پارلامەنت ءماجىلىسىنىڭ دەپۋتاتى ەرجان قۇدايبەرگەن كەلەسى شاقىرىلىمعا ءوز كانديداتۋراسىن ۇسىنۋ ءۇشىن "Nur Otan" پرايمەريزىنىڭ كەلەسى دەڭگەيى – وڭىرلىك كونفەرەنتسيالار اياسىنداعى دەباتتارعا قاتىسۋعا شەشىم قابىلدادى, دەپ حابارلايدى Egemen.kz.
17 قاراشادا تۇركىستان وبلىسىندا پارتيانىڭ وڭىرلىك كونفەرەنتسياسى وتەدى. وندا ۇمىتكەرلەر اراسىنداعى دەباتتاردان سوڭ وبلىستىق ماسليحاتقا پارتيالىق ءتىزىم جانە پارلامەنت ماجىلىسىنە پارتيالىق تىزىمگە ەنۋگە كانديداتتار ايقىندالادى. ەرجان قۇدايبەرگەن وسى پىكىرتالاستارعا قاتىسىپ, ءوز كانديداتۋراسىن ۇسىنباق.
"مەن ەلىمىزدە العاش رەت رەسپۋبليكالىق دەڭگەيدە وتكەن پارتيالىق پرايمەريزدى مۇقيات باقىلادىم. ارينە, مەنى پارتياىشىلىك سايلاۋعا قاتىسۋشىلار اراسىندا جاستاردىڭ كوپ بولۋى قۋانتادى. جاستار كوپتەگەن جاڭا يدەيالار مەن وزگەرىستەرگە جاڭا كوزقاراس اكەلەدى. الايدا قازىرگى الەمدىك ساياسي تاجىريبەدە مەملەكەت قايراتكەرى مەملەكەتتىك باسقارۋ ىسىنە قاجەتتى كوپتەگەن داعدىلارعا يە بولۋى كەرەك. ول ءوزىن كوپشىلىك الدىندا كورسەتە ءبىلىپ, سەنىمدى سويلەپ, ءوز ءوڭىرىنىڭ پروبلەمالارى تۋرالى عانا ەمەس, حالىقارالىق قارىم-قاتىناس جانە ۇلتتىق قاۋىپسىزدىك ماسەلەلەرىن تالداي ءبىلۋى, سونداي-اق دۇرىس, وزەكتى شەشىمدەر ۇسىنا الۋى ءتيىس.
ءبىزدىڭ وتانداستارىمىز بۇل جاعىنان قالىس قالىپ جاتقان جوق. ولار زاماناۋي ءبىلىم الادى, ال كەيبىرەۋلەرى "بولاشاق" باعدارلاماسى بويىنشا ۇزدىك شەتەلدىك جوعارى وقۋ ورىندارىندا وقىپ, زاماناۋي تەحنولوگيالاردى جاقسى مەڭگەرگەن جانە وتە كرەاتيۆتى. بىراق سوعان قاراماستان, ءبىر جەتىسپەيتىن نارسە بار – تاجىريبە. ول جىلدار بويى جيناقتالىپ, دامىپ وتىرادى. وسى ورايدا جاستار مەن جاڭا ساياسي تۇلعالارعا پارتيانىڭ تاجىريبەلى مۇشەلەرىنىڭ, تالىمگەرلەردىڭ كومەگى مەن قولداۋى ارتىق بولماس.
ناقتى ساياساتتا اۋحال پرايمەريز اياسىنداعىداي ەمەس. قارسى تاراپتىڭ پىكىرىن ەستي ءبىلۋ, جالپى ماسەلەنىڭ تۇپكى ءمانىن تابۋ مەن ۇتىمدى شەشىم ۇسىنا ءبىلۋ – بۇل وتە ماڭىزدى. وبەكتيۆتى تۇردە ايتساق, ءبىلىمى مەن ەنەرگياسى بار جاستار ءتۇرلى قوردالانعان ماسەلەلەردەن تۇراتىن "تاۋ-تاستاردى" قوپارا الار, بىراق بۇل "قوپارۋلاردان" كەيىنگى ءىس-قيمىل وڭ باعىت الۋى قاجەت", - دەدى ول.
بۇگىندە پارلامەنت ءماجىلىسىنىڭ دەپۋتاتى, حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەسى رەتىندە ەرجان قۇدايبەرگەنگە اۋىسىمعا كەلە جاتقان جاڭا بۋىننىڭ دەڭگەيىن ءبىلۋ وتە ماڭىزدى. حالىقارالىق قاتىناستار مەن ۇلتتىق قاۋىپسىزدىك ماسەلەلەرى ءتيىستى بىلىكتىلىك پەن تاجىريبەنى تالاپ ەتەدى. مىسالى, قر قارۋلى كۇشتەرىن اسكەري دايارلاۋ, جاراقتاندىرۋ جانە ولاردىڭ بيۋدجەتى نەمەسە قازاقستاننىڭ بۇۇ, ەقىۇ, تمد, دسۇ, ۇقشۇ جانە باسقا دا حالىقارالىق ۇيىمدارداعى قىزمەتى ماسەلەلەرىن تالقىلاۋ.
ونىڭ ايتۋىنشا, حالىقارالىق قاتىناستار مەن ۇلتتىق قاۋىپسىزدىكتىڭ ماڭىزدى ماسەلەلەرىمەن تاجىريبەسى مەن ءبىلىمى بار ازاماتتار اينالىسۋى كەرەك.
"مەن دەپۋتاتتىققا تۇسكەن تۇركىستان ءوڭىرىنىڭ مۇددەسىن بىلدىرۋگە جانە حالىقارالىق قاتىناستاردىڭ ماڭىزدى ماسەلەلەرىن شەشۋگە تاجىريبەم مەن كۇش-جىگەرىم جەتەدى دەپ سانايمىن. الدا ءبىزدى جاۋاپتى جۇمىستار كۇتىپ تۇر. مەنىڭ ءبىلىمىم مەن تاجىريبەم بۇدان ءارى دە پايدالى بولعانىن قالايمىن", - دەدى ول.