اۋە قورعانىسى كۇشتەرىنىڭ اسكەري ينستيتۋتىندا اتى اڭىزعا اينالعان ۇشقىش, ەكى مارتە كەڭەس وداعىنىڭ باتىرى تالعات بيگەلدينوۆتى ەسكە الۋ كۇنى ءوتتى. بۇل تۋرالى قورعانىس مينيسترلىگى حابارلادى.
سوعىس جىلدارى ول اسكەري تاپسىرمالارمەن 305 رەت اۋەگە كوتەرىلگەن. تالعات بيگەلدينوۆ اۋە شايقاسىندا فاشيستىك «مەسسەرشميتتى» جەڭگەن العاشقى ۇشقىش بولدى. يل-2 شابۋىلداۋشى ۇشاعىندا ول جەتى ۇشاقتى اتىپ ءتۇسىرىپ, جاۋدىڭ ونداعان تانكتەرىن, زەڭبىرەكتەرىن جانە باسقا دا تەحنيكالارىنىڭ كوزىن جويدى. ەرلىگى مەن ۇشۋ شەبەرلىگى ءۇشىن اعا لەيتەنانت تالعات بيگەلدينوۆ ەكى رەت كەڭەس وداعىنىڭ باتىرى اتاعىنا يە بولدى.
«جاس ۇرپاق قازاقستاندىق جاۋىنگەرلەردىڭ ەرلىكتەرىن ءبىلۋى كەرەك. ولارعا قاراپ بوي تۇزەيتىندەي ءبىز كۋرسانتتاردى جاۋاپكەرشىلىككە, سەرتكە ادال بولۋعا ۇيرەتىپ, ناعىز وتان قورعاۋشىلاردى تاربيەلەيمىز», – دەدى اۋە قورعانىسى كۇشتەرى اسكەري ينستيتۋتى باستىعىنىڭ مىندەتىن ۋاقىتشا اتقارۋشى پولكوۆنيك اسقار ءىزباسوۆ.
تالعات بيگەلدينوۆ 2014 جىلى 10 قاراشادا دۇنيەدەن وزدى. كوزى تىرىسىندە ول جاستارمەن ءجيى كەزدەسەتىن. ءار كەزدەسۋدە ول جاستارعا پاتريوت, دوستىققا بەرىك بولۋدى, اتا-بابالارىمىزدىڭ جاۋىنگەرلىك داستۇرلەرىن ارتتىرۋ قاجەت ەكەنىن ايتاتىن.
جوو ءۇشىن اتاقتى ۇشقىش تالعات جاقىپبەك ۇلى بيگەلدينوۆتى ەسكە الۋ كۇنىن اتاپ ءوتۋ داستۇرگە اينالعان. كۋرسانتتار وسىنداي باتىردىڭ ەسىمى بەرىلگەن ينستيتۋتتا وقىعانىن ماقتان تۇتادى.
جوو-دا كۋرسانتتار تالعات بيگەلدينوۆتىڭ تانىمال شىعارمالارىمەن تانىسادى. اتاپ ايتقاندا «يلدەر شابۋىلدايدى», «305-ءشى رەيد» جانە «ماڭگىلىك شىڭىندا». بۇل كىتاپتار ينستيتۋت كىتاپحاناسىنىڭ قورىندا بار.
جوو قولباسشىلىعى مەن كۋرسانتتار باتىردىڭ ەسكەرتكىشىنە گۇل شوقتارىن قويىپ, ءبىر مينۋت ۇنسىزدىك جاريالادى.