ءتورت جىلعا سوزىلعان قانقۇيلى ۇلى وتان سوعىسىنىڭ اۋىرتپالىقتارىن وتكەرگەن, ەكى عاسىر كۋاگەرى, ەكى فورماتسيادا ءومىر ءسۇرىپ, وعان تاعدىرلاس بولعان اعا ۇرپاق وكىلدەرى سول ءبىر كۇندى ەشقاشان ۇمىتا المايدى. ول 1991 جىلدىڭ 1 جەلتوقسانى بولاتىن. تاۋەلسىزدىكتىڭ جارقىراپ اتىپ كەلە جاتقان نۇرلى تاڭىنا سەنىم ارتقان قازاقستان حالقى ءبىرىنشى رەت ءوز ەلى پرەزيدەنتىنىڭ سايلاۋىنا 98,7 پايىز قاتىستى. زور ماقتانىشپەن قازاق حالقىنىڭ تۇڭعىش پرەزيدەنتى بولىپ نۇرسۇلتان ءابىش ۇلى نازارباەۆ سايلاندى. جۇرتتىڭ قۋانىشى مەن ريزاشىلىعى سونشالىق, سايلاۋ بۇكىلحالىقتىق مەرەكەگە اينالدى. بىلەتىن-بىلمەيتىندىكتەرىنە قاراماستان, جۇرت ءبىرىن-ءبىرى جىلى شىرايمەن قۇتتىقتاۋدا بولدى.
ءتورت جىلعا سوزىلعان قانقۇيلى ۇلى وتان سوعىسىنىڭ اۋىرتپالىقتارىن وتكەرگەن, ەكى عاسىر كۋاگەرى, ەكى فورماتسيادا ءومىر ءسۇرىپ, وعان تاعدىرلاس بولعان اعا ۇرپاق وكىلدەرى سول ءبىر كۇندى ەشقاشان ۇمىتا المايدى. ول 1991 جىلدىڭ 1 جەلتوقسانى بولاتىن. تاۋەلسىزدىكتىڭ جارقىراپ اتىپ كەلە جاتقان نۇرلى تاڭىنا سەنىم ارتقان قازاقستان حالقى ءبىرىنشى رەت ءوز ەلى پرەزيدەنتىنىڭ سايلاۋىنا 98,7 پايىز قاتىستى. زور ماقتانىشپەن قازاق حالقىنىڭ تۇڭعىش پرەزيدەنتى بولىپ نۇرسۇلتان ءابىش ۇلى نازارباەۆ سايلاندى. جۇرتتىڭ قۋانىشى مەن ريزاشىلىعى سونشالىق, سايلاۋ بۇكىلحالىقتىق مەرەكەگە اينالدى. بىلەتىن-بىلمەيتىندىكتەرىنە قاراماستان, جۇرت ءبىرىن-ءبىرى جىلى شىرايمەن قۇتتىقتاۋدا بولدى.
سول كۇندەرى ل.ب.گونچاروۆ اتىنداعى الماتى جول-قۇرىلىس ينستيتۋتىنىڭ وقىتۋشىلارى – بىزدەر ستۋدەنتتەردىڭ پرەزيدەنت سايلاۋىنا قاتىسقاندارىنا, دەربەستىككە قول جەتكەن ەلىمىزدىڭ كەلەشەگىنە اسا ءبىر ريزاشىلىق تانىتقان سەزىمدەرىنە, وقۋعا دەگەن ىنتالارىنا ءتانتى بولدىق. ارقاشان جاستارىمىزدىڭ قۋانىشىن كورگەننەن ارتىق باقىت جوق ەكەنىنە بارلىق كەزدە كوزىمىز جەتىپ كەلەدى. ويتكەنى, ادامنىڭ ءنار بەرەتىن تامىرى دا, ءسان بەرەتىن جاپىراعى دا كەلەشەك ۇرپاق ەمەس پە؟!
ەندى ءبىراز شەگىنىس جاساپ, سول جىلدارداعى ساياسي-الەۋمەتتىك جاعدايلارىمىزعا كوز جىبەرەيىكشى. 1991 جىلى جەلتوقسان ايىندا كەڭەس وداعى دەپ اتالاتىن, 70 جىل ۇستەمدىك ورناتقان دەرجاۆا ىدىراپ, تاريحي ساحنادان كەتتى. 16 وداقتاس رەسپۋبليكا ءارقايسىسى ءار جاققا الاڭدادى. ءبىرى مۇسىلماندىق وداققا, ءبىرى ەۋروپاعا كوز تىكتى. تەحنيكا جابدىقتارى, قاراجات قورى تۇگەلدەي دەرلىك رەسەي زاۋىتتارىنا, ماسكەۋ ورتالىعىنا باعىنىشتى بولعاندىقتان, ەلىمىزدە ءوندىرىس توقتاي باستادى.
ونسىز دا كيسە كيىمگە, ىشسە تاماققا تاپشىلىقپەن كۇنەلتكەن جەرىمىزدە ەت, ءسۇت تاعامدارىنا, بالا-شاعانىڭ كيىم-كەشەگىن ساتىپ الۋعا ساعاتتاپ كەزەكتەردە تۇراتىن بولدىق.
ءبىر قولعا مولشەرلەنگەن زاتتاردى عانا الاتىن ەدىك ء(بىر بوتەلكە ايران, 1-2 پاشكە گرۋزين شايى, ءبىر تاۋىق, ت.ت.). دۇكەندەر سورەسى بوس قالدى. اۋىل ادامدارى الا سومكە ارقالاپ, قالالاردى جاعالاپ ناپاقاسىن تابۋعا كىرىستى... قىسقاشا ايتقاندا, قازاق ەلى جاپان تۇزدە جالعىز قالعان وتاۋداي كۇن كەشكەن كەز ەدى. وسىنداي الاساپىران كەزىندە بولاتپەن بىرگە قايناپ شىنىققان, بالا كەزىنەن كوپشىلىك جۇمىستاردىڭ ليدەرى بولىپ قالىپتاسقان, وبلىستىق, رەسپۋبليكالىق پارتيا كوميتەتتەرىن باسقارعان نۇرسۇلتان باۋىرىمىز قازاقتىڭ باعىنا كوك تۋىمىزدى قولىنا الىپ, ەشبىر ەل باسىنان كەشپەگەن قىرقاسى مەن بەلەسى كوپ جولمەن ەلىمىزدى باستاپ كەلەدى.
«الماس كەزدىك قىن تۇبىندە جاتپايدى» دەگەن وسى. «ادامدا جاقسى قاسيەت بولماسا باق تا, باقىت تا قونبايدى», دەگەن ەكەن بالاساعۇن بابامىز. ەل مۇددەسىنە قالتقىسىز قىزمەت ەتىپ, كۇنى-ءتۇنى تىنىم تاپپاي جار قۇلاعى جاستىققا تيمەي ەرەندىك پەن تەرەڭدىك, كەمەلدىك پەن كورەگەندىك تانىتىپ جۇرگەن اسىل ازاماتىمىزعا اللا جار بولسىننان باسقا ايتارىمىز جوق. تاۋەلسىزدىكتىڭ ارقاسىندا تاريحي از ۋاقىت ىشىندە الەم تانىعان دامۋشى مەملەكەتتەردىڭ بىرىنە اينالدىق.
قازاق جەرىنىڭ استى دا, ءۇستى دە تۇنىپ تۇرعان قازىنا. بىزدە كەن بايلىعى بار. بىزدە ەل بايلىعى دا بار. ول – عىلىم مەن ءبىلىم. ول – جاڭا تەحنولوگيا. ول – ەكونوميكانى ءارتاراپتاندىرۋ, ول ەكسپو-2017. بىزدە رۋح بايلىعى بار. ونىڭ باستى ولشەمى تاتۋلىق, تىنىشتىق پەن تۇراقتىلىق, ەڭبەكقورلىق. تاريحي از ۋاقىت ىشىندە كورشىلەس جانە الىس قۇرلىقتا ورنالاسقان ەلدەرمەن تەرەزەسى تەڭ ديپلوماتيالىق قارىم-قاتىناس ورناتىپ, ءار مەملەكەتتىڭ تورىنەن ەلشىلىگىمىزدى اشتىق. بىرىككەن ۇلتتار ۇيىمىنا مۇشە بولدىق. ەكونوميكامىز قارقىندى دامىپ, دۇنيەجۇزىلىك داعدارىستان سۇرىنبەي ءوتىپ, الدىڭعى قاتارلى 50 ەلدىڭ ساناتىنا ەندىك. ەۋروپاداعى قاۋىپسىزدىك جانە ىنتىماقتاستىق ۇيىمىنا باسشىلىق جاسادىق. الار اسۋلارىمىز ءالى دە از ەمەس ەكەنىنە كامىل سەنەمىز.
ارىن ارقالاپ, نامىسىن قامشىلاپ, ۇرپاقتارعا ۇيىتقى بولىپ كەلە جاتقان قارتتاردىڭ ماقتان تۇتارى كوپ. ال ونىڭ ىشىندە: اسەم قالا, الىپ قالا كيەلى شاھار الماتى قازاقستان تاۋەلسىزدىگىنىڭ التىن بەسىگى بولعانى, وسى قالادا 1991 جىلى 1 جەلتوقساندا تۇڭعىش پرەزيدەنتىمىز – ەلباسى ن.ءا.نازارباەۆتىڭ تاققا وتىرعانى بەلگىلى. ال ءبىز – اعا ۇرپاق ەلىمىزدىڭ اماندىعىنا, جۇرتىمىزدىڭ تىنىشتىعىنا تىلەك ايتىپ, سايىن دالا سارىارقا توسىندەگى, ەۋرازيا كىندىگىندەگى استانانىڭ جاسامپاز ىستەرىنە, ءححى عاسىر قازاقستاننىڭ التىن عاسىرىنا اينالاتىنىنا باتاگوي بولىپ كەلە جاتىرمىز.
بيجامال رامازانوۆا,
قازاقستان رەسپۋبليكاسى
ورتالىق ارداگەرلەر كەڭەسىنىڭ مۇشەسى,
الماتى قالاسىنىڭ قۇرمەتتى ازاماتى.
الماتى.