ءۇندىستاندا قالىپتاسقان ءارتۇرلى كاستا مەن ءدىن وكىلدەرىنىڭ ۇيلەنۋىنە قاتىستى تىيىمعا قارسى ناۋقان باستالدى. قوعام بەلسەندىلەرى الەۋمەتتىك جەلىلەردە «سەنىم, ەتنوس, دىنگە بايلانىستى شەكتەۋ بولمايدى» دەگەن ۇستانىممەن ويلارىن بولىسۋدە.
ۇيىمداستىرۋشىلاردىڭ ايتۋىنشا, ەلدەگى كونسەرۆاتيۆتى وتباسىلار بالالارىنا باسقا كاستا مەن باسقا سەنىمدەگى ادامدارمەن وتاۋ قۇرۋعا رۇقسات بەرمەيدى. سوڭعى جىلدارى جاستار ءوز قالاۋىمەن وتباسى قۇرا الماعانىنا قارسىلىق تانىتىپ, قوعامدا ۇلكەن رەزونانس تۋعان.
جاقىن ارادا «تانيشك» اشەكەي كومپانياسى ەكى ءتۇرلى ءدىن وكىلىنىڭ ۇيلەنگەنىن كورسەتىپ, جارناما روليگىن ءتۇسىردى. جارنامادا بىرنەشە مادەنيەتتىڭ ءبىر وتباسىندا كورىنىس تاپقانى ۇناماسا كەرەك, سيۋجەت حالىقتىڭ اشۋىن تۋعىزىپ, تالقىلاۋعا ۇشىرادى. ولاردىڭ ويىنشا, وتباسى قۇرعان ەكى تاراپ بىردەي مادەنيەتتى دارىپتەپ, ءبىر سەنىمدە بولۋى كەرەك. ال جارناماداعى باتىس پەن شىعىستىڭ قوسىندىسى بۇل قوعامعا جات. جارناما جاساۋشى كومپانيا جارناما ۇرانى رەتىندە «تۇتاستىق – ارالۋاندىقتا» دەيدى. دەگەنمەن بۇل يدەيا قۋدالانىپ, جارنامانىڭ تاراتىلۋىنا شەكتەۋ قويىلدى.
ءۇندىستان بەلسەندىلەرى بۇدان كەيىن الەۋمەتتىك جەلىنى قولدانۋدى ءجون كورەدى. بلوگەرلەر مەن قوعام بەلسەندىلەرى پاراقشالارىندا ءبىر وتباسىندا ەكى مادەنيەتكە ورىن بارىن, ايەلى مەن ەرىنىڭ ءبىر كاستادان بولۋى شارت ەمەسىن ايتۋدا. بەلسەندىلەر وسىلايشا قوعامداعى اگرەسسيانى توقتاتۋعا تىرىساتىنىن ءبىلدىردى. ء«بىز تەك ءوز وقيعاسىمەن بولىسۋگە مۇمكىندىك بەرەمىز. ەشكىمدى رايىنان قايتاراتىن ويىمىز جوق. بىراق قوعام مۇنىڭ قالىپتى ەكەنىن تۇسىنەتىن كەز كەلدى», دەيدى ولار.