باستامالاردى جۇزەگە اسىرۋدا تابىس تىلەپ, قازاقستان ۇكىمەتى ەسىگىنىڭ ءارىپتەستىك پەن ديالوگ ءۇشىن ارقاشان اشىق ەكەنىن جەتكىزدى.
فورۋمنىڭ سالتاناتتى اشىلۋىندا ءسوز العان قالا اكىمى احمەتجان ەسىموۆ شيكىزاتتىق ءوڭىر بولماسا دا الماتى قالاسى وڭىرلىك ىشكى جالپى ءونىم كولەمى بويىنشا رەسپۋبليكادا ءبىرىنشى ورىندا نىق كەلە جاتقانىن, ناقتىلاي ەسەپتەگەندە 308 ميلليارد دوللاردىڭ ءونىمىن وندىرەتىن 1,5 ميلليوننان استام حالقى بار الماتىدا ىشكى جالپى ءونىم جان باسىنا شاققاندا 25 مىڭ دوللاردى قۇرايتىندىعىن جەتكىزدى. بۇل ورتاشا ستاتيستيكالىق كورسەتكىشى جاعىنان چەحيا, پولشا, بولگاريا, رۋمىنيا جانە تاعى باسقا ەلدەردەن جوعارى. احمەتجان سماعۇل ۇلىنىڭ سوزىنە قاراعاندا, الماتى ءۇشىن شاعىن جانە ورتا بيزنەستىڭ ماڭىزى ەرەكشە. ەلدەگى ءاربىر ءتورتىنشى كاسىپكەر ءوز قىزمەتىن الماتىدا جۇزەگە اسىرادى. سالىقتىق تۇسىمدەردىڭ 60 پايىزى – شاعىن جانە ورتا بيزنەستىڭ ۇلەسىندە. الماتىدا ينۆەستورلار ءۇشىن تارتىمدى 3 باعىت بار. ولار – اقپاراتتىق تەحنولوگيالار پاركى, الاتاۋ اۋدانىنداعى وندىرىستىك ايماق پەن تۋريزم.
«كاپيتاليستىك قوعامدا ءبارى جەكە تابىسقا نەگىزدەلگەن. الايدا, قوعام مۇشەلەرى ءبىر-بىرىنە كومەكتەسۋدى باستى ورىنعا قويماي كوپتەگەن ماسەلەلەر شەشىمىن تاپپايدى» دەگەن پىكىردى العا تارتقان نوبەل سىيلىعىنىڭ يەگەرى, بانگلادەشتىك بانكير ءارى الەمدىك ەكونوميكا عىلىمدارىنىڭ پروفەسسورى مۇحاممەد يۋنۋس قوعام تەك جەكە پايداعا عانا نەگىزدەلمەۋى كەرەكتىگىن, مەملەكەت كوپتەگەن ماسەلەلەردە ءوز تاراپىنان كومەك قولىن سوزىپ, قوعام تۇتاستاي ءوزارا قولداۋ كورسەتكەن كەزدە عانا ىلگەرى باسۋ مەن تابىسقا كەنەلەتىندىگىن تىلگە تيەك ەتتى.
مۇنان وزگە, ەكى كۇنگە سوزىلعان ءى الماتى ينۆەستيتسيالىق فورۋمىندا ۇلىبريتانيا, فرانتسيا, گونكونگ, اقش, يتاليا, كانادا, تايۆان, يسپانيا, رەسەي ەلدەرىنەن كەلگەن قارجىگەرلەر مەن ەكونوميستەر بايانداما جاساپ, الەمدىك ەكونوميكانىڭ باعىتىن بولجايتىن ساراپتامالىق جۇمىستارىمەن ءبولىستى.
قانات ەسكەندىر,
«ەگەمەن قازاقستان».
الماتى.